Akorinti Wekutanga 5:1-13
5 Cinoitika nge cekuti pari kurekethwa ngezve uhure* pakati penyu, uhure* usikamboizwi ku madzinza amweni—wekuti pano mwanarume umweni wakatora* mukadzi wa baba ake.
2 Ngei imwimwi mecidada ndizvo? Mainga musikadikani kutsukwara here, kuti mwanarume wakaita zviro izvi abviswe pakati penyu?
3 Kunyazi ndisiriyopi pa nyama, ndiri pamwepo na imwimwi mu ndangariro, uye ndatotonga mwanarume waita izvona, hinga kuti ndiri pamwepo na imwimwi.
4 Pamunonga makaungana mu zina ra Tenzi wedu Djesu, meciziya kuti ndiri pamwepo na imwimwi mu ndangariro, mu simba ra Tenzi wedu Djesu,
5 munodikana kupasa mwanarumewo kuna Sathani kuti nyama itsakatiswe, kuitira kuti mugariro wakanaka we ungano utame kutsakatiswa pa zuwa ra Tenzi.
6 Kudzikudza kenyu akuzi kunaka. Amuzvizii here kuti mbiriso padoko basi inofufumisa mukanyiwa wese?
7 Bvisai mbiriso ye kare kuti mugare mukanyiwa mupsva, usina mbiriso hinga zvamuri zvino. Ngokuti Kristu bira redu re Paskwa, akapaswa kare hinga cibairo.
8 Hino, ngatipemberere mabiko, haiwa no mbiriso ye kare, kunyazi no mbiriso yo ushati no ushaishi, asi no pau dzisina mbiriso no kugondeka uye cokwadi.
9 Ndakamutarirai pa tsamba yangu kuti muime kushamwaridzana no aya anoita uhure,*
10 andidi kureya kuti musiye kushamwaridzana zvacose no anhu e mu nyika ino anoita uhure,* ano makaro, matsotsi no anonamata zvidhori. Ngokuti kudai zvaidaro, maizodikana kutobuda mu nyika.
11 Asi ndinomutarirai zvino kuti muime kushamwaridzana no munhu wese unozwi hama asi unoita uhure,* kana munhu unokara, unonamata zvidhori, unotuka, unomwisa maningi doro, kana tsotsi; amudikani kunyazi kurhya no munhu wakadaro.
12 Ndinei no anhu e kunza kuti ndiatonge? Imwimwi amutongi anhu e mukati,
13 Mwari ecitonga anhu e kunza? “Bvisai pakati penyu munhu anoita zvakashata.”
Masoko ari pasi
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Kana kuti: “uri kurarama no.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.