Juau Wekutanga 3:1-24
3 Onai kuti Baba akatipangidzira rudo rakakura kudini, nge kuita kuti tidainzwe ana a Mwari! Uye ndizvo zvatiri. Ndiyo ndaa nyika isikatizii, ngokuti aizi kuguma pa kuaziya.
2 Hama dzinodiwa, pari zvino tiri ana a Mwari, asi azvisati zvapangidzwa zvaticazogara. Tinozviziya kuti paacapangidzwa, ticagara hingana iyena, ngokuti ticamuona kuti iyena akagara kudini.
3 Uye wese uya ano kariro ii maari anodzicenesa, kuitawo hingana iyena akacena.
4 Wese uya anogara eciita citema ari kuitawo zvisikapindirani no mutemo, ngokuti citema ndi cese ciya cisikapindirani no mutemo.
5 Imwimwi munoziyawo kuti iyena akapangidzwa pamhene kuti abvise zvitema zvedu, uye iyena aana citema.
6 Wese uya anorumbwa ari mu rubatano naye aagari eciita citema; apana anogara eciita citema akamuona kana kuguma pa kumuziya.
7 Ana angu anodiwa, musapauswe no munhu upi hake. Uya anoita zve unatsi ndi munatsi, kuitawo hingana iyena* ndi munatsi.
8 Uya anorumbwa eciita citema anobva kuna Dhiyabhurosi, ngokuti Dhiyabhurosi ari kuita citema kubvira pakutanga.* Nge ndaa yazvo, Mwana wa Mwari akapangidzwa pamhene kuti atsakatise mabasa a Dhiyabhurosi.
9 Munhu wese uya akabarhwa na Mwari aagari eciita citema, ngokuti mbeu* Yake inorumbwa iri mu munhu akadaro, uye iyena aagari eciita citema, ngokuti wakabarhwa na Mwari.
10 Ngo mushobo uu tinoziya kuti ndiapi ana a Mwari uye ndiapi ana a Dhiyabhurosi: Wese uya asikaiti zve unatsi aabvi kuna Mwari, kutobatanidzawo uya asikadi hama yake.
11 Ngokuti aya ndiwo masoko amakazwa kubvira pakutanga ekuti: Tinodikana kudanana;
12 atidikani kuita hingana Kaini, wakabva kuno Wakashata uye wakauraya hama yake. Ngei wakauraya hama yake? Ngokuti mabasa ake ainga akashata, asi mabasa e hama yake ainga ari e unatsi.
13 Musashamisike hama, kuti ngei nyika inomuzondai.
14 Isusu tinozviziya kuti takabva mu rufu kuenda ku upenyu ngokuti tinoda hama dzedu. Uya asikadi hama yake anorumbwa ari mu rufu.
15 Munhu wese anozonda hama yake ndi muurai, uye imwimwi munozviziya kuti apana muurai anozogara no upenyu usikaperi.
16 Takaguma pa kuziya rudo nge ndaa ye zviro izvi: Iyena akapasa upenyu* wake nge ndaa yedu, uye isusu tinodikanawo kupasa upenyu* wedu nge ndaa ye hama dzedu.
17 Asi kana munhu ano zviro zve nyika ino uye oona kuti hama yake ino zviro zvairi kushoterhwa, uye kunyazi zvakadaro oramba kuizwira usisi, rudo ra Mwari ringarumbwa kudini riri maari?
18 Ana angu anodiwa, atidikani kundodanana no masoko uye rurumi, asi no zviito uye zvirokwazvo.
19 Nge ndaa yazvo ticazoziya kuti takabva mu cokwadi, uye ticanyaradza mwoyo wedu pamberi pake
20 pese paya pekuti mwoyo wedu unotipasa ndaa, ngokuti Mwari mukuru kudarika mwoyo wedu uye anoziya zviro zvese.
21 Hama dzinodiwa, kana mwoyo wedu usikatipasi ndaa, tino rugondo patinoreketa na Mwari;
22 uye anotipasa zvese zvatinomukumbira, ngokuti tiri kuzwira mitemo yake uye tiri kuita zvinomupfadza.
23 Zvezvirokwazvo, uu ndiwo mutemo wake: Kuti titende mu zina re Mwana wake, Djesu Kristu, uye tidanane, kuitawo hingana iyena akatipasa mutemo.
24 Uyezve, uya anozwira mitemo yake anorumbwa ari mu rubatano naye uye iyena anorumbwa ari mu rubatano no munhuwo. Uye no mwiya waakatipasa, tinozviziya kuti iyena anorumbwa ari mu rubatano na isusu.
Masoko ari pasi
^ Kureya, Djesu.
^ Kana kuti: “paakatanga.”
^ Kureya mbeu inokwanisa kubara micero.
^ Kana kuti: “mwiya.”
^ Kana kuti: “mwiya.”
