Akorinti Wekutanga 11:1-34
11 Nditeedzerei, hinga kuteedzera kandinoita Kristu.
2 Ndinomusimbai maningi, ngokuti munondirangarira pa zviro zvese uye munoita zviro zvese nge mushobo wandakamufundisai.
3 Asi ndinoda kuti muziye kuti musoro we mwanarume wese ndi Kristu; musoro we mwanakadzi ndi mwanarume; uye musoro wa Kristu ndi Mwari.
4 Mwanarume wese unoita munamato kana kuphorofita akapfeka ciro mu musoro make, unopsverusa musoro wake;
5 asi mwanakadzi wese unoita munamato kana kuphorofita asikazi kufukidza musoro wake unopsverusa musoro wake, ngokuti azvizi kusiyana no mwanakadzi wakacingwa zuda.
6 Ngokuti kana mwanakadzi akaramba kufukidza musoro wake, unodikana kucingwa; asi kudai zvecipsverusa kuti mwanakadzi acingwe kana kuti acingwe zuda, ngaafukidze musoro.
7 Mwanarume aadikani kufukidza musoro wake, ngokuti ndiena mufanikiso wa Mwari no rukudzo rake, asi mwanakadzi ndiena rukudzo ro mwanarume.
8 Ngokuti mwanarume aazi kubva pa mwanakadzi, asi mwanakadzi ndiena wakabva pa mwanarume.
9 Kusiya izvona, mwanarume aazi kusikirhwa mwanakadzi, asi mwanakadzi wakasikirhwa mwanarume.
10 Ndiyo ndaa, mwanakadzi ecidikana kufukidza musoro wake hinga cipangidzo cekuti uri pasi pe utongi we mwamuna wake uye nge ndaa ye ngirozi.
11 Kusiya izvona, pakati pe aya ari muna Tenzi, mwanakadzi uripo nge ndaa yo mwanarume, mwanarume uripo nge ndaa yo mwanakadzi.
12 Ngokuti hinga mwanakadzi wakasikwa kubva pa mwanarume, mwanarume wakabarhwa no mwanakadzi; asi zviro zvese zvakasikwa na Mwari.
13 Munoona kudini: Zvinoita kuti mwanakadzi aite munamato kuna Mwari asikazi kufukidza musoro wake here?
14 Masikirhwe akaizwa anhu aamufundisii kuti tsitsi rakareba rinopsverusa mwanarume here?
15 Asi kana mwanakadzi akagara no tsitsi rakareba ndi rukudzo kaari. Ngokuti akapaswa tsitsi rakareba kuti afukidze ndirona musoro wake.
16 Asi kana pano munhu unoda kutama kuzwirana nge ndaa ye tsika imweni, isusu atina tsika imweni, kunyazi ungano dza Mwari adzitonawo.
17 Asi pandinomupasai mutemo uu, andimusimbii, ngokuti musangano wamunoita aumubetseri, asi uri kumukuwadzai.
18 Ngokuti cokutanga, ndiri kuzwa kuti pano kuparadzana pakati penyu, pamunoita musangano mu ungano; uye inini ndinozvitendera kuti zviri kuitikadi.
19 Ngokuti pakati penyu panozooneka zvikwata, kuitira kuti aya anotenderhwa na Mwari anyase kuoneka pamhene.
20 Pamunoungana pa mbuto imwe, amuripi kuungana kuti murhye Kurarira ka Tenzi.
21 Ngokuti painokwana nguwa yokurhya Kurarira ka Tenzi, umwe na umwe uri kutanga arhya zvokurhya zvake, zvokuti umweni unonga anonzara asi umweni unonga akararadza.
22 Kureya kuti amuna nyumba yo kumwira no kurhyira here? Kana kuti muri kushora ungano ya Mwari here uye meciita kuti aya asina ciro apsveruke? Hino ndotii kamuri? Ndinodikana kumusimbai here? Inini andimusimbii nge ndaa yazvo.
23 Ngokuti ndakatambira kubva kuna Tenzi zviya zvandakamupasaiwo, zvekuti Tenzi Djesu pa usiku waakazotengeswa akatora pau,
24 uye mumasure mekuita munamato we kutenda, akaigura uye akati: “Pau ii inoimirira mwiri wangu, uri kuizwa cibairo kuti mubetsereke. Rumbwai meciita izvi kuti mundiedzurire.”
25 Akaitawo zvimwezvo no kopo, paakapedza kurarira, eciti: “Kopo ii inoimirira citenderano cipsva peciseenzeswa ngazi yangu. Rumbwai meciita izvi, pese pamunomwira mu kopo ii, mecindiedzurira.”
26 Ngokuti pese pamunorhya pau ii no kumwira mu kopo ii, munonga meciziisa rufu ra Tenzi, dakara auya.
27 Hino munhu wese unorhya pau kana kumwira mu kopo ya Tenzi zvisikazi kusisira, ucagara no ndaa nge ndaa yo mwiri no ngazi ya Tenzi.
28 Munhu ngaatange adziongorora aone kuti akasisira here, pedzepo ndipona basi paanozorhya pau no kumwira mu kopo ii.
29 Ngokuti uya unorhya no kumwa asikazvizwisisi kuti izvona zvinoimirira mwiri wa Tenzi, unonga ecidziunzira kutongwa.
30 Ndiyo ndaa akawanda pakati penyu akaremba uye ecirhwara, uye akawanda akhona akafa.*
31 Asi kudai taizwisisa zvatiri, tainga tisikadi kuzotongwa.
32 Asi patinotongwa, tinopangirhwa na Djehovha,* kuti titame kutongwa pamwepo no nyika.
33 Hino hama dzinodiwa, pamunoungana pamwepo kuti murhye kurarira uku, etseranai.
34 Kana munhu uno nzara, ngaarhyire kumba kake, kuitira kuti pamunonga makaungana, mutame kuunganira kutongwa. Asi ngezve nyaya dzimweni dzasara, ndinozodzigadzirisa ndikazogumeyo.
Masoko ari pasi
^ Zvinopangidza hingana kuti pari kurekethwa kufa pane zvekunamata.
^ Onai Apendi. A5.
