Tsamba Yekutanga ku Akorinti 7:1-40
7 Ngo pamusoro po zviro zvamakatara, zviri nani kuti mwanarume atame kubata* mwanakadzi;
2 asi nge ndaa ye kuwanda ke uhure,* mwanarume umwe na umwe ngaagare no mukadzi wake uye mwanakadzi umwe na umwe ngaagare no mwamuna wake.
3 Mwamuna ngaapase mukadzi wake zvaanodikana kumupasa, uye mukadzi ngaaitirewo zvimwezvo mwamuna wake.
4 Mukadzi andiepi muridzi wo mwiri wake, asi ngewe mwamuna wake; zvimwe-zvimwezvoo, mwamuna andiyepi muridzi wo mwiri wake, asi ngewe mukadzi wake.
5 Umwe aadikani kuramba kuita zvepamaponde no umweni, kudai mwamuna no mukadzi akatenderana kutama kuita zvepamaponde ke cinguwa kuti aite munamato, azvizi kushata, pedzepo munodikanazve kuita zvepamaponde, kuti Sathani atame kugara ecimuedzai nge ndaa ye kutama kudzibata kenyu.
6 Ndinomutenderai kuti muite zvandiri kumubvunzai, asi andiripi kugadza mutemo wamunodikana kubatisisa.
7 Asi ndaida kuti anhu ese agare hingana inini. Kunyazi zvakadaro, umwe na umwe akapaswa cipo cake na Mwari, umwe ngo mushobo uu, umweni ngo mushobo umweni.
8 Hino, ndinoti ku aya asikazi kuwaka kana kuwakwa pamwepo no afirhwakadzi kuti zviri nani kuti awona arumbwe akaita hingana inini.
9 Asi kana asikakwanisi kudzibata, ngaawake kana kuwakwa, ngokuti zviri nani kuwaka kana kuwakwa pane kupsva ngo kusirira.
10 Anhu akawaka kana kuwakwa ndinoapasa nhungamiriro inobva kuna Tenzi, haiwa kandiri, yokuti mukadzi aadikani kuparadzana no mwamuna wake.
11 Asi kana zvikaitika kuti aparadzane, ngaarumbwe asikazi kuwakwa kana kuti ngaahwirirane no mwamuna wake; uye mwamuna aadikani kusiya mukadzi wake.
12 Asi kuno amweni inini ndinoabvunza izvi, haiwa Tenzi, asi inini: Kana pano hama ino mukadzi usikatendi asi mukadziwo ecida kugara nayo, ngaasamusiye;
13 uye kana pano mukadzi uno mwamuna usikatendi uye mwamunewo ecida hake kugara naye, mukadziwo ngaasasiye mwamuna wake.
14 Ngokuti mwamuna usikatendi unoceneswa no mukadzi wake, uye mukadzi usikatendi unoceneswa nge hama ii; kudai zvainga zvisikazi kudaro, ana awo aizobarhwa asikazi kucena, asi zvino akacena.
15 Asi kudai munhu asikatendi akasanangura kusiyana no mudoni wake, ngaamusiye hake; pa mugariro wakadai, hama kana hanzvadzi aizi kusungwa, asi Mwari akamudainzira runyararo.
16 Iwewe mukadzi, auzvizii here kuti kana ukarumbwa uno mwamuna wako pamweni ucazomuponesa? Kana kuti, iwewe mwamuna, auzvizii here kuti kana ukarumbwa uno mukadzi wako pamweni ucazomuponesa?
17 Umwe na umwe ngaararame maererano no zvaakapaswa na Djehovha, hinga zvaainga ari paakadainzwa na Mwari. Ndiri kupasa nhungamiriro ii ku ungano dzese.
18 Uripo munhu wakadainzwa wakaizwa ucekeri here? Ngaarumbwe akadaro. Uripo munhu wakadainzwa asikazi kuizwa ucekeri here? Ngaarumbwe asikazi kuizwa ucekeri.
19 Kuizwa ucekeri akuna zvakunoreya, uye kutama kuizwa ucekeri akuna zvakunoreya; cinonyanya kukosha i kuzwira mitemo ya Mwari.
20 Umwe na umwe ngaarumbwe ari hinga mushobo waakadainzwa.
21 Wakadainzwa uri muranda here? Usanetseke ndizvo; asi kana wecikwanisa kusununguka, khorovhera mukana iwona.
22 Ngokuti munhu wese akadainzwa muna Tenzi ari muranda, pari zvino wakasununguka muna Tenzi; zvimwezvoo munhu wese akadainzwa ari munhu akasanunguka, pari zvino waa muranda wa Kristu.
23 Imwimwi makatengwa ngo mutengo mukuru; siyai kugara aranda e anhu.
24 Hama, umwe na umwe ngaarumbwe ari pamberi pa Mwari hinga mushobo waakadainzwa.
25 Pari zvino, kuno aya asati akambowaka kana kumbowakwa, andina nhungamiriro inobva kuna Tenzi, asi ndinopasa maonero angu hinga munhu wakazwirhwa usisi na Tenzi kuti agare akagondeka.
26 Asi ndinorangarira kuti zviri nani kuti munhu arumbwe hinga zvaari nge ndaa ye matambudziko ariyo zvino.
27 Kana iwewe uno mukadzi, usapsvake mishobo ye kurambana naye. Kana iwewe usina mukadzi, usapsvake mukadzi.
28 Asi kunyazi kana ukawaka kana kuwakwa, unonga usikazi kushaisha. Uye kana munhu asati akambowaka kana kumbowakwa, akawaka kana akawakwa, unonga asikazi kushaisha. Asi anoita izvona, acagara no matambudziko mu upenyu wawo. Hino inini ndiri kuedza kumudziirirai pa matambudziko awona.
29 Uyezve hama, ndinomubvunzai kuti pasara nguwa doko. Kubvira zvino kuenda mberi, aya ano akadzi ngaaite hinga asina akadzi,
30 aya anocema ngaaite hinga asikacemi, aya anopfara ngaaite hinga asikapfari, aya anotenga ngaaite hinga asina ciro,
31 aya anoseenzesa nyika ino, ngaaite hinga asikanyasi kuiseenzesa; ngokuti mugariro we nyika ino uri kucinja.
32 Zvandinoda nge zvekuti musadzirhye mwoyo. Mwanarume usikazi kuwaka unodzirhya mwoyo no zviro zva Tenzi, ngokuti unoda kupfadza Tenzi.
33 Asi mwanarume wakawaka unodzirhya mwoyo no zviro zve nyika, ngokuti unoda kupfadza mukadzi wake,
34 uye marangariro ake akaparadzana. Uyezve, mwanakadzi usikazi kuwakwa, kana mhandwe, unodzirhya mwoyo no zviro zva Tenzi, kuti agare akacena mu mwiri no mu mwiya. Asi mwanakadzi wakawakwa unodzirhya mwoyo no zviro zve nyika, ngokuti unoda kupfadza mwamuna wake.
35 Inini ndiri kumubvunzai zviro izvi kuti mubetsereke, andidi kumupingaidzai, asi ndinoda kumubetserai kuti muite zvinodikana no kuseenzera Tenzi no mwoyo wese, nguwa dzese uye musina cinomupingaidzai.
36 Asi kana munhu ecirangarira kuti ari kuita zvisikazi kusisira nge ndaa ye kugara asikazi kuwaka kana kuwakwa, kudai apindiridza makore o kukura, iyena ngaaite izvi: Musiyei aite zvaanoda; apana caanonga ecishaisha. Musiyei awake kana kuwakwa.
37 Asi kana munhu akasanangura mu mwoyo make uye asikazvidi, asi ecikwanisa kudzibata pa zvido zvake uye osanangura mu mwoyo make kugara asikazi kuwaka kana kuwakwa, acaita zvakanaka.
38 Hino, uya anowaka kana kuwakwa ucaita zvakanaka, asi uya asikawaki kana asikawakwi ucaita zvakanaka kudarika ipona.
39 Mukadzi wakasungwa no mutemo we mwamuna wake paanonga aciri mupenyu. Asi kana mwamuna wake akafa, iyena wakasudzunurhwa pa mutemo kuti awakane no munhu upi hake waanoda, asi muna Tenzi basi.
40 Asi maonero angu ngo okuti, anopfara kana akarumbwa akadaro; uye ndinorugondo rokuti ndiri kutungamirirhwa no mwiya wa Mwari.
Masoko ari pasi
^ Zvecireya kuti, kuita zvepamaponde no.
^ Mu Cigrego por·nei′a. Onai pakazwi Kupanganidzwa ke Masoko.
