Tsamba Yekutanga ku Akorinti 10:1-33
10 Hama, ndinoda kuti muziye kuti madzitsekuru edu ese akahamba pasi pe makuta uye ese akadarika no mubahari,
2 ese akabhabhatidzwa muna Mozesi pa nguwa yaainga ari pasi pe makuta uye paakadarika no mubahari,
3 ese akarhya zvokurhya zve kumwiya zvakaezana
4 uye ese akamwa mvura ye kumwiya yakaezana. Ngokuti akamwa mvura yakabuda pa buwe ro kumwiya raiateera, uye buwe irona raiimirira* Kristu.
5 Kunyazi zvakadaro, Mwari aazi kupfadzwa no akawanda awo, ndiyo ndaa awona akafira mu renje.*
6 Zviro izvi zvakagara muezaniso katiri, kuti titame kuda kuita zviro zvakashata, hinga zvaakaita.
7 Musanamate zvidhori, hinga zvakaizwa no amweni awo; hinga kutarhwa kazvakaizwa kuti: “Anhu akagara pasi otanga kurhya no kumwa. Pedzepo akamuka otanga kutamba.”
8 Ngatisaite uhure,* hinga uhure* wakaizwa no amweni awo, akazofa 23 000 pa zuwa rimwe basi.
9 Atidikani kuedza Djehovha, hinga zvakaizwa nge amweni awo akamuedza, akazofa nge kurumwa ngo nyoka.
10 Musagurungute, hinga zvakaizwa no amweni awo akagurunguta, akazouraiwa ngo mutsakatisi.
11 Zviro izvi zvakaitika kare kuti zvigare muezaniso katiri, uye zvakatarhwa kuti zvitingwadze isusu tiri kurarama ku magumo e nyika ino.
12 Hino uya unorangarira kuti wakaima, ngaangwarire kuti asambwere.
13 Apana muedzo wakauya kamuri kunza ke iya inogara yecisongana no anhu ese. Asi Mwari akagondeka, uye aazomusii meciedzwa kupinda zvamunokwanisa kushingirira; asi pamunonga meciedzwa, Mwari acamupsvakirai gwanza rekubuda naro kuti mukwanise kushingirira.
14 Hino hama dzangu dzinodiwa, tizai kunamata zvidhori.
15 Ndiri kureketa na imwimwi ndeciziya kuti muri anhu anokwanisa kusiyanisa zviro; dzionerei mwega zvandiri kureketa.
16 Kopo yatinoitira munamato kuti ikomborerhwe, aireyi kuti tiri kubatanidzwa mu ngazi ya Kristu here? Pau yatinogura, aireyi kuti tiri kubatanidzwa mu mwiri wa Kristu here?
17 Sezvo kuno pau imwe basi, kunyazi takawanda, isusu tiri mwiri umwe basi, ngokuti tese tinorhya pau iyona imwe basi.
18 Rangarirai ngezve Aisraeri e pa nyama: Aaripi kubatanidzwa no artari paanonga ecirhya zvakapirhwa here?
19 Hino ndiri kuda kureyei? Ndiri kuda kureya kuti ciro cakapirhwa ku zvidhori cinokosha, kana kuti cidhori cinokosha?
20 Haiwa; asi ndinoti zviro zvinopirhwa no anhu e madzinza amweni, awona anozvipira ku madhimoni, haiwa kuna Mwari; uye inini andidi kuti imwimwi mubatane no madhimoni.
21 Imwimwi amudikani kumwira mu kopo ya Djehovha uye mu kopo ye madhimoni; amudikani kurhyira “pa meza ya Djehovha” no ye madhimoni.
22 Kureya kuti ‘isusu tiri kuda kuti Djehovha agare no shanje here?’ Isusu takabamba kupinda iyena here?
23 Zviro zvese zvinotenderhwa, asi azviropi zvese zvinobetsera. Zviro zvese zvinotenderhwa, asi azviropi zvese zvinobambisa.
24 Umwe na umwe aadikani kurumbwa ecipsvaka zvakamunakira basi, asi zvakanakirawo amweni.
25 Irhyai zviro zvese zvinotengeswa mu bazari, musikadziiti mibvunzo nge ndaa yo hana yenyu,
26 ngokuti “nyika no zvese zvirimo ngezva Djehovha.”
27 Kana mukapikwa no munhu usikatendi uye imwimwi mecida kuendeyo, irhyai zviro zvese zvaanomupasai, musikaiti mibvunzo nge ndaa yo hana yenyu.
28 Asi kana munhu umweni akamubvunzai kuti: “Nyama ii yakapirhwa ku zvidhori,” musairhye nge ndaa ye munhu iyena ari kumubvunzai uye nge ndaa yo hana.
29 Andiripi kureya ngezve hana yenyu, asi ngezve hana yo munhu wamubvunzewo. Ngokuti ngei rusununguko rangu recidikana kutongwa no hana yo munhu umweni?
30 Kana ndecitenda* Mwari pandinonga ndecirhya, ngei ndecidikana kushorhwa nge ndaa ye zviro zvandinonga ndatenda?
31 Ngokudaro, kana mecirhya kana mecimwa, kunyazi kana meciita ciro cipi haco, itai zviro zvese kuti Mwari akudzwe.
32 Musagare ciro cinokuhunyisa ku Adjudha, ku Agrego kunyazi no ku ungano ya Mwari,
33 kuitawo hingana inini ndiri kuedza kupfadza anhu ese mu zviro zvese, ndisikapsvaki zvakandinakira basi, asi zvakanakirawo akawanda, kuitira kuti awona aponeswe.
Masoko ari pasi
^ Kana kuti: “rainga.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “ndeciita munamato kuna.”
