Nnipa bi wɔ hɔ a abrabɔ tumi twa wɔn mmaa paa, nanso ɛkyɛ ansa na wɔasua biribi afi mu. Saa na na mete. Yɛwoo me tetee me wɔ Barcelona; nkurow akɛse a ɛwɔ Spain no, ɛno na ɛtɔ so mmienu. Borɔn a na yɛte so no, yɛfrɛ hɔ Somorrostro; ɛda mpoano. Somorrostro hɔ de, sɛ ɛba nsɛmmɔnedi ne nnubɔnetɔn a, na wɔte so paa.

 Ná me maame mma yɛ nkron, na me na na meyɛ panyin. Ɛnam sɛ na ohia adokoro yɛn nti, me papa de me kɔɔ baabi a wɔbɔ tɛnɛs bɔɔl sɛ menkɔkyekye bɔɔl na wɔntua me ka. Saa bere no, na madi mfe du, na na mede nnɔnhwerew du na ɛyɛ adwuma da biara. Wei maa me sukuukɔ yɛɛ basaa; ná mintumi nkɔ sukuu te sɛ m’atipɛnfo. Bere a midii mfe 14 no, mekɔyɛɛ adwuma wɔ baabi a wɔsosɔ nnade de yɛ mfiri.

 Spain ha no, aban no ahyehyɛ mmara bi sɛ, sɛ obi nyin du baabi a, ɛsɛ sɛ ɔkɔ sogya. Enti afe 1975 mu no, wɔbɛfrɛɛ me sɛ minkodi sogya. Ná mepɛ sɛ meyɛ biribi soronko wɔ m’asetena mu, enti mituu me ho mae sɛ me ne Spanish Foreign Legion a ɛwɔ Melilla no bɛyɛ adwuma, na na ɛhɔ wɔ Spain atifi fam a ɛne Afrika bɔ hye no. Saa beae no, na wɔn abrabɔ ne wɔn biribiara yɛ soronko koraa. Saa bere no, sɛnea na menom nnubɔne ne nsa no de, na ɛyɛ ahometew paa.

 Bere a migyaee adwuma no, mesan kɔɔ Barcelona kɔtew kuw. Yɛn de, biribiara a yɛn nsa beso mu biara na yewia kɔtɔn sɛnea ɛbɛyɛ a yebenya sika akɔtɔ nnubɔne anom. Mifii ase nom adubɔne bi a yɛfrɛ no LSD ne nea yɛfrɛ no amphetamines. Afei mesan yɛɛ mmaasɛm paa, na nsawe ne kyakyatow de, na mefa no kwa. Subammɔne a mede me ho hyɛɛ mu no maa mebɛyɛɛ otuturafo paa. Daa na sekan mma, akuma, anaa sekan kɛse hyɛ me ho. Sɛ ɛho behia a, na minsuro sɛ meyi emu biara de adi bɔne.

 Da koro bi mpo de, me ne me mmarima a me ne wɔn nam no kowiaa kar maa polisifo de guu yɛn so. Saa da no de, asɛ sini. Yɛde kar no kɔe ara bɛyɛ kilomita 30 anaa akwansin 20, ne nyinaa na polisifo no taa yɛn so. Afei de polisifo no fii ase de tuo guu yɛn so. Ewiee ase no, yɛn drɔba no bɔɔ kar no ahwehwɛ maa yɛfaa mu guanee. Me papa tee no, ɔpam me fii fie.

 Efi saa bere no, medaa abɔnten bɛyɛ mfe nnum. Ɛtɔ da a na meda apono ano, kar mu, nkongua a esisi mmeae a nkurɔfo kogye wɔn ani, ne asiei. Metenaa ɔbotan mu kakra. Ná botae biara nsi m’ani so wɔ abrabɔ mu, na mebɛtee nka mpo sɛ mete ase o, miwu o, me ho nhia. Bere bi mpo de, nnubɔne a na manom nti, mitwitwaa me nsa ne m’abasa ho, na ɛde besi nnɛ, etwã no da so ara wɔ hɔ.

 Midii mfe 28 no, me maame bɛhwehwɛɛ me, na ɔka kyerɛɛ me sɛ mensan mmra fie. Mepenee so sɛ mɛba fie, na mehyɛɛ no bɔ sɛ mɛsesa me suban, nanso ɛkyɛe kakra ansa na meresesa.

 Da koro awia bi, Yehowa Adansefo mmienu bi baa yɛn fie. Wɔne me rebɔ nkɔmmɔ no, me papa teɛteɛɛm guu me so wɔ dan mu sɛ menka pon no ntom nnyaw wɔn hɔ nkɔ. Me nso, na m’aso yɛ den paa, enti mammua no koraa. Adansefo no maa me nhoma nketewa mmiɛnsa bi, na m’ani gyee ho paa. Memaa wɔkyerɛɛ me baabi a wɔkɔ asafo nhyiam, na nna kakra akyi no, mikogyinaa Ahenni Asa no akyi.

 Ade a midii kan hyɛɛ no nsow wɔ Adansefo no ho ne sɛ, na obiara asiesie ne ho kama. Me de, na me ti nwi gu me kɔn ho, na na m’abɔgyesɛ nso afuw kuhaa. Afei na ntaade a ɛhyɛ me no nye koraa. Me ara mihui sɛ matɔ mu. Nanso m’ani bɔɔ m’adamfo bi a yɛfrɛ no Juan so; kan no na yɛne no na edi nsɛmmɔne. Ná wahyɛ suit asiesie ne ho kama. Akyiri yi, metee sɛ wabɛyɛ Yehowa Danseni bɛyɛ afe koraa. Ɔno a mihuu no wɔ hɔ no hyɛɛ me nkuran sɛ menkɔ Asa no so nkotie asɛm no bi. Saa da no ara na mihui sɛ ɛsɛ sɛ mesesa me suban.

 Mepenee so sɛ wɔne me nsua Bible, na ntɛm ara na mibehui sɛ, sɛ mepɛ sɛ Onyankopɔn hyira me de a, ɛnde ɛsɛ sɛ mesesa me subammɔne ne brabɔne a mebɔ no. Ná ɛnna fam mma me koraa sɛ mɛsesa. Mihui sɛ, sɛ metumi asɔ Yehowa Nyankopɔn ani a, ehia sɛ “mesesa m’adwene yɛ me ho foforo.” (Romafo 12:2) Sɛnea Onyankopɔn yii ne mmɔborɔhunu adi kyerɛɛ me no yɛɛ me nwanwa paa. Nneɛma bɔne bebrebe a meyɛe nyinaa akyi no, mihui sɛ wama manya kwan a mede bɛhyɛ abrabɔ foforo ase. Nea misua faa Yehowa Nyankopɔn ho no kaa me koma paa. Ɛma migye dii paa sɛ ampa Ɔbɔadeɛ bi wɔ hɔ a odwen me ho.—1 Petro 5:6, 7.

 Wei kaa me koma ma mifii ase sesaa m’abrabɔ. Mekae sɛ bere bi, na yɛresua Bible, ɛnna mibehui sɛ ɛsɛ sɛ migyae sigaretnom, enti meka kyerɛɛ me ho sɛ, ‘Sɛ Yehowa Nyankopɔn pɛ sɛ me ho tew a efĩ biara nni me ho de a, ɛnde nea ɛsɛ sɛ meyɛ ara ne sɛ meyi sigaret afi m’akwan mu koraa!’ (2 Korintofo 7:1) Enti metoo sigaret no nyinaa guu bɔɔla mu!

 Afei nso, na ɛsɛ sɛ migyae nnubɔne tɔn. Ɛno de, egyee bere kakra, na ɛsɛ sɛ mimia m’ani. Mehyɛɛ no nsow sɛ, sɛ mantwe me ho amfi wɔn a na me ne wɔn goro no ho a, merentumi nnyae. Ná wɔn suban no mma mintumi nkɔ m’anim wɔ Onyankopɔn som mu. Nanso akyiri yi, mifii ase de me ho too Onyankopɔn so, na asafo no mufo a me ne wɔn faa adamfo no nso boaa me paa. Ɔdɔ a wɔyii no adi kyerɛɛ me no, na minhuu bi da. Abosome kakra ntam no, afei de mitumi gyaee nnubɔne no akyi di, na ‘mehyɛɛ suban foforo’ a ɛbɛma Onyankopɔn agye me atom. (Efesofo 4:24) August 1985 mu no, mebɔɔ asu bɛyɛɛ Yehowa Danseni.

 Bible no maa m’abrabɔ sesae koraa. Abrabɔ a anka ɛresɛe me nipadua ne m’animuonyam no, Bible no ama matwe me ho afi ho. Nokwasɛm ne sɛ, wɔn a na me ne wɔn bɔ no, wɔn mu bɛboro 30 de, AIDS anaa yare afoforo a nnubɔnenom de ba kunkum wɔn. Nanso yɛreka yi na wɔnnyin ahe biara. Ɛyɛ me dɛ paa sɛ Bible mu nsɛm a mede bɔɔ me bra no nti, nea ɛtoo wɔn no bi anto me.

 Sekan ne akuma a na mede hyehyɛ me ho de di awurukasɛm no, seesei megyae; menyɛ bio. Manna annwen ho da sɛ bere bi bɛba a, mekura Bible akɔ nkurɔfo nkyɛn sɛ merekɔboa wɔn. Seesei me ne me yere yɛ Yehowa Adansefo; na yɛde bere pii ka asɛmpa no.

 M’awofo ammɛyɛ Yehowa Adansefo da, nanso wɔn ani gyei paa sɛ misuaa Bible maa m’abrabɔ sesae. Da koro bi mpo de, me papa gyinaa n’adwumamfo anim gyee Adansefo no ti. Ɔno ara hui sɛ me gyidi foforo no ama m’abrabɔ ayɛ papa. Ná me maame taa ka sɛ anka ɛsɛ sɛ misua Bible no ntɛm. Me ne maame yɛ adwene paa!

 Nea mafa mu wɔ asetena mu no ama me ara mahu sɛ, nyansa biara nnim sɛ obi de ne ho bɛkɔ akɔhyehyɛ nnubɔne, atuturasɛm ne nea ɛkeka ho mu. Seesei nea ɛma m’ani gye paa ne sɛ mɛboa nkurɔfo ama wɔahu nokwasɛm a ɛwɔ Onyankopɔn Asɛm mu no; ɛno na ɛgyee me nkwa.