Juau Wekutanga 4:1-21
4 Hama dzinodiwa, musatendere masoko ese akafemerhwa,* asi ongororai masoko akafemerhwa,* kuitira kuti muone kuti anobva kuna Mwari here, ngokuti mu nyika muno aphorofita akawanda e kunyepa.
2 Izvi ndizvo zvinoita kuti muziye kuti masoko akafemerhwewo anobva kuna Mwari here: Masoko ese akafemerhwa anotendera kuti Djesu Kristu akauya pa nyama, anobva kuna Mwari.
3 Asi masoko ese akafemerhwa asikatendi kuti Djesu akauya hinga munhu, aabvi kuna Mwari. Uyezve, aya ndi masoko akafemerhwa no munhu anopesana na Kristu, aya amakazwa kuti aizouya uye kuti zvino aa mu nyika.
4 Ana angu anodiwa, imwimwi makabva kuna Mwari, uye makakunda aphorofita e kunyepa, ngokuti uya ari mu rubatano na imwimwi ndi mukuru kudarika uya ari mu rubatano no nyika.
5 Awona akabva mu nyika; ndiyo ndaa anoreketa zviro zvinobva mu nyika uye nyika inoapurutana.
6 Isusu takabva kuna Mwari. Uya anoziya Mwari anotipurutana; asi uya asikazi kubva kuna Mwari aatipurutani. Nge ndaa yazvo, tinokwanisa kuziya musiyano we masoko akafemerhwa e zvirokwazvo no masoko akafemerhwa e kunyepa.
7 Hama dzinodiwa, ngatirumbwe tecidanana, ngokuti rudo rinobva kuna Mwari, uye wese uya anopangidzira rudo akabarhwa na Mwari uye anoziya Mwari.
8 Munhu wese asina rudo aazii Mwari, ngokuti Mwari i rudo.
9 Mwari akapangidzira rudo rake katiri, nge kutitumira pa nyika Mwana wake akabarhwa ari umwe ega, kuitira kuti tione upenyu peciseenzeswa iyena.
10 Rudo irona rinooneka pakuti: Haiwa kuti isusu takada Mwari, asi kuti iyena ndiye akatida uye akatuma Mwana wake hinga cibairo cakakwana ce kufukidza zvitema zvedu.
11 Hama dzinodiwa, kana Mwari akatida kudai, hino isusu tinodikanawo kudanana.
12 Apana wakamboona Mwari. Kana tikarumbwa tecidanana, Mwari anorumbwa anesu uye tinogara no rudo rake rakakwana.
13 Tinoziya kuti iyena ari mu rubatano na isusu uye isusu tiri mu rubatano naye, ngokuti iyena akatipasa mwiya wake.
14 Kusiya izvona, isusu kamare takaona uye zvino taakupasa upupuri wekuti Baba akatuma Mwana wawo kuti agare muponesi we nyika.
15 Munhu wese anotendera kuti Djesu ndi Mwana wa Mwari, Mwari anorumbwa ari mu rubatano naye uye iyena mu rubatano na Mwari.
16 Uye isusu tinoziya rudo rina Mwari katiri uye tinotenda mu rudo iri.
Mwari i rudo, uye uya anorumbwa ano rudo, anorumbwa ari mu rubatano na Mwari uye Mwari anorumbwa ari mu rubatano naye.
17 Ngo mushobo uu, rudo rakapangidzwa zvakakwana katiri, kuitira kuti tikwanise kureketa takasudzunuka* pa zuwa re kutongwa, ngokuti zvaari* ndizvo zvatiriwo mu nyika ino.
18 Munhu ano rudo aathyi, asi rudo rakakwana rinodzingira kuthya, ngokuti kuthya kunotipingaidza. Zvezvirokwazvo, uya anothya aana rudo rakakwana.
19 Isusu tino rudo, ngokuti Mwari ndiye akatanga kutida.
20 Kana munhu eciti: “Inini ndinoda Mwari,” uye kunyazi zvakadaro ecizonda hama yake, ndi munyepi. Ngokuti uya asikadi hama yake yaanoona, aangakwanisi kuda Mwari, uya waasikaoni.
21 Uye takatambira kubva kaari mutemo uu unoti: Uya anoda Mwari anodikanawo kuda hama yake.
Masoko ari pasi
^ Cigrego: “mwiya wese.”
^ Cigrego: “mwiya idzona.”
^ Kana kuti: “no rugondo.”
^ Kureya Djesu Kristu.
