Pedru Wekutanga 1:1-25
1 Inini Pedru, muphostori wa Djesu Kristu, ndiri kutarira imwimwi akasanangurhwa, agari e nguwa doko akabararika ku Ponto, Garatiya, Kapadhosiya, Aziya, uye Bhitiniya
2 maererano no kuziya zve mu nguwa yo mberi ka Mwari Baba, ku anhu akaceneswa no mwiya mucena, ano cinangwa cokuti azwire uye awawaizirhwe* ngazi ya Djesu Kristu:
Nyasha uye runyararo ngazvitunhudzirhwe kamuri.
3 Ngaakudzwe Mwari, Baba a Tenzi wedu Djesu Kristu, ngokuti maererano no usisi wake ukuru iyena akatiita kuti tibarhwe papsva togara no kariro isikaperi, eciseenzesa rumuko ra Djesu Kristu kubva ku akafa,
4 kuti tigare no nhaka isikaori, isikazi kusvipiswa uye inorumbwa iripo nokusikaperi. Iyona yakacengeterhwa imwimwi kudenga,
5 ekuti muri kucengetedzwa no simba ra Mwari peciseenzeswa kutenda kuti muone ruponeso rakagadzirirhwa kuzopangidzwa mu nguwa yokupedzesera.
6 Nge ndaa yazvo, imwimwi muri kupfara maningi, kunyazi mecidikana kutsukwara ke nguwa doko nge ndaa ye miyedzo yakasiyana-siyana,
7 kuti kutenda kenyu kakaedzwa, uko kunokosha maningi kudarika oro inotsakatika kunyazi iyona yakapiswa* no muriro, kozoita kuti pagare no kusimbwa, kukudzwa no kureremedzwa pa kupangidzwa ka Djesu Kristu.
8 Kunyazi musati makambomuona, imwimwi munomuda. Kunyazi musikamuoni zvino, imwimwi munotenda maari uye munopfara maningi no mupfaro usikapanganidziki uye unoshamisa,
9 pamunonga meciona ruponeso renyu,* nge kutenda kenyu.
10 Ngezve ruponeso iri, aphorofita akaphorofita ngezve nyasha dzamakapangidzirhwa, akanyasa kuongorora uye akanyasa kukwarakwatisa.
11 Awona aipsvaka kuziya ngezve nguwa kamare uye mugariro we zviro wekuti mwiya mucena wainga uri maari waiapangidza ngezva Kristu, pawaiapupurira ngezve matambudziko aizosongana na Kristu uye ngezve kukudzwa kaizoteera.
12 Mwari akapangidza aphorofita kuti ainga asikaseenzeri awona kamare, asi imwimwi, panocokuita no zviro zvamakaziiswa no aya akamuziisai masoko akanaka nge mwiya mucena wakatumwa wecibva kudenga. Ngirozi dzino cido cakakura maningi ce kuda kuziya* zviro izvi.
13 Ndiyo ndaa, gadzirirai ndangariro dzenyu kuti museenze; rumbwai makarinda; kariro yenyu ngaigare pa nyasha dzinozounziswa kamuri pa kupangidzwa ka Djesu Kristu.
14 Hinga ana anozwira, imai kutongwa no zvido zvamainga munazvo musati maakuziya,
15 asi kuitawo hinga Mucena wakamudainzai, garai akacena pa muhambiro wenyu wese,
16 ngokuti zvakatarhwa kuti: “Garai akacena, ngokuti inini ndakacena.”
17 Uye kana mecidainza Baba anotonga asikasananguri maererano no mabasa a umwe na umwe, garai no muhambiro we kuthya pa nguwa yamunonga muri agari e nguwa doko.
18 Ngokuti imwimwi munoziya kuti amuzi kusudzunurhwa no zviro zvinoora, no prata kana kuti no oro, pa maitiro enyu akashata amakasiirhwa no madzitsekuru enyu.
19 Asi makasudzunurhwa no ngazi ya Kristu, yakaita hinga yo bira risina pakashata uye risikazi kuremara.
20 Zvirokwazvo nge zvekuti, iyena akaziikanwa nyika isati yaizwa, asi akazopangidzwa pa nguwa yokupedzesera nge ndaa yenyu.
21 Peciseenzeswa iyena, imwimwi munotenda muna Mwari, uya akamumutsa kubva ku akafa uye akamupasa rukudzo, kuitira kuti kutenda kenyu uye kariro zvigare muna Mwari.
22 Zvino, ngokuti imwimwi makadzicenesa* ngo kuzwira kenyu cokwadi zvoita kuti mude hama dzenyu musikacengedzeri, idai umwe na umwe wenyu no mwoyo wese.
23 Ngokuti imwimwi makabarhwa papsva, haiwa no mbeu inoora, asi no mbeu isikaori* peciseenzeswa soko ra Mwari mupenyu, anorumbwa aripo nokusikaperi.
24 Ngokuti “anhu ese akaita hinga shango, uye kukudzwa kawo hinga maruwa o mushango; shango rinooma, uye ruwa rinombwera,
25 asi soko ra Djehovha* rinorumbwa riripo nokusikaperi.” Uye “soko” iri ndiwona masoko akanaka amakaziiswa.
Masoko ari pasi
^ Kana kuti: “amizirhwe.”
^ Kana kuti: “yakagadziriswa.”
^ Kana kuti: “ruponeso re mwiya yenyu.”
^ Kana kuti: “kuona nge padhuze.”
^ Kana kuti: “makacenesa mwiya yenyu.”
^ Kureya, mbeu inobara micero.
^ Onai Apendi. A5.
