Akorinti Wekutanga 4:1-21
4 Anhu anodikana kutiona hinga tiri abetseri a Kristu uye aonereri e zvakaigika zva Mwari.
2 Zvinoetserhwa ku aonereri aya, nge zvekuti agare akagondeka.
3 Kandiri azvinyanyi kukosha kuti ndiongororhwe ndimwi kana no tribhunari. Zvezvirokwazvo, kunyazi inini pacangu andidziongorori ndega.
4 Ngokuti andiripi kuedzurira zvandashaisha. Asi azviripi kureya kuti ndiri munatsi; Djehovha* ndiye anondiongorora.
5 Hino, musatonge ciro cipi haco nguwa isati yaguma, dakara Tenzi auya. Iyena anozobudisa pamhene zviro zvakaigika zviri mu cidima uye acaita kuti ndangariro dze mwoyo ye anhu dziziikanwe, uye umwe na umwe wawo unozokudzwa na Mwari.
6 Hama, ndaseenzesa masoko aya kandiri uye na Aporo kuti zvimubetserei, kuti ngo muezaniso wedu mufunde mutemo wokuti: “Musadarike zviya zvakatarhwa,” kuitira kuti mutame kudzikudza, meciona umweni hinga ari nani kudarika umweni.
7 Ndiani unoita kuti usiyane no umweni? Cinyi caungati unaco causikazi kupaswa? Kana wakaita zvekupaswa, hino ngei wecidzikudza hingana kuti auzi kupaswa?
8 Hino makwana no zvamunazvo here? Maa apfumi here? Matotanga kutonga hinga madzimambo isusu tisiripopi here? Zvezvirokwazvo ndaitoda kuti imwimwi mutotange kutonga hinga madzimambo, kuti isusu titongewo pamwepo na imwimwi hinga madzimambo.
9 Ndinoona hinga kuti Mwari akatiita kuti isusu aphostori tigare e kupedzesera kupangidzwa kuti tioneke no anhu ese hinga akatongerhwa rufu, ngokuti tiri kuita hinga tiri mudariro, kuti tioneke no nyika, ngirozi uye no anhu.
10 Isusu tiri mapenzi nge ndaa ya Kristu, asi imwimwi makangwara mu rubatano na Kristu, isusu atina simba, asi imwimwi makabamba; imwimwi munokudzwa, asi isusu tinoshorhwa.
11 Dakara zvino tino nzara, tino mukaha, atina zvokusimira zvakakwana,* tinopondwa,* atina pokugara,
12 tinoseenza no simba no nyara dzedu. Patinotukwa, tinokumbira kuti akomborerhwe; patinoteererhwa, tinoshingirira no mwoyo unononoka kutsamwa;
13 panorekethwa zvakashata nge zvedu, tinodaira ne unaki; dakara na nyamasi ticiri kuita hinga marara e nyika, psvina inobviswa pa zviro zvese.
14 Ndiri kumutarirai zviro izvi kuti ndimufundisei hinga ana angu anodiwa, ngokuti andidi kumupsverusai.
15 Ngokuti kunyazi mukagara no afundisi 10 000 muna Kristu, cokwadi nge cekuti amuna madzibaba akawanda; ngokuti ndakagara baba enyu muna Kristu Djesu, nge kumuziisai masoko akanaka.
16 Hino, ndinomukohomedzesai kuti mugare ateedzeri angu.
17 Ndiyo ndaa ndiri kumutumirai Timoti, ngokuti iyena ndiye mwana wangu anodiwa uye wakatendeka muna Tenzi. Iyena ucamuedzurirai mushobo wandinoita zviro mu rubatano na Kristu Djesu, hinga kufundisa kandiri kuita mu matii ese no mu ungano dzese.
18 Amweni ari kudzikudza, hingana kuti andizouyi kuzomuvhakacirai.
19 Asi ndicauya kuzomuvhakacirai kana Djehovha* akada, haiwa kuti ndiuye koozwa masoko e aya anodzikudza, asi kuti ndione simba rawo.
20 Ngokuti Umambo wa Mwari aupangidzwi nge masoko, asi unopangidzwa nge simba ra Mwari.
21 Ndizvipi zvamunoda? Ndiuye kamuri no mushamu here kana kuti ndouyeyo no rudo no upfawi?
Masoko ari pasi
^ Onai Apendi. A5.
^ Cigrego: “tiri mitu.”
^ Kana kuti: “tinoshuphwa.”
^ Onai Apendi. A5.
