Juau Wekutanga 2:1-29
2 Ana angu anodiwa, ndiri kumutarirai zviro izvi kuitira kuti musaite citema. Asi kana munhu akaita citema, tino mubetseri* ari kuna Baba, Djesu Kristu, munatsi.
2 Iyena ndiye cibairo cakakwana ce kufukidza zvitema zvedu; haiwa basi zvitema zvedu, asi zve nyika yese.
3 Kana tikarumbwa tecizwira mitemo yake, tinozviziya kuti tinonga taguma pa kumuziya.
4 Uya anoti: “Inini ndinomuziya,” asi kunyazi zvakadaro asikazwiri mitemo yake, ndi munyepi uye aana cokwadi.
5 Asi kana munhu akazwira soko rake, rudo ra Mwari rinonyasa kudzadzika maari. Nge ndaa yazvo tinozviziya kuti tiri mu rubatano naye.
6 Uya anoti ari kurumbwa ari mu rubatano naye, anodikana kuhamba hinga mahambire aakaita.
7 Hama dzinodiwa, andiripi kumutarirai mutemo mupsva, asi mutemo we kare, wekuti munawo kubvira pakutanga. Mutemo uu we kare i soko ramakazwa.
8 Asi ndiri kumutarirai mutemo mupsva, ciro ce zvirokwazvo panocokuita naye uye na imwimwi, ngokuti cidima ciri kupera, asi ciedza caakudjeka.
9 Uya anoti ari mu ciedza, asi ecizonda hama yake, aciri mu cidima.
10 Uya anoda hama yake, anorumbwa ari mu ciedza uye kaari apana cinokuhunyisa.
11 Asi uya anozonda hama yake ari mu cidima uye ari kuhamba mu cidima, uye aazii kaari kuenda, ngokuti cidima cafunga madziso ake.
12 Ana angu anodiwa, inini ndiri kumutarirai ngokuti zvitema zvenyu zvarekererhwa nge ndaa yo zina rake.
13 Ndiri kumutarirai imwimwi madzibaba, ngokuti munoziya uya agara ariyo kubvira pakutanga. Ndiri kumutarirai imwimwi madjaha, ngokuti makunda Wakashata. Ndiri kumutarirai imwimwi ana angu anodiwa, ngokuti munoziya Baba.
14 Ndiri kumutarirai imwimwi madzibaba, ngokuti munoziya uya agara ariyo kubvira pakutanga. Ndiri kumutarirai imwimwi madjaha, ngokuti makabamba uye soko ra Mwari rinorumbwa riri mamuri uye imwimwi makunda Wakashata.
15 Musade nyika kana zviro zviri mu nyika. Kana munhu ecida nyika aadi Baba;
16 ngokuti zvese zviri mu nyika, zvakadai hinga cido ce nyama, cido ce madziso,* uye kugaya no zviro zvaunazvo azvibvi kuna Baba, asi zvinobva mu nyika.
17 Uyezve, nyika iri kudarika pamwepo no zvido zvayo, asi uya anoita kuda ka Mwari acarumbwa aripo nokusikaperi.
18 Ana angu anodiwa, ii i nguwa yekupedzesera, uye hinga zvamakazwa kuti munhu anopesana na Kristu acauya, pari zvino paano akawanda anopesana na Kristu, nge ndaa yazvo tinoziya kuti ii i nguwa yekupedzesera.
19 Awona akabuda pakati pedu, asi ainga asiripi edu; ngokuti kudai ainga ari edu, angadai akarumbwa anesu. Asi akabuda pakati pedu kuti zvioneke kuti aesepi ainga ari edu.
20 Muno kudzodzwa kunobva kuna uya wakacena, uye mwese imwimwi muno ruziyo.
21 Inini ndiri kumutarirai, haiwa ngokuti imwimwi amuzii cokwadi, asi ngokuti munociziya, uye ngokuti apana manyepo anobva mu cokwadi.
22 Kodi ndiani munyepi, kunza ke uya anoramba kuti Djesu ndi Kristu? Uya anoramba Baba no Mwana ndiye anopesana na Kristu.
23 Munhu wese uya anoramba Mwana, aaripi pamwepo na Baba. Asi wese uya anotenda Mwana, ari pamwepo na Baba.
24 Asi kamuri imwimwi, zviya zvamakazwa kubvira pakutanga zvinodikana kurumbwa zviri mamuri. Kana zviya zvamakazwa kubvira pakutanga zvikarumbwa zviri mamuri, imwimwi mucarumbwawo muri mu rubatano no Mwana uye muri mu rubatano na Baba.
25 Uye ndizvo kamare zvaakatipikira, upenyu usikaperi.
26 Inini ndiri kumutarirai zviro izvi, ngokuti pano anhu ari kuedza kumupausai.
27 Uye kamuri imwimwi, kudzodzwa kamakaizwa naye ngakurumbwe kuri mamuri, uye apadikani kuti munhu amufundisei nge zvazvo. Kudzodzwa kamakaizwa naye, uko kuri ke zvirokwazvo haiwa ke kunyepa, kunomufundisai zviro zvese. Hinga kufundiswa kamakaizwa, rumbwai muri mu rubatano naye.
28 Hino ana angu anodiwa, rumbwai muri mu rubatano naye, kuitira kuti kana iyena akazopangidzwa, tikwanise kureketa takasudzunuka* uye tisazotarauke paari tecipsveruka, pa nguwa ye kuoneka kake.
29 Kana meciziya kuti iyena ndi munatsi, munoziyawo kuti munhu wese anoita zviro zve unatsi ndi mwana wa Mwari.
Masoko ari pasi
^ Kana kuti: “muimiriri.”
^ Kana kuti: “zviro zvinosirirhwa no madziso.”
^ Kana kuti: “kureketa no rugondo.”
