Afe 2017 mu no, Yehowa Adansefo dumien bi de ɔkorow sii nsu so de wɔn ani kyerɛɛ Nicaragua kurow bi a ɛda mpoano. Wɔfrɛ hɔ Mosquito (Miskito). Ná wɔn korow no din de Sturi Yamni. Ɔkorow no mu adwumayɛfo no baako a ne din Stephen kaa sɛ, “Ná yɛrekɔ akɔhyɛ Adansefo kuw ketewa bi a wɔte akyirikyiri nkuran na yɛaboa wɔn ama wɔaka asɛmpa no wɔ wɔn asaasesin kɛse no mu.”

 Adansefo 12 no siim fii Pearl Lagoon faa Río Grande de Matagalpa nsu no so. Ná wobetwa kilomita 200 (akwansin 125) ansa na wɔadu baabi a wɔrekɔ no. Ɔkorow a wɔte mu no, na ne din kyerɛ “Asɛmpa” wɔ Miskito kasa mu, na na wonnim sɛ sɛɛ ɛrebɛyɛ adwuma bi a ɛne ne din no sɛ ama nkurow a egu nsu no ano no. Adansefo no rekɔ no, wɔdaa kurow baako so maa ade kyee. Sɛ wotew nnɔnhwerew a wɔde daa hɔ no fi mu a, anuanom no de bɛyɛ nnɔnhwerew 12 na ekoduu La Cruz de Río Grande kurow no mu. Adansefo nsia a wɔwɔ kurow no so no nso de anigye maa wɔn nuanom Kristofo a wɔabɛsra wɔn no akwaaba.

 Anadwo no, asɛnkɛse bi sii. Mframa kɛse bi bɔ maa nsu tɔe denneennen wɔ Río Grande de Matagalpa asubɔnten no ti. Nnɔnhwerew kakraa bi akyi, nsu no yiri baa kurom. Ɛkɔɔ so yirii bɛyɛ nnanu. Nsu no yiri kɔɔ Ahenni Asa no so ne afie pii mu wɔ La Cruz. Adansefo a wɔabɛsra wɔn nuanom no boaa kurom hɔfo maa wotu fii wɔn afie mu. Wɔn a wotui no mu dodow no ara kɔdaa Ɔdansefo bi aborosan so nnanu.

 Ne nnansa so no, La Cruz kurow no panyin baa Adansefo a wɔabɛsra wɔn nuanom no hɔ anadwo bɛka kyerɛɛ wɔn sɛ ohia wɔn mmoa. Esiane sɛ Adansefo no korow a yɛfrɛ no Sturi Yamni no pɛ na na ɛwɔ ahoɔden a ebetumi afa asubɔnten a ayiri no so nti, na kurow panyin no pɛ sɛ anuanom no de fa atoyerɛnkyɛm aboafo kuw bi ma wɔde nneɛma kɔma nkurow afoforo a ɛwɔ asubɔnten no ho no. Adansefo no ampopo wɔn ti koraa.

 Ade kyee anɔpa no, Adansefo baasa ne atoyerɛnkyɛm aboafo no siim kɔe. Stephen kaa nea esii no ho asɛm sɛ: “Saa bere no, na asubɔnten no rehuru, na nnua akɛse a ase atutu gugu nsu no ani. Edu baabi nso a, na nsu no afã bi retwa ne ho frɛdɛfrɛdɛ te sɛ nea amena da hɔ, na mmirika a na nsu no de retene no, na etumi twa bɛboro kilomita 18 dɔnhwerew biara [akwansin 11].” Ɔhaw yi nyinaa akyi no, korow no tumi kɔɔ nkurow mmiɛnsa so.

 Akwannya a Adansefo mmiɛnsa no nyae no, wɔde kyekyee wɔn a na wɔtete nkuraase a wɔn ho aka no werɛ. Afei Nyan! a ɛbaa afe 2017 a n’asɛmti ne “Atoyerɛnkyɛm Si a Nea Wobɛyɛ De Agye Wo Ho Ne Afoforo” no, wɔkyekyɛɛ bi maa wɔn.

 Sɛnea Adansefo no boaa nnipa a wɔtete asubɔnten no ho na wɔmaa wɔn awerɛkyekyesɛm a efi Bible mu no, wɔn ani sɔe paa. Wɔn a wɔtete nkuraase no bi kaa sɛ, “Wohu sɛ nkurɔfo akɔ ahokyere mu a, wɔboa wɔn.” Ebinom nso kaa sɛ: “Yɛreka wɔn a wɔdɔ wɔn yɔnko paa a, ɛyɛ wɔn.” Esiane sɛ nkurɔfo huu sɛnea Adansefo no boaa wɔn nuanom ne afoforo wɔ nkuraa no ase nti, ama afei wɔn mu pii afi ase retie awerɛkyekyesɛm a efi Bible mu no.