Akorinti Wekutanga 15:1-58
15 Hino hama, ndinoda kuti muedzurire ngezve masoko akanaka andakamuparidzirai, amakatambira uye amakarumbwa meciatsigira.
2 Masoko akanaka aya andakamuziisai ari kumuponesai ngokuti makarumbwa makaabatisisa, kunza kekuti makagara atendi pasina.
3 Ngokuti zviro zvokutanga zvandakatambira, ndomuziisai nge zvekuti: Kristu akafira zvitema zvedu maererano no Matarhwa;
4 akakotswa uye akamutswa pa zuwa rocitatu maererano no Matarhwa;
5 uye kuti akadzipangidza kuna Kefasi,* pedzepo kuno aphostori 12.
6 Mumasure mazvo, iyena akadzipangidza ku hama dzinodarika 500 dzakaungana pamwepo, akawanda awo aciri apenyu dakara na nyamasi, asi amweni awo akapera kufa.*
7 Pedzepo akadzipangidza kuna Tiyago uye ku aphostori ese.
8 Asi pakupedzesera akadzipangidzawo kandiri hinga munhu akabarhwa mazuwa asati akwana.
9 Ngokuti inini ndiri mudoko pa aphostori ese, uye andizi kusisira kudainzwa muphostori, ngokuti ndakateerera ungano ya Mwari.
10 Asi nyasha dza Mwari dzakaita kuti ndigare hinga mushobo wandiri. Uye aazi kundizwira nyasha pasina, asi ndakaseenza kudarika amweni ese; haiwa ngo simba rangu, asi nge nyasha dza Mwari dziri kuseenza mandiri.
11 Ngokudaro, kunyazi ndini kana kuti awona, aya ndiwo maparidzire atinoita, uye izvona zvakamuitai kuti mugare atendi.
12 Hino kana teciparidzira kuti Kristu akamutswa kubva ku akafa, ngei amweni ari pakati penyu ari kubhuya kuti akuna kumutswa ke akafa?
13 Zvezvirokwazvo, kana kusina kumutswa ke akafa, hino Kristu aazi kumutswawo kubva ku akafa.
14 Asi kana Kristu asikazi kumutswa, kuparidzira kedu akuseenzi, uye kutenda kamunako akuseenziwo.
15 Uyezve, kudai zvezvirokwazvo akafa asikazomutswi, Mwari aazi kumutsawo Kristu. Hino isusu tinonga tecinyepa patinoparidzira kuti Mwari akamutsa Kristu.
16 Ngokuti kana akafa asikazomutswi, Kristu aazi kumutswawo.
17 Uye kana Kristu asikazi kumutswa, kutenda kenyu akuseenzi; imwimwi munorumbwa muri mu zvitema zvenyu.
18 Hino aya akafa mu rubatano na Kristu akaruzika nokusikaperi.
19 Kana tino kariro muna Kristu mu upenyu uno basi, tiri pa mugariro wakashata maningi kupinda anhu ese.
20 Asi zvirokwazvo nge zvekuti Kristu akamutswa kubva ku akafa, iyena ndi munhu wokutanga kumutswa kubva ku akafa hinga cibereko cokutanga.
21 Ngokuti rufu rakauya nge ndaa ye munhu umwe basi, hino kumutswa ke akafa kakauyawo nge ndaa ye munhu umwe basi.
22 Ngokuti anhu ese ari kufa nge ndaa ya Adhamu, nge mushobo umwewo, anhu ese anozomutswawo nge ndaa ya Kristu.
23 Asi umwe na umwe unozomutswa pa nguwa yake: Kristu cibereko cokutanga, mumasure mazvo aya ari a Kristu, pa nguwa ye kuoneka kake.
24 Pakupedzesera anozopasa Umambo kuna Mwari, Baba ake, mumasure me kutsakatisa umambo wese, utongi wese, no masimba ese.
25 Ngokuti iyena anodikana kutonga dakara Mwari akanda azondi ake ese pasi pe tsoka dzake.
26 Uye muzondi we kupedzesera rufu, ucatsakatiswa.
27 Ngokuti Mwari “akakanda zviro zvese pasi pe tsoka dzake.” Asi iyena paanoti ‘zviro zvese zvakakandwa pasi,’ zviri pamhene kuti izvi azvibatanidzi Uya akaita kuti zviro zvese zvigare pasi pake.
28 Asi zviro zvese pazvinonga zvakandwa pasi pake, Mwana pacake acadzikandawo pasi pe Uya akakanda zviro zvese pasi pake, kuti Mwari agare zviro zvese ku anhu ese.
29 Kana akafa asikazomutswi, hino aya anobhabhatidzwa kuti afe anozoitei? Kana zvezvirokwazvo akafa asikazomutswi, ngei awona anobhabhatidzwa kuti afe?
30 Ngei isusu tinokanda upenyu wedu pa ngozi nguwa dzese?
31 Nguwa dzese ndinorhwisana no rufu. Nge ndaa yazvo, ndinopfara ndimwi hama dzangu dzandinadzo muna Kristu Djesu Tenzi wedu.
32 Kana ndakarhwisana no zvikara* ku Efeso hinga anhu amweni,* zvinondibetserei? Kana akafa asikazomutswi, “hino ngatirhye uye ngatimwe, ngokuti mangwana ticafa.”
33 Musacengedzwe. Kushamwaridzana no anhu anoita zviro zvakashata kunoshatisa maitiro akanaka.
34 Garaizve no nzero dzakanaka meciita zviro zve unatsi uye musaite citema, ngokuti amweni aazii Mwari. Ndiri kureketa zviro izvi kuti mupsveruke.
35 Asi amweni acabvunzisa kuti: “Akafa acamutswa kudini? Uye acamutswa no mwiri wakadini?”
36 Iwewe munhu usikarangariri! Ciro caunosima acimeri cisati catanga ngo kumbofa.
37 Uye ciya caunosima, amwiripi unokura, asi i mbeuwo hayo, ingadai yo trigu kana kuti yo mushobo upi hawo we mbeu;
38 asi Mwari anopasa mbeu mwiri maererano no zvinomupfadza, uye anopasa mbeu imwe na imwe mwiri wayo kamare.
39 Mwiri dzese adzizi kuezana, asi kuno mwiri dzo anhu, dzo n’ombe, dzo shiri, no dzo howe.
40 Uye kuno mwiri dzo kudenga no mwiri dzo pasi; asi mwiri dzo kudenga dzino rukudzo nge mushobo umweni uye mwiri dzo pasi dzino rukudzo nge mushobo umweniwo.
41 Rukudzo re zuwa ngere mushobo umweni, rukudzo re mwedzi ngere mushobo umweniwo uye rukudzo re nyeredzi ngere mushobo umweni; zvezvirokwazvo nyeredzi imwe na imwe inosiyana no imweni pa rukudzo.
42 Ndizvonawo zvinoitika no kumutswa ke akafa. Unokotswa uri mwiri unoora; unozomutswa uri mwiri usikaori.
43 Unokotswa uri mwiri usikareremedzwi; unomutswa mu rukudzo. Unokotswa uri mwiri usina simba; womutswa uno simba.
44 Unokotswa uri mwiri we nyama; unomutswa uri mwiri we mwiya. Kana kuno mwiri we nyama, uriyoo mwiri we mwiya.
45 Hinga zvakatarhwa kuti: “Munhu okutanga Adhamu wakagara munhu mupenyu.” Adhamu wo kupedzesera wakagara mwiya unopasa upenyu.
46 Ngokudaro, mwiri we mwiya andiopi wokutanga. Mwiri we nyama ndiwo unotanga, pedzepo kozouya wo mwiya.
47 Munhu wekutanga wakabva pa nyika uye wakaizwa no mataka; munhu wecipiri wakabva kudenga.
48 Kuita hinga uya wakaizwa no mataka, ndizvoo zvakaitawo aya akaizwa no mataka; uye uya we kudenga, ndizvoo zvakaitawo aya e kudenga.
49 Uye ngokuti takagara no mufanikiso we uya wakaizwa no mataka, ticagarawo no mufanikiso we uya akabva kudenga.
50 Asi hama, ndinomubvunzai kuti, nyama no ngazi azvingagari nhaka yo Umambo wa Mwari, uye kuora akugari nhaka ye kutama kuora.
51 Izwai! Ndinomubvunzai zvakaigika zva Mwari zvokuti: Atesepi isusu tinozowata mu rufu, asi tese ticacinjwa,
52 mu nguwa doko basi, mu kuphaira ke dziso, mu kurira ke tropito ye kupedzesera. Ngokuti tropito icarira, akafa acamutswa asikaori uye isusu ticacinjwa.
53 Ngokuti cinoora cinodikana kupfeka cisikaori, uye cinofa cinodikana kupfeka cisikafi.
54 Asi mwiri unoora paunopfeka usikaori uye mwiri unofa paunopfeka usikafi, ndipona pacadzadzika masoko akatarhwa okuti: “Rufu ratsakatiswa* nokusikaperi.”
55 “Rufu, kunyisa kako kuri kupi? Rufu, simba rako raunounzisa naro nyathwa riri kupi?”
56 Simba rinounzisa rufu ndi citema, uye simba ro citema ndi Mutemo.*
57 Ngaatendwe Mwari, ngokuti iyena ndiye anotiita kuti tiwine eciseenzesa Tenzi wedu Djesu Kristu!
58 Hino hama dzangu dzinodiwa, garai makabamba, musikazunguzwi, uye nguwa dzese garai no zvakawanda zvekuita mu basa ra Tenzi, meciziya kuti basa ramunoita kuna Tenzi akuseenzerapi nyore.
Masoko ari pasi
^ Unodainzwawo kuti Pedru.
^ Kana kuti: “akawata mu rufu.”
^ Kana kuti: “zvirombo.”
^ Mabhaibheri amweni anoti: “mu maonero e anhu.”
^ Cigrego: “ramedzwa.”
^ Kana kuti: “Mutemo ndiwo unopasa simba citema.”
