Pedru Wekutanga 2:1-25
2 Hino siyai mushobo wese we zviro zvakashata, utsotsi, ucengedzi, bibvu uye no mapsveda.
2 Hinga ana abva kubarhwa, garai no cido cakakura ce mukaka usikazi kusvipiswa* we soko, kuitira kuti peciseenzeswa irona mukure dakara pa kuponeswa,
3 ngokuti makaziya* kuti Tenzi akanaka.
4 Pamunonga mecikhwedera kaari, buwe ripenyu rakarambwa no anhu, asi rakasanangurhwa uye rinokosha kuna Mwari,
5 imwimwi kamare, hinga mapuwe mapenyu, muri kuwakwa hinga nyumba ye ku mwiya kuti mugare apristi akacena, kuitira kuti mupire zvibairo zve kumwiya zvinotenderhwa na Mwari peciseenzeswa Djesu Kristu.
6 Ngokuti Matarhwa anoti: “Onai! Ndiri kukanda mu Ziyoni buwe rakasanangurhwa, buwe rinokosha re pakhona re fundasau, uye apana munhu anotenda mariri acazotsumba.”*
7 Ngokudaro, kamuri iyena anokosha, ngokuti imwimwi muri atendi; asi kuno aya asikatendi, “buwe rakarambwa no awaki ndiro rakazogara buwe guru re pakhona”*
8 uye “buwe rinokuhunyisa uye buwe rinombwedza.” Awona anokuhunyika ngokuti aazwiri soko. Izvi ndizvo zvaanoetsera.
9 Asi imwimwi muri “dzinza rakasanangurhwa, apristi uye madzimambo, dzinza rakacena, anhu ake aanoda” kuti muziise kwese-kwese kunaka kukuru ka Uya akamudainzai mu cidima, omupindisai mu ciedza cake cinoshamisa.
10 Ngokuti kare imwimwi mainga musiripi anhu a Mwari, asi zvino maa anhu ake; kare imwimwi mainga musikazwirhwi usisi, asi zvino maakuzwirhwa usisi.
11 Hama dzinodiwa, ndinomukohomedzesai hinga agari e nyika imweni uye agari e nguwa doko kuti murumbwe mecisiyana no zvido zve nyama, zviri kurhwisana na imwimwi.*
12 Rumbwai muno muhambiro wakanaka pakati pe anhu e madzinza amweni, kuitira kuti paanozomupumhai kuti munoita zvakashata, aone mabasa enyu akanaka, uye izvona zvinozoaita kuti akudze Mwari pa zuwa rake re kuongorora.
13 Nge ndaa ya Tenzi, dzikandei pasi po zviro zvese zvakaizwa nge anhu, angadai ari mambo kana munhu ano masimba kudarika imwimwi,
14 kana magovhernadhori akatumwa na mambo kuti aphanice aya anoshaisha no kusimba aya anoita zvakanaka.
15 Ngokuti Mwari anoda kuti kuita kenyu zvakanaka, kunyaradze makani o aya asikarangariri anoreketa zviro zvisina nzero.
16 Garai anhu akasudzunuka, musaseenzese rusudzunuko renyu kuti muite zvakashata, asi riseenzesei hinga aranda a Mwari.
17 Kudzai anhu e mishobo yese, idai hama dze mu nyika yese, ithyai Mwari, kudzai mambo.
18 Aseenzi ngaadzikande pasi pe madzitenzi awo no rureremedzo rese rakasisira, haiwa basi kuno aya akanaka uye anozwisisa, asiwo ku aya anoshupha kupfadza.
19 Ngokuti kana munhu ecishingirira matambudziko uye ecibathwa zvisikazi kunaka nge ndaa ye hana yake pamberi pa Mwari, izvona zvinopfadza.
20 Ngokuti zvinobetserei kana imwimwi mecishingirira kupondwa ngokuti mashaisha? Asi kana imwimwi mecishingirira matambudziko ngokuti muri kuita zvakanaka, izvona zvinopfadza Mwari.
21 Zvezvirokwazvo, imwimwi makatodainzirhwa izvona, ngokuti Kristu kamare akamutambudzikirai, ecimusiirai muezaniso kuti munyase kumuteera* mecihamba no maakatsika namo.
22 Iyena aazi kuita citema, kana kureketa masoko e kunyepa.
23 Paaitukwa, iyena ainga asikatukiwo. Paaitambudzika, iyena ainga asikathyisidziri, asi aizvikanda mu nyara dze Uya anotonga no unatsi.
24 Iyena akathwara zvitema zvedu mu mwiri wake kamare pa mutanda,* kuti tife* pa zvitema zvedu uye toraramira unatsi. Uye “maronda ake akaita kuti muporeswe.”
25 Ngokuti mainga makaita hinga mabira akapsveteka, asi zvino mahwirira ku muushi uye muonereri we mwiya yenyu.*
Masoko ari pasi
^ Kana kuti: “mukaka wakacena.”
^ Kana kuti: “makaona.”
^ Cigrego: “ucapsveruka.”
^ Cigrego: “musoro we pakhona.”
^ Kana kuti: “no mwiya yenyu.”
^ Kana kuti: “kumuteera nge padhuze.”
^ Kana kuti: “pa muti.”
^ Kana kuti: “tisudzunurhwe.”
^ Kana kuti: “upenyu wenyu.”
