Akorinti Wekutanga 9:1-27
9 Andizi kusununguka here? Andiripi muphostori here? Andizi kuona Djesu Tenzi wedu here? Amuripi basa rangu muna Tenzi here?
2 Kunyazi ndisiripi muphostori ku amweni, kamuri zvezvirokwazvo ndiri muphostori! Ngokuti imwimwi ndimwi cidhindo cinopangidza basa rangu re muphostori muna Tenzi.
3 Masoko angu e kudzidziirira kuno aya anondiongorora ndi aya:
4 Kodi atina citenderhwa ce kurhya no kumwa here?
5 Atina citenderhwa ce kuperekedzwa no mukadzi unotenda muna Tenzi here,* hinga zvinoizwawo no aphostori amweni, anukuna a Tenzi uye Kefasi?*
6 Kana kuti ndini na Bharnabhee basi tisina citenderhwa ce kusiya basa redu re kudziriritira naro here?
7 Pano musurudado ungaseenza usikariphwi here? Ndiani ungasima muuvha pedzepo wotama kurhya mucero wawo? Kana kuti ndiani ungausha zvipfuyo pedzepo wotama kumwa mukaka wazvo?
8 Ndiri kureketa zviro izvi nge maonero e anhu here? Mutemo aureketiwo zviro izvona here?
9 Ngokuti zvakatarhwa mu Mutemo wa Mozesi kuti: “Musasunge muromo we n’ombe painonga yecipura tsangu dze zvirimwa.” Kodi Mwari ari kunetseka nge* n’ombe here?
10 Kana kuti masoko aya aaripi kubvunzwa isusu here? Zvezvirokwazvo izvi zvakatarhwa nge ndaa yedu, ngokuti munhu unorima no munhu unopura unodikana kuita izvona no kariro ye kutambirawo zviya zvaanonga aseenzera.
11 Kana takasima zviro zve kumwiya pakati penyu, zvakashata here kana tikakorora zviro zvenyu zve kunyama zvamunorarama nazvo?
12 Kana amweni anocitenderhwa ici pakati penyu, hino isusu atina citenderhwa cinotodarika cawo here? Kunyazi zvakadaro, isusu atizi kuseenzesa citenderhwa icona, asi tiri kushingirira zviro zvese kuti tisakande ciro cinopingaidza masoko akanaka ngezva Kristu.
13 Amuzvizii here kuti anhu anoita mabasa macena anorhya zviro zve pa tempro, uye aya anoseenza mazuwa ese pa artari anorhya zviro zvinopirhwa artari?
14 Nge mushobo umwewo, Tenzi akapasa mutemo wekuti aya anoziisa masoko akanaka ngaararame no masoko akanaka.
15 Asi inini andiripi kuseenzesa zviro zvese izvi. Zvezvirokwazvo, andizi kutara nge pamusoro po zviro izvi kuti zviitirhwe inini, ngokuti zvainga zviri nani kufa pane kuti . . . Apana munhu ungandidusira zvinondiitisa kuti ndidzikudze!
16 Hino kana ndeciziisa masoko akanaka, andizvopi zvinondiitisa kuti ndidzikudze, ngokuti ndizvona zvandinodikana kuita. Zvirokwazvo nge zvekuti, ndino nyathwa kana ndikatama kuziisa masoko akanaka!
17 Kana ndeciita izvi no mwoyo wese, ndinozoona mubairo; kunyazi ndikazviita ndisikadi, ndiciri nawo ubaba wandakapaswa.
18 Hino mubairo wangu nge wei? Kuti pandinoziisa masoko akanaka, ndiziise masoko akanaka ndisikariphwi, kuti ndisaseenzese simba rangu* zvisirizvopi ngo pamusoro pe masoko akanaka.
19 Ngokuti kunyazi ndakasununguka ku anhu ese, ndakadziita muranda we anhu ese, kuti ndiwine anhu akawanda.
20 Ku Adjudha ndakagara hinga Mudjudha kuti ndiwine Adjudha; ku aya ari pasi po mutemo ndakadzikandawo pasi po mutemo, kunyazi ndisiripi pasi po mutemo, kuti ndiwine ari pasi po mutemo.
21 Kuno aya asina mutemo, ndakagara hinga munhu usina mutemo, kunyazi ndisiripi munhu usina mutemo kuna Mwari asi ndiri pasi po mutemo kuna Kristu, kuti ndiwine aya asina mutemo.
22 Ku aya asina simba, ndakagara munhu usina simba, kuti ndiwine asina simba. Ndakagara zviro zvese ku anhu akasiyana-siyana, kuti nge mishobo yese ndiponese anganani.
23 Ndinoita zviro zvese nge ndaa ye masoko akanaka, kuti ndiaziise amweni.
24 Imwimwi amuzvizii here kuti aya anogogoma pa mutambo we kugogoma ese anogogoma, asi ndi umwe basi unowina mubairo? Hino gogomai nge mushobo unoita kuti mukwanise kuwina.
25 Munhu wese unobatanidzwa mu makwikwi unodzibata pa zviro zvese. Zviri pamhene kuti awona anoita izvona kuti atambire korowa inoora, asi isusu, isikaori.
26 Nge ndaa yazvo, ndinogogoma ndeciziya kandiri kuenda; makhandiriro andiri kuita mafaithi ngookuti nditame kuponda mhepo;
27 asi ndinotambudza* mwiri wangu ndeciuita hinga muranda, kuti mumasure me kuparidzira amweni, inini nditame kurambwa na Mwari.
Masoko ari pasi
^ Kana kuti: “hanzvadzi hinga mukadzi here.”
^ Unodainzwawo kuti Pedru.
^ Kana kuti: “kunyanya kurangarira.”
^ Kana kuti: “zvitenderhwa zvangu.”
^ Kana kuti: “ndinophanica.”
