Akorinti Wekutanga 6:1-20
6 Kana munhu washaishirhwa no mudoni wake pakati penyu, ngei unoenda kootongwa no anhu asina unatsi, otama kutongwa no acena?
2 Kana kuti imwimwi amuzvizii here kuti anhu a Mwari acazotonga nyika? Hino kana muri imwimwi mucazotonga nyika, amungakwanisi kutonga zvinyaya zvidoko here?
3 Amuzvizii here kuti ticatonga ngirozi? Hino ngei mungakonerhwa kutonga nyaya dze upenyu uno?
4 Kana muno nyaya dze upenyu uno dzinoda kutongwa, ngei munosanangura anhu asikatenderhwi no ungano kuti adzitonge?
5 Ndiri kureketa izvi kuti mupsveruke. Pakati penyu, apana munhu uno ungwaru ungakwanisa kutonga hama dzake here?
6 Pane kudaro, hama inoendesa hama yayo ku tribhunari pamberi pe asikatendi!
7 Zvezvirokwazvo, kana mukaendesana ku anyautongi pacenyu, munonga manyiswa. Zvainga zvisiripi nani here kutendera kubathwa zvisina unatsi? Zvainga zvisiripi nani here kutendera kuruza?
8 Pane kudaro, imwimwi munobatana zvisina unatsi, uye munokuwadzana pacenyu!
9 Kana kuti amuzvizii here kuti anhu asiripi anatsi aazogari nhaka ye Umambo wa Mwari? Musacengedzwe. Anhu anoita uhure,* anhu anonamata zvidhori, anhu anoita upombwe, anarume anotendera kuizwa anakadzi no anarume amweni, anarume anoita zvepamaponde no anarume amweni,*
10 mambavha, anhu ano makaro, zvidhakwa, anotuka,* uye matsotsi aazogari nhaka ye Umambo wa Mwari.
11 Amweni enyu ainga akadaro. Asi imwimwi makasukwa; makaceneswa; makaizwa anatsi mu zina ra Tenzi wedu Djesu Kristu no mwiya wa Mwari wedu.
12 Ndinotenderhwa zviro zvese, asi azvesepi zvinobetsera. Ndinotenderhwa zviro zvese, asi andisii ciro cipi haco cindionerere.
13 Zvokurhya zvakaizirhwa ndani, ndani yakaizirhwa zvokurhya, asi Mwari acatsakatisa zvese zviri zviiri. Mwiri auzi kuizwa kuti useenzeswe pa kuita uhure,* asi kuti useenzeswe pa kuseenzera Tenzi, uye Tenzi ndiye muridzi we mwiri.
14 Asi Mwari akamutsa Tenzi uye acatimutsawo kubva mu rufu eciseenzesa simba rake.
15 Amuzvizii here kuti mwiri wenyu i nhengo dza Kristu? Zvinoita here kuti nditore nhengo dza Kristu ndodzibatanidza no mwanakadzi unoita uhure? Azviiti!
16 Imwimwi amuzvizii kuti uya unoita zvepamaponde no mwanakadzi unoita uhure unogara mwiri umwe basi naye? Ngokuti iyena anoti, “ari airi, acagara nyama imwe basi.”
17 Asi uya wakabatana na Tenzi, unogara no marangariro amwewo naye.
18 Tizai uhure! Citema cese cinoizwa no munhu ciri kunza ke mwiri wake, asi wese unoita uhure* uri kushaishira mwiri wake wene.
19 Imwimwi amuzvizii kuti mwiri wenyu i tempro yo mwiya mucena, uri mamuri wamakapaswa na Mwari? Kusiya izvona, imwimwi amuripi wenyu pa cenyu,
20 ngokuti makatengwa ngo mutengo mukuru. Hino seenzesai mwiri yenyu pa kukudza Mwari.
Masoko ari pasi
^ Onai pakazwi Kupanganidzwa ke Masoko.
^ Cigrego: “anarume anowatana no anarume amweni.”
^ Kana kuti: “unoreketa zvakashata ngezve amweni.”
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Soko iri mu Cigrego rinozwi porneía. Onai pakazwi Kupanganidzwa ke Masoko.
