Tsamba Yekutanga ku Akorinti 3:1-23
3 Ngokudaro hama, andizi kukwanisa kureketa na imwimwi hinga anhu anotungamirirhwa no mwiya wa Mwari, asi ndakareketa na imwimwi hinga anhu e nyama, ana adoko muna Kristu.
2 Inini ndakamupasai mukaka, haiwa zvokurhya zvakabamba, ngokuti mainga musati manyasa kubamba. Kunyazi na nyamasi uno amusati manyasa kubamba,
3 ngokuti muciri anhu e nyama. Sezvo pakati penyu pano shanje no kureketedzana, andizvopi here zvinopangidza kuti muri anhu e nyama uye muri kuita kuda ke anhu e nyika ino?
4 Ngokuti kana umwe wenyu eciti: “Inini ndiri wa Pauro,” umweniwo eciti: “Inini ndiri wa Aporo,” amuripi kuita zvinoizwa nge anhu e nyika ino here?
5 Hino, Aporo ndiani? Pauro ndiani? Awona aseenzi akamuitai kuti mugare atendi, maererano no zvakapaswa umwe na umwe na Tenzi.
6 Inini ndakasima, Aporo wakadirira, asi Mwari ndiye akaita kuti zvikure,
7 hino unokosha andiepi uya unosima kana unodirira, asi Mwari anoita kuti zvikure.
8 Munhu unosima no munhu unodirira ese ano cinangwa cimwe, asi munhu umwe na umwe unozotambira mubairo wake maererano no basa rake.
9 Ngokuti isusu tinoseenza pamwepo na Mwari. Imwimwi muri munda wa Mwari uri kurimwa, muri nyumba ya Mwari iri kuwakwa.
10 Maererano no nyasha dza Mwari dzandakapangidzwa, ndakakanda fundasau hinga muwaki uno uzii, asi munhu umweni uri kuwakira pamusoro payo. Asi umwe na umwe ngaangwarire mawakire aari kuita pamusoro payo.
11 Ngokuti apana munhu unokwanisa kukanda fundasau imweni kunza ke iya yakatokandwa kare, yokuti inoimirira Djesu Kristu.
12 Kana munhu akawaka pamusoro po fundasau ii ngo oro, prata, mapuwe anokosha, matabwa, kana nge uswa,
13 basa ro munhu umwe na umwe ricabudiswa pamhene,* ngokuti zuwa ricaripangidza, irona ricapangidzwa no muriro, uye muriro uu ucapangidza basa rakaizwa no munhu umwe na umwe.
14 Kana muriro ukatama kupisa nyumba yakawakwa no munhu pamusoro pe fundasau, iyena ucakomborerhwa;
15 kana nyumba yakawakwa no munhu ikapsva, ucaruza, asi iyena ucaponeswa; kana zvikadaro, zvinozoita hingana kuti waponeswa kubva pa muriro.
16 Amuzvizii here kuti imwimwi muri tempro ya Mwari uye kuti mwiya wa Mwari unogara mamuri?
17 Kana munhu akatsakatisa tempro ya Mwari, Mwari acamutsakatisawo; ngokuti tempro ya Mwari i cena, uye imwimwi ndimwi tempro yakhona.
18 Ngapatame kugara no munhu unodzicengedza: Kana pakati penyu pano munhu unorangarira kuti wakangwara mu nyika ino, ngaagare munhu wakapusa, kuti azogare wakangwara.
19 Ngokuti uzii we nyika ino ndi upenzi kuna Mwari, ngokuti zvakatarhwa kuti: “Iyena anobata azii no ungwaru wawo.”
20 Uyezve: “Djehovha anoziya kuti kurangarira ke anhu akangwara akubetseri.”
21 Hino ngapatame kugara no anodzikudza nge ndaa ye anhu; ngokuti zviro zvese nge zvenyu,
22 angadai ari Pauro, Aporo, Kefasi,* nyika, upenyu, rufu, zviro zviriyo zvino, kana kuti zviro zvinozouya, zvese nge zvenyu;
23 imwimwi muri anhu a Kristu; uye Kristu, nge wa Mwari.
