Akorinti Wekutanga 14:1-40
14 Rumbwai mecipangidza rudo uye rumbwai mecipeta masimba kuti mugare no zvipo zve mwiya, asi maka-maka cipo ce kuphorofita.
2 Ngokuti munhu unoreketa ngo mureketero aareketi ecibvunza anhu, asi unonga ecibvunza Mwari, ngokuti apana munhu unomuzwisisa, kunyazi ecireketa zvakaigika zva Mwari nge mwiya mucena.
3 Ngokudaro, uya unophorofita unowaka, unobambisa uye unonyaradza anhu nge masoko ake.
4 Uya unoreketa nge mireketero yakasiyana-siyana unodziwaka pacake, asi uya unophorofita unowaka ungano.
5 Inini ndaida maningi kuti mwese murekete ngo mireketero yakasiyana-siyana, asi ndinopfarira kuti muphorofite. Zvezvirokwazvo, uya unophorofita ndi mukuru kupinda uya unoreketa ngo mireketero yakasiyana-siyana, kunza ke kuti adudzira* kuti ungano ibambiswe.
6 Asi hama, kana ndikauya kamuri ndecireketa mireketero yakasiyana-siyana, ndaizomubetserai kudini? Kana ndecida kumubetserai ndinodikana kureketa zviro zvandakapangidzwa na Mwari, zvandinoziya, uphorofita kana kuti no fundiso.
7 Ndizvonawo zvimwezvo zvinoitika no zviro zvisina upenyu zvinorira, ungadai uri mutoriro kana kuti rudimbwa.* Kudai pakatama musiyano pa maririre azvo, munhu ungakwanisa kuziya kudini kuti uri kurirewo ndi mutoriro kana kuti rudimbwa?
8 Ngokuti kana tropito ikatama kuridzwa zvakanaka, ndiani ucagadzirira kuti aende koorhwa hondo?
9 Nge mushobo umwewo, kana mukareketa meciseenzesa masoko anoshupha kuzwisisa, munhu ungaziya kudini zvamuri kureketa? Zvezvirokwazvo, imwimwi munonga mecireketera mhepo.
10 Mu nyika muno mireketero yakasiyana-siyana, asi apana mureketero usina zvaunoreya.
11 Ngokuti kana ndikatama kuzwisisa zviri kurekethwa, ndinonga ndiri munhu we nyika imweni ku uya unonga ecireketa, uye uya unonga ecireketa unonga uri we nyika imweni kandiri.
12 Hino imwimwiwo, sezvo mecida maningi kugara no zvipo zvo kumwiya, psvakai kugara no zvipo zvakawanda zvinobambisa ungano.
13 Ngokudaro, munhu unoreketa mureketero umweni ngaaite munamato kuti akwanise kuuturikira.
14 Ngokuti kana ndeciita munamato no mureketero umweni, cipo cangu co mwiya ndico cinonga ceciita munamato, asi ndangariro dzangu dzinonga dzisikaseenzi.
15 Hino, zvinyi zvinodikana kuizwa? Ndicaita munamato no cipo co mwiya, asi ndicaitawo munamato no ndangariro dzangu. Ndicaemba ngoma dzo rukudzo no cipo co mwiya, asi ndicaembawo ngoma dzo rukudzo no ndangariro dzangu.
16 Ngo dii rimweni, kana ukasimba Mwari no cipo co mwiya, munhu uri pakati pako ungadaira kudini kuti “Ameni” paunonga waita munamato, asikazi kuzwisisa zvauri kureketa?
17 Izvirokwazvo kuti uri kuita munamato zvakanaka, asi munhu umweni aaripi kubambiswa.
18 Ndinotenda Mwari, ngokuti ndinoreketa mireketero yakawanda kupinda imwimwi mwese.
19 Ngokudaro, mu ungano ndingasanangura hangu kureketa masoko mashanu no ndangariro dzangu,* kuti ndifundise amweni, pane kuti ndirekete masoko 10 000 ekuti anhu amweni aazwisisi.
20 Hama, musaite hinga ana adoko mu kuzwisisa kenyu, asi garai ana adoko mu zvakashata; uye kurai pa kuzwisisa kenyu.
21 Mu Mutemo makatarhwa kuti: “Djehovha* anozoreketa kuti: ‘Ndinozobhuya ngo mireketero dzo nyika dzimweni, ndoseenzesa miromo ye anhu asikaziikanwi kuti ndibhuye no anhu aya, asi kunyazi zvakadaro awona anozoramba kundipurutana.’”
22 Hino mireketero acipangidzopi ku atendi, asi cipangidzo ku aya asikatendi. Kuphorofita acipangidzopi ku aya asikatendi, asi cipangidzo ku atendi.
23 Hino kudai ungano yese ikaungana yoreketa no mireketero yakasiyana-siyana uye anhu asikamuzii kana kuti anhu asikatendi opindawo, aazoreketi kuti muri kupenga here?
24 Asi kudai mwese meciphorofita, mopinda munhu usikamuzii kana kuti usikatendi, iyena ucazopangirhwa uye ucanyasa kuongororhwa nawo ese.
25 Zviri mu mwoyo make zvicabudiswa pamhene, zvekuti ucahwarara wonamata Mwari, eciti: “Zvezvirokwazvo, Mwari ari pakati penyu.”
26 Hino hama, zvinyi zvinodikana kuizwa? Pamunonga makaungana pamwepo, umweni uno pisarema, umweni uno fundiso, umweni uno zvaapangidzwa, umweni uno cipo ce kureketa mireketero yakasiyana-siyana, uye umweni uno cipo ce kuturikira. Itai zviro zvese kuti mubambisane.
27 Uye kana pano anoreketa mireketero imweni, aadikani kudarika airi kana atatu, uye anodikana kuita zvekucinjana, uye umweni unodikana kuturikira.
28 Asi kana pasina muturikiri, iyena unodikana kurumbwa akanyarara mu ungano, ecireketa mu mwoyo uye na Mwari.
29 Aphorofita airi kana atatu ngaarekete, uye amweni ngaazwisise zvazvinoreya.
30 Kana umweni akagara no zvaapangidzwa paanonga akagara ipona, wainga ecireketa uya ngaanyarare.
31 Ngokuti mwese mungakwanisa kuphorofita meciita zvekucinjana, kuitira kuti ese afundiswe uye ese abambiswe.
32 Uye zvipo zve mwiya zve aphorofita zvinodikana kuonererhwa no aphorofita.
33 Ngokuti Mwari aaiti zviro zvisikazi kurongeka, asi ndi Mwari we runyararo.
Hinga zvakaita ungano dzese dze acena,
34 anakadzi anodikana kurumbwa akanyarara mu ungano, ngokuti azvitenderhwi kuti awona arekete. Asi ngaadzikande pasi, hinga zvinorekethwawo no Mutemo.
35 Kana pano ciro caanoda kufunda, ngaabvunzise amuna awo kumba, ngokuti zvinopsverusa kuti mwanakadzi arekete mu ungano.
36 Soko ra Mwari rakatanga na imwimwi here? Irona rakagumira kamuri basi here?
37 Kana munhu ecirangarira kuti ndi muphorofita kana kuti uno cipo co mwiya mucena, iyena unodikana kuziya kuti zviro zvandiri kumutarirai ndi mutemo wa Tenzi.
38 Asi uya unoramba izvi, iyena ucarambwawo.
39 Hino hama dzangu, rumbwai mecipeta masimba meciphorofita, asi musarambidze kureketa nge mireketero yakasiyana-siyana.
40 Asi zviro zvese ngazviitike nge mushobo wakanaka uye wakarongeka.
Masoko ari pasi
^ Kana kuti: “aturikira.”
^ Kana kuti: “arpa.”
^ Kana kuti: “kuzwisisa kangu.”
^ Onai Apendi. A5.
