Anhu amweni anorangarira kuti Bhaibheri rinodikana kuturikirhwa soko rimwe na rimwe, zvecienderana no soko rimwe na imwe ro mureketero wariri kuturikirhwa, kuitira kuti munhu aizorierenga anyase kuzwisisa mireketero yarakatanga kutarhwa naro. Asi izvona azviitiki nguwa dzese. Onai zvikonzero zvinganani:

• Apana mireketero miiri yakanyasa kuezana pa mareketero, pa masoko aanoseenzesa, uye pa matarirhwe ayo. Mufundisi umweni we Cihebheru unozwi S. R. Driver, wakatara kuti “mireketero inosiyana haiwa basi pa mareketero uye pamatangiro ayakaita, asiwo . . . pa mabatanidzirhwe anoizwa nzero kuti pabude soko.” Marangariro e anhu anosiyana maererano no mureketero umwe na umwe. Mufundisi Driver unoenderera eciti: “Hino matarirhwe anoizwa masoko anosiyana-siyana maererano no mureketero umwe na umwe.”

• Apana mureketero we mazuwa ano unonyasa kuenderana pa mareketero uye masoko pa mureketero we Cihebheru, Ciaramaiko, uye Cigrego yakaseenzeswa pa kutara Bhaibheri. Ndiyo ndaa, turikiro ye soko no soko yaizoshupha kuzwisisa uye yaizokwanisa kuita kuti munhu agume pa kuzwisisa zvisirizvopi.

•   Zvinoreya masoko zvingakwanisa kusiyana zvecienderana no paanonga aseenzeswa.

Izvirokwazvo kuti muturikiri pamweni ungakwanisa kuturikira soko no soko pa masoko manganani pa masoko e mureketero wokutanga, asi unodikana kunyasa kungwarira.

Onai miezaniso minganani inopangidza kuti kuturikira soko no soko kungakwanisa kudini kufundisa zvisirizvopi:

• Matarhwa anoseenzesa soko rokuti “kuwata” ecida kureya kuwata ke “kubathwa no hope” uye kuwata mu rufu. (Mateu 28:13; Zviito 7:60) Soko iri parinoseenzeswa recida kureya ngezve rufu, aturikiri e Bhaibheri angaseenzesa soko rokuti “kuwata mu rufu,” izvi zvinoita kuti muerengi asarangarire zvimweni.—1 Akorinti 7:39; 1 Atesaronika 4:13; 2 Pedru 3:4.

• Pana Aefeso 4:14, muphostori Pauro wakaseenzesa soko rokuti kana rikaturikirhwa soko no soko, ringakwanisa kureya “kutamba anhu cabutha.” Masoko aya aibva pa soko re kare rinotsamira pa kucengedzwa kaiizwa anhu nge kutamba cabutha. Pa mireketero yakawanda ye mazuwa ano, kana masoko aya akaturikirhwa soko no soko ainga asikazonyasi kuzwisisika. Hino, kuturikira masoko aya nge masoko okuti “mazano akashata e anhu,” zviri nyore kuzwisisa.

• Pana Aroma 12:11, pakaseenzeswa soko re Cigrego, kana rikaturikirhwa soko no soko, rinoreya “mwiya unopipira.” Mu Ciutee, masoko aya aabudisi zvinonga zvecidikanwa kamare, ndiyo ndaa pakaseenzeswa masoko okuti “pipirai mu mwiya.”

• Pa Mharidzo yake ye pa Dunhu, Djesu akaseenzesa soko rokuti kakawanda kakhona rinoturikirhwa kuti “Akakomborerhwa arombo pa mwiya.” (Mateu 5:3, Versão Rei Jaime) Asi mu mireketero yakawanda, kuturikira masoko aya soko no soko azvinyasi kudjeka. Nguwa dzimweni, kana masoko okuti “arombo mu mwiya” akaturikirhwa hinga zvaakaita kamare, angakwanisa kureya munhu uno marangariro asikazi kunyasa kukwana, kana kuti angareya munhu usikaiti zviro zvinopangidza kuti uno simba kana kuti cido. Asi ipona, Djesu aifundisa kuti mupfaro we anhu autsamiri basi pa kugutsa zvido  zvawo zve ku nyama, asi unotsamira pa kuziya kuti anoda kutungamirirhwa na Mwari. (Ruka 6:20) Hino, turikiro yekuti “aya anoziya kuti anoda kutungamirirhwa na Mwari” kana kuti “aya anoziya kuti anoda Mwari” inonyasa kubudisa fundo riri kudiwa kamare.—Mateu 5:3; Bíblia Fácil de Ler.

Tecirangarira ngezve nzero ii, kuturikira Bhaibheri akutsamiri basi pa kundoturikira soko mu mureketero warakatanga kutarhwa naro weciseenzesa soko rimwerimwero pese parinonga recioneka. Muturikiri anodikana kunyasa kungwarira kuti asanangure masoko mu mureketero waari kuturikira, masoko anonyasa kubudisa nzero iri mu mureketero wakatarhwa Bhaibheri. Kusiya izvona, muturikiri anodikana kuturikira ecitsamira pa zvinodiwa mu mureketero waari kuturikira, kuitira kuti zvaari kuturikira zvigare nyore kuerenga.

Pa nguwa imweyo, zvinokosha maningi kutama kunyanyisa pa kutunhudzira kana kuti kubvisa masoko paanonga eciturikira. Kana muturikiri akanyanya kuseenzesa mazwisisire aanoita tsamba, iyena angakwanisa kuturikira zviro zvisiripi izvona. Muturikiri ungakwanisa kutara zviro zvaanonga ecirangarira kuti ndizvo zvazviri kureya kana kuti angakwanisa kusiya nzero dzimweni dzinokosha dziri mu mureketero warakatanga kutarhwa nawo. Ngokudaro, kunyazi hazvo turikiro dzakabviswa kana kutunhudzirhwa masoko dziri nyore kuerenga, pamweni paya mushobo wadzakaturikirhwa zvingakwanisa kuita kuti muerengi asazwisise zvaidikana kuzwisiswa kamare.

Zviri nyore kuti muturikiri akande fundiso dze magereja paanonga eciita basa re kuturikira. Ngo muezaniso, Mateu 7:13 inoti: “Musuwo wakapamhama unoendesa mu kutsakatiswa.” Aturikiri amweni, ecitungamirirhwa no zvinotendwa no magereja awo, akaseenzesa pa tsamba ii soko rekuti “rindi ro muriro” pane rekuti “kutsakatisa,” iro rinonyasa kubudisa pamhene zvaida kureiwa no soko ro Cigrego.

Muturikiri we Bhaibheri anodikanawo kuziya kuti Bhaibheri rakatarhwa mu mureketero wairekethwa zuwa no zuwa no anhu akadai hinga arimi, aushi e mabira, uye aedzi e howe. (Neemiya 8:8, 12; Zviito 4:13) Hino, kuti zvibhuiwe kuti Bhaibheri rakaturikirhwa zvakanaka, masoko akhona anodikana kuzwisiswa zviri nyore no anhu, pasinei nokuti anhuwo akaita kudini. Seenzesai masoko akanyasa kudjeka, ari nyore uye asikashuphi kuzwisisa, pane kuti museenzese masoko asikanyanyi kuseenzeswa nge anhu akawanda.

Aturikiri akawanda e Bhaibheri akaita cisananguro ce kubvisa zina ra Mwari, rokuti Djehovha pasina cikonzero, kunyazi hazvo  zina irona recioneka mu matarhwa ekare e Bhaibheri. (Onai Apendisi A5.) Turikiro dzakawanda dzinocinja zina ra Mwari nge zina re kureremedza rakadai hinga “Tenzi,” uye amweni anotoita kuti anhu arangarire kuti Mwari aana zina. Ngo muezaniso, mu turikiro dzimweni, pa dii ro munamato wa Djesu wakatarhwa pana Juau 17:26, dzinoti: “Ndakamuziisai kaari,” uye Juau 17:6, pakazwi: “Ndakaita kuti muziikanwe no aya amakandipasa pa nyika.” Asi, turikiro yakagondeka ye masoko e munamato wa Djesu nge yekuti: “Ndakaaziisa zina renyu,” uye “Ndakaita kuti anhu amakandipasa pa nyika aziye zina renyu.”

Hinga zvakatarhwa pa masoko e kutanga e Bhaibheri re Cingezi rakatanga kuturikirhwa ro Bhaibheri re Nyika Ipsva, panoti: “Atiturikiri Matarhwa teciita hinga kuti tiri kutarazve papsva. Tinopeta masimba kuti titurikire soko no soko pese pazvinonga zvecibvira maererano no mureketero we Cingezi we mazuwa ano uye kana turikiro ye soko no soko ikatama kubvisa nzero yakhona.” Ngo kuita izvona, Dare ro Kuturikira ro Bhaibheri re Nyika Ipsva rakapeta masimba ari ese kuti rigare no maonero ari pakati no pakati pa kuseenzesa masoko anonyasa kuenderana no masoko akaseenzeswa pakutanga, uye pa nguwa imweyo, eciedza kuti asabvise kana kutunhudzira masoko anoita kuti pasazwisisike kana kuti anoita kuti nzero yakhona isabude pamhene. Mugumisiro wakhona nge wekuti Bhaibheri ringakwanisa kuerengwa zviri nyore uye muerengi ungakwanisa kunyasa kugonda kuti soko rakafemerhwa, rakaturikirhwa zvakanyasa kudjeka.—1 Atesaronika 2:13.