Atesaronika Wekutanga 4:1-18
4 Pakupedzesera hama, hinga kutambira kamakaita nhungamiriro yakabva katiri ngezve muhambiro wamunodikana kuita kuti mupfadze Mwari, hinga zvamuri kuita, tinomukumbirai no kumudeketererai mu zina ra Tenzi Djesu kuti murumbwe mecitunhudzira kuita zvamuri kuita.
2 Ngokuti imwimwi munoziya nhungamiriro* dzatakamupasai dzinobva kuna Tenzi Djesu.
3 Ngokuti kuda ka Mwari ndi uku, kuti mugare makacena uye mosiya kuita uhure.*
4 Umwe na umwe wenyu unodikana kufundira kuonerera mwiri wake mukucena uye no kukudzwa,
5 asikakari no kudisisa maningi kuita zvepamaponde, hinga zvinoizwa no anhu e madzinza amweni asikazii Mwari.
6 Apana unodikana kudarika mugano uye oshaishira hama yake pa nyaya ii, ngokuti Djehovha* anozophanica anhu nge ndaa ye zviro zvese izvi, hinga kumubvunzai no kumungwadzai katakaita.
7 Ngokuti Mwari aazi kutidainzira kutama kucena, asi akatidainzira kuti tigare anhu akacena.
8 Ngokudaro, uya unoshora izvi, aaripi kushora munhu, asi uri kushora Mwari, uya anomupasai mwiya mucena wake.
9 Asi panocokuita no kudanana hinga hama, atidikani kumutarirai, ngokuti imwimwi kamare munofundiswa na Mwari kuti mudanane.
10 Zvezvirokwazvo, imwimwi muri kuita izvi ku hama dzese dziri mu Masedhoniya yese. Asi isusu tinomukohomedzesai hama, kuti murumbwe mecitunhudzira kuita kudaro.
11 Garai no cinangwa ce kugara mu runyararo, mecisiyana no nyaya dzisiripi dzenyu uye moseenza no nyara dzenyu, hinga zvatakamufundisai,
12 kuitira kuti mugare no muhambiro unosirirhwa no anhu okunza uye mutame kugara no zviro zvamunokonerhwa.
13 Uyezve hama, tinoda kuti muzwisise ngezve aya akawata mu rufu, kuti musatsukware hingana zvinoita anhu asina kariro.
14 Kana tecitenda kuti Djesu akafa uye omutswa, hino tinotendawo kuti Mwari acaunzisawo aya akawata mu rufu ari mu rubatano na Djesu.
15 Ngokuti isusu tinomubvunzai izvi no soko ra Djehovha,* kuti isusu apenyu tinonga tecirarama dakara pa kuoneka ka Tenzi atizombotangiri aya akawata mu rufu;
16 ngokuti Tenzi kamare acacita ecibva kudenga ecidainza no izwi guru, no izwi ro ngirozi huru uye no tropito ya Mwari, uye aya akafa ari mu rubatano na Kristu ndiwona acatanga kumuka.
17 Mumasure mazvo, isusu ekuti tinonga ticiri apenyu, ticatorhwa mu makuta pamwepo nawo kuti tisongane na Tenzi mu mhepo; uye ngokudaro, ticazogara na Tenzi nokusikaperi.
18 Hino rumbwai mecinyaradzana no masoko aya.
Masoko ari pasi
^ Kana kuti: “mitemo.”
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Onai Apendi. A5.
^ Onai Apendi. A5.
