Atesaronika Wekutanga 3:1-13
3 Ngokudaro, patainga tisikacakwanisi kushingirira, takaona kuti zvainga zviri nani kugara tiri tega ku Atena;
2 uye takamutumirai Timoti hama yedu uye museenzi wa Mwari* pa kuziisa masoko akanaka ngezva Kristu, kuti amubambisei no kumunyaradzai panocokuita no kutenda kenyu,
3 kuti pasaoneke munhu anozunguniswa nge ndaa ye matambudziko aya. Ngokuti imwimwi munozviziya kuti isusu atikwanisi kunzvenga matambudziko awona.*
4 Ngokuti patainga tinemwi taimubvunzai kuti taizobatana no matambudziko, uye hinga zvamunoziya, ndizvo kamare zviri kuitika na isusu.
5 Ndiyo ndaa, pandainga ndisikacakwanisi kushingirira, ndakamutuma kuti ndizwe ngezve kutendeka kenyu, ngokuti ndaithya kuti pamweni Muedzi waizomuedzai nge mushobo upi hawo, uye kuseenza kedu no simba kogara ke nyore.
6 Asi Timoti wabva kuguma ecibva kweneyo uye watibvunza masoko akanaka ngezve kutendeka kenyu uye rudo renyu, uye wabhuyazve kuti nguwa dzese munogara mecirangarira ngezve kupfara kataiita tiri tese uye mecidawo maningi kutiona hinga zvatinodawo maningi kumuonai.
7 Ngokudaro hama, takanyaradzwa pa zvinetso* zvedu no pa matambudziko edu patakazwa nge zvenyu uye ngezve kutendeka kamunopangidza.
8 Ngokuti isusu tinobambiswa maningi kana imwimwi mukagara makabamba muna Tenzi.
9 Tingatenda kudini Mwari nge zvenyu uye nge mupfaro mukuru watinawo pamberi pa Mwari wedu nge ndaa yenyu?
10 Usiku no masikati tinoita munamato we kudeketera no mwoyo wese kuna Mwari, kuti tiuye koomuonai hope no hope uye kuti tidzadzise zviri kushota pa kutenda kenyu.
11 Zvino, isusu tiri kuita munamato kuti Mwari Baba edu na Tenzi wedu Djesu atifunungurire gwanza kuti tiuyeyo.
12 Uyezve, Tenzi ngaatunhudzire rudo renyu uye ngaaite kuti rudo renyu ripsvetekere ku umwe na umwe uye ku ese, hinga kupsvetekera ke rudo redu kamuri,
13 ngokudaro, iyena acaita kuti mwoyo yenyu igare yakabamba, mugare musina ndaa, makacena pamberi pa Mwari Baba edu pa kuoneka ka Tenzi wedu Djesu no acena ake ese.
Masoko ari pasi
^ Mabhaibheri amweni anoti: “uya unoseenza pamwepo na Mwari.”
^ Kana kuti: “takagadzwa kuti tibatane nawo.”
^ Cigrego: “pa zviro zvataida.”
