Bhaibheri re Nyika Ipsva re Matarhwa e Cigrego e Cikristu, rakabudiswa mu Cingezi mu gore ra 1950, uye Bhaibheri re Nyika Ipsva re Matarhwa Macena rakabudiswa mu gore ra 1961. Dakara zvino, mamiriyonji e anhu e mireketero inokwana 250 ari kubetsereka nge kuerenga Bhaibheri iri re Matarhwa Macena rakanyasa kudjeka uye risikashuphi kuerenga, rakaturikirhwa kubva mu mureketero wakaseenzeswa pa kutara Bhaibheri.

Dare re Kuturikira Bhaibheri re Nyika Ipsva rinoziya kuti zvinokosha maningi kuseenzesa mureketero unobaya mwoyo ye aerengi e mazuwa ano. Ndiyo ndaa, pano zviro zvakawanda zvakacinjwa pa matarirhwe uye pa masoko akaseenzeswa mu turikiro ino, zvecitsamira pa zvikonzero zvinoteera:

• Kuseenzeswa ke masoko e mazuwa ano uye anozwisisika. Mu mabhuku edu e Ciutee, soko re Cigrego rokuti “porneía,” kareko raiturikirhwa kuti “useki.” Asi mu Bhaibheri rino, mu mbuto dzakawanda rakaturikirhwa kuti “uhure,” ngokuti ndirona soko rinoseenzeswa no anhu akawanda kana ecireketa ngezve anhu anoita zvepamaponde zvisikatenderhwi.

  Mu Bhaibheri re Ciutee rinozwi Soko Rakanaka ne Zviito zve Apostori rakabudiswa mu gore ra 1993, rinoseenzesa soko rokuti “djerekete” pa soko re Ciputukezi rokuti “deserto.” Asi mu Bhaibheri rino, soko irona rakaturikirhwa kuti “renje,” ngokuti ndirona rinoziikanwa no anhu akawanda. Mu Bhaibheri rimwero, makaseenzeswa masoko okuti “djikitira guru re anhu” pa soko re Ciputukezi rokuti “grande multidão.” Asi mu Bhaibheri rino, pakaseenzeswa masoko okuti “anhu akawanda,” ngokuti ndiro rinonyanya kuziikanwa nge anhu akawanda e mazuwa ano.

• Masoko e Bhaibheri akanyasa kudjekeswa. Masoko amweni akaseenzeswa mu Turikiro yo Bhaibheri re Nyika Ipsva ro Cishona ro kare, kakawanda kakhona aidikana kupanganidzwa kuti anyase kuzwisisika. Ngo muezaniso, soko re Cihebheru rokuti “Sheori” uye ro Cigrego rokuti “Hadhesi” anoseenzeswa mu Bhaibheri ecida kureya ngezve rindi re anhu ese. Masoko aya aaziikanwi nge anhu akawanda uye soko rokuti “Hadhesi” rino zviro zviiri zvarinoreya zvecitsamira pakuseenzeswa karinoizwa mu fundiso dze Cigrego. Hino, masoko mairi aya akatsiiwa no soko rokuti “Guwa,” ngokuti ndiro raizwisiswa no atari e Bhaibheri. Masoko aya ekuti “Sheori” uye “Hadhesi”  pari zvino anooneka pa masoko epasi.—Ruka 16:23; Zviito 2:27.

  Soko re Cihebheru rokuti neʹphesh uye soko re Cigrego rokuti psy·kheʹ akaturikirhwa nge mushobo umwewo kuti “mwiya.” Nge ndaa ye kutama kunyasa kuzwisisika kunoizwa soko iri rokuti “mwiya,” maturikire aya akabetsera muerengi kuti aone mushobo wakaseenzesa atari e Bhaibheri akafemerhwa, masoko e mu mureketero wekutanga. Maererano no zvinonga zvecirekethwa, masoko aya angareya (1) munhu, (2) upenyu we munhu, (3) zvisikwa zvipenyu, (4) zvido zve munhu, kana kuti pamweni paya (5) munhu akafa. Hino, sezvo soko rokuti “mwiya” risikanyanyi kuseenzeswa mu Ciutee, pakasanangurhwa kuti masoko aya e mu mureketero wekutanga aturikirhwe maererano no zvinonga zvecireiwa, kakawanda kakhona panokandwa masoko epasi, anoti “Kana kuti ‘mwiya.’” (Onai miezaniso iri pana Genesi 1:20; 2:7; Revhitiko 19:28; Pisarema 3:2; Zvierengo 16:26; Mateu 6:25.)

Bhaibheri rino, rino masoko e pasi akawanda. Akawanda akhona akarongwa nge mushobo unoteera:

• “Kana kuti” Mushobo umweni waikwanisa kuturikirhwa kubva mu Cihebheru, Ciaramaiko, kana kuti Cigrego waibudisa marangariro amwewo.—Aroma 12:3, masoko e pasi “wakakowaniswa”; Juau 5:8, “makha.”

• “Mabhaibheri amweni anoti” Aya i masoko akanaka angakwanisa kuseenzeswa pa kuturikira, asi ecireya zviro zvakasiyana no zvinonga zviripo.—Agaratiya 5:14, “unobatanidza”; Afiripi 3:7, “ndakasanangura kuzvisiya.”

• “Cigrego” Turikiro ye soko no soko kubva mu Cihebheru, Ciaramaiko, kana kuti mu Cigrego; kana kuti i nzero yakatorhwa hinga zvayakaita mu mirekero yokutanga.—Aroma 11:1, “mbeu”; Juau 13:23, “pa dii ra.”

Mu mapajina ekutanga e Bhaibheri rino tinogumira musoro unoti: “Masoko Ekutanga e Soko ra Mwari.” Pa musoro uu, munogumira fundiso dzinganani dzokutanga dzo Bhaibheri. Mu mapajina ekupedzesera e Bhaibheri rino, mumasure me bhuku ra Zvakapangidzwa, munogumira misoro inoti: “Bhokisi re Mabhuku e Bhaibheri,” uye “Kupanganidzwa ke Masoko e Bhaibheri.” Musoro unoti Kupanganidzwa ke Masoko, unobetsera muerengi kuti azwisise masoko manganani akaseenzeswa mu Bhaibheri maererano no maseenzeserhwe awo. Apendisi ino misoro inoti: “Maturikirirhwe Anoizwa Bhaibheri,” “ Zvakaita Bhaibheri Rino,” “Bhaibheri Rakaguma Kudini Katiri,” “Zina ra Mwari mu Matarhwa  e Cigrego e Cikristu,” uye “Zviitiko Zvinokosha zve Upenyu wa Djesu pa Nyika.” Tinogumirawo mamapa, no masoko amweniwo anobetsera anhu anoda kuerenga Bhaibheri ecipsvakisisa.

Panotangira bhuku rimwe na rimwe remu Bhaibheri, pano masoko anopangidza zviri mu kapituro imwe na imwe ye bhuku irona pamwepo no mavhersikuro akhona, izvona zvinobetsera muerengi kuona zviri mu bhuku rese. Pakati pe pajina imwe na imwe pano mundandanda we mabhii anoenderana no zviri mu mavhersikuro amweni emu Bhaibheri.