Juau Wekutanga 5:1-21
5 Wese uya anotenda kuti Djesu ndi Kristu, wakabarhwa na Mwari. Uye uya anoda baba akaita kuti mwana abarhwe, anodawo mwana waakabara.
2 Nge ndaa yazvo tinoziya kuti tinoda ana a Mwari, kana tecida Mwari uye tecizwira mitemo yake.
3 Ngokuti kuda Mwari kunoreya kucengeta mitemo yake; uye mitemo yake airemi,
4 ngokuti wese uya wakabarhwa na Mwari unokunda nyika. Uye takakunda nyika no kutenda kedu.
5 Ndiani angakunda nyika? Andiepi uya anotenda kuti Djesu ndi Mwana wa Mwari?
6 Uu ndiye akauya peciseenzeswa mvura uye ngazi, Djesu Kristu, haiwa basi peciseenzeswa mvura, asi mvura uye ngazi. Uye mwiya unopasa upupuri nge zvazvo, ngokuti mwiya ndiwo cokwadi.
7 Ngokuti pano zviro zvitatu zvinopasa upupuri:
8 Mwiya, mvura uye ngazi; uye zvese zviri zvitatu zvinopindirana.
9 Kana tecitendawo upupuri we anhu, upupuri wa Mwari ndiwo ukuru. Ngokuti upupuri wa Mwari ndiwo uu: Upupuri waakapasa panocokuita no Mwana wake.
10 Uya anotenda mu Mwana wa Mwari ano upupuri mu mwoyo make. Uya asikatendi muna Mwari anomuita munyepi, ngokuti aatendi upupuri wakapaswa na Mwari unocokuita no Mwana wake.
11 Uye uu ndiwo upupuri wakhona: Wekuti Mwari akatipasa upenyu usikaperi; uye upenyu uu uri mu Mwana wake.
12 Uya ano Mwana* ano upenyu uwona; uya asina Mwana wa Mwari aana upenyu uwona.
13 Inini ndiri kumutarirai izvi kuitira kuti imwimwi, ekuti munotenda mu zina re Mwana wa Mwari, muziye kuti muno upenyu usikaperi.
14 Uye iri ndiro rugondo ratinaro maari,* kuti kana tikakumbira ciro cipi haco maererano no kuda kake, iyena anotizwa.
15 Uye kana teciziya kuti iyena anotizwa panocokuita no zviya zvatinokumbira, tinoziya kuti ticazogara no zviya zvatinokumbira, ngokuti tazvikumbira iyena.
16 Kana munhu akaona hama yake yeciita citema cisikakonzeri rufu, iyena acamuitira munamato, uye Mwari acamupasa upenyu, zvezvirokwazvo acaupasa ku aya asikazi kuita citema cinokonzera rufu. Pano citema cinokonzera rufu. Andiripi kureketa kuti anodikana kuita munamato panocokuita no citema ici cinokonzera rufu.
17 Mushobo wese we kutama kupangidza unatsi ndi citema; asi pano citema cisikakonzeri rufu.
18 Tinoziya kuti wese uya wakabarhwa na Mwari aagari eciita citema, asi uya* akabarhwa na Mwari anomudziirira, uye Wakashata aamupsvasi.*
19 Tinozviziya kuti tinobva kuna Mwari, asi nyika yese iri mu simba re Wakashata.
20 Uye tinozviziya kuti Mwana wa Mwari akauya uye akatipasa ungwaru, kuti tigare no ruziyo ra Mwari we zvirokwazvo. Uye peciseenzeswa Djesu Kristu, isusu tiri mu rubatano no uya we zvirokwazvo. Uu ndiye Mwari we zvirokwazvo uye anopasa upenyu usikaperi.
21 Ana angu anodiwa, dzingwarirei panocokuita no zvidhori.
Masoko ari pasi
^ Kureya, Mwana wa Mwari.
^ Kana kuti: “iri ndiro rusudzunuko ratinaro patinoreketa naye.”
^ Kureya Djesu Kristu, Mwana wa Mwari.
^ Kana kuti: “aamubati.”