Tsamba yekutanga ku Atesaronika 5:1-28
5 Zvino hama, panocokuita no nguwa yakasanangurhwa, amudikani kutarirhwa ciro.
2 Ngokuti imwimwi munonyasa kuziya kuti zuwa ra Djehovha* rinouya hingana mauire anoita mbavha usiku.
3 Anhu paanonga ecibhuya kuti: “Runyararo no kucengeteka!” apona kamare kutsakatiswa kawo kunouya nokukasika uye asikakariri, hinga mauire anoita kurhwadziwa ke mwanakadzi ane pamwiri uri kuda kubara, uye awona aazoponi.
4 Asi imwimwi hama, amuripi mu cidima, zvokuti zuwa irona ringamugumirai hinga mauire anoita mbavha,
5 ngokuti mwese imwimwi muri ana e ciedza no ana e masikati. Isusu atiripi ana e usiku kana e cidima.
6 Ngokudaro, ngatisawate hinga zvinoizwa no amweni, asi ngatigare takamuka uye tecirinda.
7 Ngokuti aya anowata, anowata cousiku, uye aya anoraradza, anoraradza cousiku.
8 Asi katiri isusu e masikati, ngatirumbwe takarinda uye ngatipfeke kutenda no rudo hinga cidziiriro ce paditi uye kariro ye ruponeso hinga kapaseti;
9 ngokuti Mwari aazi kutisanangura kuti tiizirhwe shungu, asi akatisanangura kuti tiponeswe peciseenzeswa Tenzi wedu Djesu Kristu.
10 Iyena akatifira, kuitira kuti azvinei kuti takapenya kana kuti takawata,* kuti tirarame pamwepo naye.
11 Ngokudaro, rumbwai mecibambisana* no kubetserana, hinga zvamuri kuita zvino.
12 Hino hama, tinomukumbirai kuti mureremedze aya anoseenza no simba pakati penyu, anomutungamirirai muna Tenzi uye anomupangirai;
13 nyasai kuareremedza mu rudo nge ndaa ye basa rawo. Garai no runyararo no umwe na umwe wenyu.
14 Uyezve hama, isusu tinomukohomedzesai kuti pangirai* anhu asikazwiri mupango, nyaradzai anhu akaora mwoyo,* betserai anhu akaremba uye garai no mwoyo unononoka kutsamwa ku anhu ese.
15 Ngwarirai kuti musahwirinzirane cakashata no cakashata, asi rumbwai meciitira zvakanaka umwe na umwe wenyu uye ku anhu ese.
16 Pfarai nguwa dzese.
17 Rumbwai meciita munamato.
18 Tendai Mwari ngo zviro zvese. Izvi ndizvona zvinoda Mwari muna Kristu Djesu.
19 Musadzimise muriro we mwiya mucena.
20 Musashore uphorofita.
21 Garai muno cokwadi pa zviro zvese; batisisai zviro zvakanaka.
22 Musaite mushobo wese we zviro zvakashata.
23 Mwari we runyararo ngaamucenesei zvakakwana. Uye mwiya* wenyu, upenyu wenyu no mwiri wenyu hama, ngazvirumbwe zvakakwana zvisina ndaa mu matii ese dakara pa kuoneka ka Tenzi wedu Djesu Kristu.
24 Uya ari kumudainzai akatendeka, uye zvezvirokwazvo acaita izvona.
25 Hama, rumbwai mecitiitira munamato.
26 Cungamidzai hama dzese no mwoyo wese.*
27 Ndiri kumudeketererai mu zina ra Tenzi kuti muerenge tsamba ii ku hama dzese.
28 Nyasha dza Tenzi wedu Djesu Kristu ngadzigare na imwimwi.
Masoko ari pasi
^ Onai pakazwi Kupanganidzwa ke Masoko.
^ Kana kuti: “takawata mu rufu.”
^ Kana kuti: “mecinyaradzana.”
^ Kana kuti: “pasai mazano.”
^ Kana kuti: “akatsukwara.”
^ Onai pakazwi Kupanganidzwa ke Masoko.
^ Cigrego: “beju cena.” Beju iri raiizwa nge Akristu paaisongana.”
