Tsamba Yekutanga ku Akorinti 13:1-13
-
Rudo i gwanza rinopinda makwanza ese (1-13)
13 Kana ndikareketa no mureketero we anhu no we ngirozi asi ndisina rudo, ndinonga ndaita hinga bhuzina riri kurira kana kuti hinga zviridzwa zve simbi zviri kupondaniswa.
2 Uye kana ndino cipo ce kuphorofita uye co kuzwisisa zvakaigika zva Mwari zvese no ruziyo rese, uye kana ndino kutenda kakakura zvokuti ndingatocinja matunhu kuaendesa ku mbuto imweni, asi ndisina rudo, andiripi ciro.*
3 Uye kana ndikapasa zviro zvangu zvese kuti ndipase amweni zvokurhya, uye kana ndikapasa mwiri wangu hinga cibairo kuti ndidzikudze, asi ndisina rudo, apana cazvinondibetsera.
4 Rudo rino mwoyo unononoka kutsamwa uye rino unaki. Rudo arina shanje. Arigai, aridzikudzi,
5 ariiti zvisikazi kusisira,* aripsvaki zvakarinakira basi, arikasiki kutsamwa. Aricengeti bundu.*
6 Aripfariri zvisina unatsi, asi rinopfara nge cokwadi.
7 Rinotsungirira* zviro zvese, rinotenda zviro zvese, rinoetsera zviro zvese, rinoshingirira zviro zvese.
8 Rudo arimboperi. Asi kana pano zvipo zve kuphorofita, zvicabviswa; kana zviri zvipo zve kureketa mireketero yakasiyana-siyana,* zvicapera; kudai riri ruziyo, ricabviswa.
9 Ngokuti tino ruziyo risikazi kukwana uye tinophorofita zvisikazi kukwana,
10 asi pa zvinozouya zvakakwana, zvisikazi kukwana zvinozopera.
11 Pandainga ndiri mwana mudoko, ndaireketa hinga mwana mudoko, ndairangarira hinga mwana mudoko, ndaiona zviro hinga mwana mudoko; asi parizvino ndakura, ndiyo ndaa ndakasiya kuita zvinoizwa no mwana mudoko.
12 Ngokuti zvino, atiripi kunyasa kuona zvakanaka nge supeya yo simbi, asi mbai-mbai pano tinozoonana hope no hope. Zvino uno andinyasi kumuziyai zvakanaka, asi pa nguwa iyona, ndicanyasa kumuziyai hinga kuziikanwa kandinoizwa.
13 Asi zviro zvitatu izvi zvinorumbwa zviripo: kutenda, kariro, rudo; asi cikuru pa zvese i rudo.
Masoko ari pasi
^ Kana kuti: “apana candiri kuita.”
^ Kana kuti: “ariiti zviro no hasha.”
^ Kana kuti: “arierengi zvishaishi.”
^ Kana kuti: “Rinoshingirira.”
^ Kureya kuti, kureketa mireketero yakasiyana-siyana nge mushobo unoshamisa.
