Tsamba yekutanga ku Atesaronika 2:1-20
2 Hama, munonyasa kuziya kuti kumuvhakacirai katakaita akuzi kugara ke nyore.
2 Ngokuti kunyazi hazvo takatambudzwa no kushuphwa ku Firipi hinga zvamunoziya, takabetserhwa na Mwari kuti tigare anhu ano ushingi* pa kureketa masoko akanaka ngezva Mwari pamberi po kuphikiswa kakakura.*
3 Ngokuti kohomedzeso yatinomupasai aibvi pa zviro zvakashata, zviro zvisikazi kucena kana zviro zve ucengedzi,
4 asi ngokuti Mwari akati takasisira kupaswa basa re kuziisa masoko akanaka, tinoreketa tisikadi kupfadza anhu, asi Mwari, uya anoongorora mwoyo yedu.
5 Zvezvirokwazvo, imwimwi munonyasa kuzviziya kuti atizi kuseenzesa masoko anotapira kuti timucengedzerei, kana kunyepedzera kuti mutipase zviro; Mwari ndiena mupupuri!
6 Isusu tainga tisikapsvaki kukudzwa nge anhu, uyewo, tainga tisikapsvaki kukudzwa ndimwi kana kuti no amweniwo, kunyazi hinga aphostori a Kristu atizi kugara mutoro kamuri tecida kubetserhwa ndimwi.
7 Pane kudaro, isusu takagara anhu ano upfawi pakati penyu, hinga mai anoamwisa uye anorera ana awo no rudo.
8 Hino ngokuti tinomudai maningi, tainga tisikadi kumupasai masoko akanaka a Mwari basi, asi tainga takagadzirira* kumupasai upenyu* wedu kamare, ngokuti tinomudai maningi.
9 Hama, imwimwi munonyasa kuedzurira kupeta masimba no kuseenza no simba kataiita. Pataimuparidzirai masoko akanaka anobva kuna Mwari, isusu taiseenza usiku no masikati kuti tisagare mutoro ku umwe na umwe wenyu.
10 Imwimwi munopupurira, uye Mwari anopupurirawo kuti tainga takagondeka, tiri anatsi, uye tainga tisina ndaa kamuri imwimwi atendi.
11 Imwimwi munonyasa kuzviziya kuti isusu taimukohomedzesai, taimunyaradzai uye taipangira umwe na umwe wenyu, hinga zvinoita baba ku ana awo,
12 kuitira kuti murumbwe mecihamba nge mushobo wakasisira pamberi pa Mwari, iyena ari kumudainzai kuti muuye ku Umambo wake no rukudzo rake.
13 Ndiyo ndaa, isusuwo tinogara tecitenda Mwari, ngokuti pamakatambira soko ra Mwari ramakazwa katiri, amuzi kuritambira hingana soko re anhu, asi hingana zvariri kamare, soko ra Mwari, irona riri kuseenza mamuri imwimwi atendi.
14 Ngokuti imwimwi hama, makagara ateedzeri e ungano dza Mwari dziri mu rubatano na Kristu Djesu dziri ku Djudhiya, ngokuti matambudziko amakasongana nawo mecitambudzwa no anhu e nyika yenyu, ndiwonawo aakasongana nawo ecitambudzwa no Adjudha,
15 awona akatouraya Tenzi Djesu no aphorofita uye akatiteererawo. Uyezve, awona aaripi kupfadza Mwari uye ari kuita zviro zvisikapindirani no anhu ese,
16 ngokuti awona ari kuedza kutirambidza kureketa no anhu e madzinza amweni kuti aponeswe. Paanoita kudaro, anonga ecidzadzisa zvitema zvawo. Asi pakupedzesera shungu dzake dzinozouya paari.
17 Isusu hama, patakaparadzaniswa na imwimwi ke nguwa doko (pa nyama, haiwa mu mwoyo), cido cakakura catainga tinaco, cakaita kuti tiite zvese zvataikwanisa kuti timuonei pa nyama.*
18 Nge ndaa yazvo, isusu taida kuuya koomuvhakacirai; inini Pauro ndakaedza kairi kese haiwa kamwe kuti ndiuye koomuonai, asi Sathani wakatifungira gwanza.
19 Pa zuwa re kuoneka ka Tenzi Djesu, ndiani acazogara kariro yedu, mupfaro wedu no korowa yedu ye kupfara pamberi pake? Andimwipi here?
20 Zvezvirokwazvo imwimwi muri rukudzo redu no mupfaro wedu.
Masoko ari pasi
^ Kana kuti: “asikathyi.”
^ Mabhaibheri amweni anoti: “tecitambudzwa maningi.”
^ Cigrego: “tecipfara.”
^ Kana kuti: “mwiya.”
^ Cigrego: “hope yenyu.”
