Yehowa Danseni bea bi a ne din de Virginia wɔ yare bi a wɔfrɛ no locked-in syndrome. Wabubu koraa. Otumi hu ade, wokasa a ɔte, otumi bue n’ani, na otumi kyea ne ti kakra, nanso ontumi nkasa, na ontumi nnidi nso. Bere bi, na ɔte apɔw a ɔno ara tumi yɛ ne biribiara. Nanso afe 1997 anɔpa bi, ɔtee sɛ n’atikɔ tutu no paa. Enti ne kunu de no kɔɔ ayaresabea. Saa anwummere no, ɔkɔɔ kooma. Nnawɔtwe mmienu akyi a n’ani so tetew no no, na ɔda baabi a wɔhwɛ ayarefo a wɔn yare mu yɛ den paa. Ná wabubu, na na wɔde mframa asi ne so. Ahyɛase no mpo deɛ, na ɔnkae biribiara; ne din mpo, na ɔnkae.

 Virginia kaa nea esii akyiri yi ho asɛm sɛ: “Nkakrankakra mesan kaee nneɛma bio. Mebɔɔ mpae paa. Ná mempɛ sɛ miwu gyaw me babarima kumaa no ma n’asɛm yɛ mmɔbɔ. Ná mepɛ sɛ minya akokoduru, enti mebɔɔ mmɔden sɛ mɛkae Bible mu nsɛm pii.

 “Akyiri yi, adɔktafo no yii me fii baabi a wɔhwɛ ayarefo a wɔn yare mu yɛ den paa no kɔɔ baabi a ayarefo afoforo wɔ no. Medaa ayaresabea ahorow ne beae bi a wɔhwɛ wɔn a wɔabubu abosome nsia ansa na wɔreyi me akɔ fie. Saa bere no nyinaa, na mabubu koraa, biribiara gye sɛ obi yɛ ma me. M’abam bui paa! Ná ɛyɛ me sɛ Yehowa mfa me nyɛ hwee na me so nni mfaso mma obiara. Ade foforo a na meredwen ho ne sɛ, ‘Mɛyɛ dɛn ahwɛ me babarima no?’

 “Yehowa Adansefo afoforo a wɔafa me tebea no mu bi no, mifii ase kenkan wɔn ho nsɛm. Mehwɛ nea wotumi yɛ maa Yehowa no a, na ɛyɛ me nwonwa! Enti mede m’adwene sii nneɛma a metumi ayɛ mmom so sɛnea ɛbɛyɛ a m’ani begye. Ansa na yare no rebɔ me no, bere kakraa bi pɛ na na minya ma me som. Nanso afei de na mewɔ bere pii efisɛ na menkɔ baabiara. Enti mansu me ho mmɔbɔ, mmom meyɛɛ nneɛma a ɛbɛma mabɛn Yehowa.

 “Misuaa sɛnea mede kɔmputa bɛyɛ adwuma. Sɛ medannan me ti a, program bi wɔ kɔmputa no so a etumi hu nea mepɛ sɛ meyɛ wɔ so, na ayɛ ama me. Mewie no, na mabrɛ sei tam, nanso saa program no ma mitumi sua Bible, na ɛma mitumi kyerɛw lɛtɛ ne e-mail kɔka anidaso a mewɔ no ho asɛm kyerɛ nkurɔfo. Mewɔ bɔɔd bi wɔ hɔ a kasa nkyerɛwde wɔ so, na ɛno na ɛma mitumi ne nkurɔfo di nkitaho. Obi ba me nkyɛn na mepɛ sɛ meka biribi a, ɔde ne nsa sisi nkyerɛwde no so mmaako mmaako. Sɛ ɛyɛ nkyerɛwde a merepɛ no a, na makata m’ani. Sɛ ɛnyɛ nea merepɛ no a, na mabue m’ani hãã. Yɛyɛ no saa ara kosi sɛ yebenya nsɛmfua ne kasamu. Seesei anuanom mmea a wɔtaa ba me nkyɛn no, wɔn mu binom wɔ hɔ a, minnya nkasa nwiei mpo, na wɔahu nea merepɛ akyerɛ. Nanso ɛtɔ da a, na afa nkyɛn na yɛn nyinaa de ayɛ serew.

 “Nneɛma a asafo no yɛ no, meyɛ bi a, ɛma m’ani gye. Adesua biara mekɔnɛte tie bi, na seesei mpo de, mihu nea ɛrekɔ so wɔ video so. Mitumi kyerɛw mmuae a mɛma, enti edu adesua no fã a wobisabisa nsɛm no a, na obi akenkan me mmuae no ama me. Afei nso, ɛyɛ a me ne Adansefo kakraa bi kɔnɛte hwɛ JW Broadcasting dwumadi a ɛba bosome biara no. a

 “Bɛyɛ mfe 23 ni na mayare locked-in syndrome yare no. Ɛtɔ da a na me werɛ ahow. Nanso nea ɛboa me ne sɛ, ɛba saa a mebɔ mpae, me ne anuanom bɔ, na meyere me ho sɛ mɛsom Yehowa. Anigyesɛm ne sɛ, m’asafo mufo aboa me ama matumi ayɛ akwampaefo boafo adwuma no mfe nsia. Mabɔ mmɔden sɛ metwa sa pa ama me babarima Alessandro. Seesei waware, na ɔyɛ asafo mu panyin. Ɔne ne yere nyinaa yɛ daa akwampaefo.

 “Ɛyɛ a metaa dwen nneɛma a daakye metumi ayɛ wɔ paradise ho. Ade a edi kan a mepɛ sɛ meyɛ ne sɛ mede me ara me nne bɛka Yehowa ho asɛm. Mekɔ hɔ a, metu mpase afa nsu a ɛsen fa hɔ no ho na mahwɛ sɛnea asaase no yɛ fɛ fa. Afei nso, mfe 20 ni, aduan a midi nyinaa yɛ nsunsu, na dorobɛn na wɔde fa mu ma me. Enti merehwɛ kwan paa sɛ mɛtew aprɛ na madi. Esiane sɛ mifi Italy nti, ade foforo nso a merehwɛ kwan ne sɛ metumi ayɛ Italyfo nnuan a m’ani gye ho te sɛ pizza na madi!

 “‘Nkwagye anidaso no” nso abɔ m’adwene ho ban. (1 Tesalonikafo 5:8) Ɛwom sɛ nneɛma pii wɔ hɔ a seesei mintumi nyɛ, nanso sɛ mede m’adwene bu sɛ mewɔ wiase foforo no mu a, m’ani gye paa. Migye di sɛ, daakye a enni akyiri koraa, me yare no begyae. Merehwɛ kwan denneennen sɛ, ‘nkwa ankasa’ a Yehowa ahyɛ bɔ sɛ ɔnam n’Ahenni no so de bɛba no, me nso menya bi.”—1 Timoteo 6:19; Mateo 6:9, 10.