“Kana imwimwi mecitenda kuti Bhaibheri i soko ra Mwari ku anhu, hino zvinoreya kuti Mwari ari kureketa na isusu . . . Kana manamatiro enyu ecibata-bata upenyu wenyu wese, hino mureketero we Bhaibheri unodikana kugara wamunoseenzesa pa zuwa no zuwa.” Izvi ndizvona zvakatarhwa no muzii umweni we Bhaibheri unozwi Alan S. Duthie mu bhuku rake rinozwi Bible Translations and How to Choose Between Them.

Anhu anoda Soko ra Mwari anozvitendera no mwoyo wese. Awona anotenda no mwoyo wese kuti “Matarhwa ese akafemerhwa na Mwari uye anobetsera pa kufundisa, pa kusumurura, pa kugadzirisa zviro, pa kupanga zve unatsi.” (2 Timoti 3:16) I zvirokwazvo kuti Bhaibheri i bhuku rekare, asi irona ‘ripenyu uye rino simba,’ rinobetsera anhu pakurhwisana no zvinetso zvawo zve zuwa no zuwa. (Ahebheru 4:12) Kuti anhu akwanise kuerenga nokuzwisisa bhuku iri ra Mwari, irona rinodikana kugara mu mureketero we zuwa no zuwa kuti rierengwe nokuzwisiswa no anhu ese.

Ndiyo ndaa anhu anoda Soko ra Mwari, ari kupfara ngekubudiswa ke BHAIBHERI – MATEU mu mureketero we Ciutee. Mu zuwa ra 26 ya Junho ya 2022 Apupuri a Djehovha akaziisa kubudiswa ke bhuku ra Mateu mu mureketero we mazuwa ano. Urongwa uu wakapangidzwa mu JW Stream, pa Terevhizori uye wakapeperuswa mu maradhiyo akawanda. Hama Marcelo dos Santos, nhengo ye Dare re Firiyari ye Moçambique ndiwo akaziisa nge zve kubudiswa ke bhuku iri. Aparidzi anodarika 500 e mureketero we Ciutee akapfara maningi paakatambira Evhangeri ra Mateu rakaturikirhwa mu mureketero we zuwa no zuwa. Bhuku iri rakaturikirhwa nge mushobo wakadjeka uye wakagondeka, recibetsera anhu kuzwisisa Soko ra Mwari nge mushobo wainga usati wakambooneka mu mureketero we Ciutee. Pamweni mungadzibvunzisa kuti, zvakakwanisika kudini kuturikira bhuku iri re Bhaibheri nge mushobo unoshamisa?

Kunyazi hazvo Bhaibheri re Nyika Ipsva re Matarhwa e Cigrego e Cikristu rainga risati raoneka ku areketi e Tewe, irona rainga raayo kubvira mu gore ra 1950. Mu nguwa ii rakabudiswa mu Cingezi nge Associaçao Torre de Vigia de Bíblias e Tratados, iri i sangano re nyika yese re Bhaibheri raano makore akawanda reciseenza no Mabhaibheri. Murindiri wa 15 ya Setembro wa 1950 mu Cingezi, wakati: “Anhu anobatanidzwa pa dare rakaturikira Bhaibheri iri, akapangidza pamhene kuti aida kurumbwa asikaziikanwi, maka-maka ainga asikadi kuti mazina awo aziiswe paainga aciri apenyu kunyazi mumasure me kufa. Cinangwa ce turikiro ii nge ce kukudza zina ra Mwari mupenyu, Mwari we cokwadi.”

Edhisao yekutanga ye Bhaibheri re Nyika Ipsva re Matarhwa Macena re mutero, rakabudiswa muna 1961. Kunyazi mazina e aturikiri e Bhaibheri irona akarumbwa asikaziikanwi dakara na nyamasi uno, apana mubvunzo kuti awona ainga ano zvinangwa zvakanaka uye kudzipira kuna Mwari. Masoko e kutanga e edhisao ya 2013 yakati: “Teciziya nge zve kukosha ke masoko e Bhaibheri, cinangwa cedu cainga cekuti tibudise Bhaibheri rinozwisisika uye riri nyore kuerenga tisikacinji masoko aro akafemerhwa.”

Dakara zvino, makopiya anodarika 240 000 000 e Bhaibheri re Nyika Ipsva rese kana kuti mu matii aro akadhindwa mu nyika yese mu mireketero inodarika 220. Aerengi aro akaonei?

Djesu akafundisa afundi ake kunamata kuti: “Baba edu muri kudenga, zina renyu ngariceneswe.” (Mateu 6:9) Bhaibheri rinodainza Mwari nge zina rake kamare rokuti Djehovha kanokwana ka 7000. (Ekisodho 3:15; Pisarema 83:18) Mu masure mekufa ke aphostori a Djesu, ungano ye Cikristu yakatanga kugara no marangariro akashata e Adjudha akawanda ekuti ainga asikadikani kuseenzesa zina ra Mwari. (Zviito 20:29, 30; 1 Timoti 4:1) Anhu aikopiyari Matarhwa e Cigrego akatanga kutsiya zina ra Mwari pacake rokuti Djehovha nge masoko anoreya kuti “Mwari” uye “Tenzi.”

Dare re Turikiro ye Bhaibheri re Nyika Ipsva rakahwirinza zina rokuti Djehovha mu Matarhwa e Cigrego e Cikristu *. Zina iri rinooneka kanokwana 237. Kuhwirinzira uku akutsamiri pa zvido zve aturikiri, asi kunotsamira pa zvikonzero zvinokosha uye psvakisiso dzakanyasa kuizwa. Ngo muezaniso, Ruka 4:18 yakatorerhwa pa masoko ari pana Isaya 61:1. Mu Matarhwa akafemerhwa e Cihebheru, zina ra Mwari rinooneka pa vhersikuro ii ya Isaya. Ndiyo ndaa pane cikonzero cakanaka cekuti mu Bhaibheri re Nyika Ipsva, pana Ruka 4:18 yakaturikirhwa kuti: “Mwiya wa Djehovha uri pandiri, ngekuti akandidzodza kuti ndiziise masoko akanaka ku arombo.”

Mushobo uu wekuturikira unobetsera aerengi kusiyanisa Djehovha Mwari no Mwana wake akabarhwa ari ega, Djesu Kristu. Ngo muezaniso, Mabhaibheri akawanda akaturikira bhuku ra Mateu 22:44 kudai: “Tenzi akati kuna Tenzi wangu.” (Versão Rei Jaime) Hino ndiyani uri kureketa na ani? Zvezvirokwazvo vhersikuro ii yakatorerhwa pa masoko ari pana Pisarema 110:1, yokuti mu tsamba ye Cihebheru yakafemerhwa ino zina ra Mwari. Ndiyo ndaa Bhaibheri re Nyika Ipsva pana Mateu 22:44 rakaturikirhwa kuti: “Djehovha akati kuna Tenzi wangu.” Musiyano uripo pakati pa Djehovha Mwari no Mwana wake unokosha. (Marko 13:32; Juau 8:17, 18; 14:28) Tinodikana kuzwisisa musiyano uu kuti tiponeswe. Bhuku ra Zviito 2:21 rinoti: “Munhu wese anodainza zina ra Djehovha acaponeswa.”

Pakaizwa zviri zvese kuti tsamba yakafemerhwa ye Cigrego iturikirhwe nge mushobo we zvirokwazvo, wakagondeka uye uri nyore kuzwisisa mu mureketero we mazuwa ano. Hinga muezaniso, Bhaibheri re Nyika Ipsva rakapeta masimba kuti ripangidze mushobo unoseenzeswa mavherbho e mureketero we Cigregro. Mu mireketero yakawanda mavherbho anoseenzeswa kuti apangidze nguwa yakaitika kana kuti inoitika zviro: Zvakaitika kare, zviri kuitika zvino uye zvicaitika mu nguwa ye mberi. Mu Cigrego mavherbho anoseenzeswawo kuti apangidze mushobo we zviro zviri kuitika: Ciro cinoitika ke nguwa doko, ciro cakaitika uye ciro cinondorumbwa ceciitika. Onai masoko a Djesu ari pana Mateu 6:33. Vherbho ye Cigrego ye soko rokuti “kupsvaka” rinopangidza ciro cinondorumbwa ceciitika. Masoko a Djesu anonyasa kuzwisisika zvaanoreya kana akaturikirhwa nge mushobo uu: “Hino, rumbwai mecitanga kupsvaka Umambo wa Mwari no unatsi wake, uye zviro zvimweni zvese izvi, zvicatunhudzirhwa kamuri.” Nge mushobo umwewo, Mateu 7:7 yakaturikirhwa kudai: “Rumbwai mecikumbira uye mucapaswa, rumbwai mecipsvaka uye mucaona, rumbwai mecigogodza uye mucafungurirhwa.”—Aroma 1:32; 6:2; Agaratiya 5:15.

Kubudiswa ke bhuku iri ra Mateu mu mureketero we Tewe i maambo. Pakaizwa urongwa wekuturikira Matarhwa e Cigrego e Cikristu pa nguwa inoteera. Kodi aerengi e Bhaibheri iri re mureketero we Tewe angagara no rugondo rokuti ari kuerenga turikiro ye zvirokwazvo uye iri nyore kuzwisisa kuita hingana mureketero we Cingezi?

Honde. Tino rugundo irona ngekuti basa re kuturikira rakanyasa kuonererhwa no Dare Rinotungamirira re Apupuri a Djehovha. No ungwaru, pakaizwa urongwa kuti kuturikirhwa ke Bhaibheri kuizwe nge cikwata ce hama. (Zvierengo 11:14) Ngokudaro zvikwata zvekuturikira zvakaumbwa mu nyika yese. Ku Maskritoriyo Makuru e Apupuri a Djehovha kakaumbwa dhepartamento rinozwi Mabasa e Kuturikira, kuti abetsere zvinodiwa no aturikiri aya kuti adaire mibvunzo dze aturikiri uye kuti turikiro ye Bhaibheri re Nyika Ipsva ye mureketero dzakasiyana-siyana ipindirane. Kusiya izvona pakaizwa programa ye komputadhori inozwi Sistema de Tradução da Torre de Vigia kuti ibetsere aturikiri e Bhaibheri. Pano zvakawanda zvinoizwa no programa ii, iyona inopangidzawo kuti masoko e Cihebheru no Cigrego akaturikirhwa kudini mu Cingezi, izvona zvinobetsera maningi aturikiri kuti asanangure masoko akaezana mu mureketero wawo. Mungagara no rugondo rokuti kunyazi zvakadaro anhu anoita basa rokuturikira anodikana kupeta masimba. Asi maprograma e pa komputadhori anobetsera aturikiri e Bhaibheri kuti agumire zvinangwa zvinodiwa zvekuturikira Bhaibheri re Nyika Ipsva re zvirokwazvo uye riri nyore kuzwisisa hingana zvakaita turikiro ye Bhaibheri mu mureketero we Cingezi.

Tinomukohomedzesai kuti muongorore bhuku ra Mateu. Munokwanisa kurierenga pa interneti kana kuti mu aprikativho ye JW Library, uye mu nguwa doko iri kuuya mucakwanisa kuona makopiya akaizwa zvekudhindwa mu ungano ye Apupuri a Djehova iri padhuze nemwi. Imwimwi mucapfara ngo kuona zviro zvakawanda zvinoshamisa, zvakadai hinga kuita karo nyore pakuzwisisa, kutarhwa karo nge mushobo uri nyore kuerenga, uye mucapfarawo nge kuona dii rakazwi zviri mu bhuku uye ipona panopangidza zviro zvamucaona mu bhuku rimwe na rimwe re Bhaibheri uye dii irona rinobetsera kuona mavhersikuro amunoziya nokukasika, uye mucaona zviro zvinoshamisa zviri mu masoko e kutunhudzira. Asi cinonyanya kukosha ngecekuti imwimwi mucaerenga Bhaibheri rino no rugondo rekuti rinonyasa kupanganidza ngo mwazvo masoko a Mwari mu mureketero we zuwa no zuwa.