Pedru Wekutanga 3:1-22
3 Ngo mushobo umwewo, imwimwi akadzi dzikandei pasi pe amuna enyu, kuitira kuti kana pane asikazwiri soko ra Mwari, agume pa kuzwira pasina soko rarekethwa, asi nge ndaa ye zviito zve akadzi awo,
2 ngokuti anonga adzionera oga zviro zvakanaka zvamunoita, pamwepo no rureremedzo rikuru.
3 Kurungama kenyu ngakusagare ko kunza basi, kakaita hinga kuruka tsitsi, kupfeka zviro zvo kurungamisa mwiri zvakaizwa ngo oro, kupfeka macira akarungama maningi;
4 asi garai anhu akarungama ngo mukati, akapfeka cipfeko cisikaori ce kugara munhu akaterama uye mupfawi, izvi zvinokosha maningi pamberi pa Mwari.
5 Ngokuti akadzi akatendeka e mu nguwa yokare, awo aietsera muna Mwari aidzirungamisawo kudaro, ecidzikanda pasi pe amuna awo,
6 hinga Sara waizwira Abrahamu, ecimudainza kuti tenzi. Imwimwi munozogara ana ake, kana mukarumbwa meciita zvakanaka uye musikathyi.
7 Ngo mushobo umwewo, imwimwi amuna rumbwai mecigara no akadzi enyu maererano no ruziyo.* Abatei no rureremedzo hinga mudziyo usikazi kubamba, ngokuti awona acazogarawo nhaka ye upenyu nge ndaa yo nyasha dza Mwari, ngokuti mukatama kudaro minamato yenyu aizwiki.
8 Pa kupedzesera, garai makabatana mu marangariro enyu,* mecirhwadziwa nge kutambudzika ke amweni, mecidanana hinga hama, mecizwirana usisi, uye kudzidodosa.
9 Musahwirinzire cakashata no cakashata kana kutuka no kutuka. Pane kudaro, komborerai, ngokuti ndizvo zvamakadainzirhwa, kuitira kuti mugare nhaka ye makomborero.
10 Ngokuti “uya unoda upenyu uye kuona mazuwa akanaka, unodikana kungwarira rurumi rake kuti risarekete zvakashata uye muromo wake kuti usarekete zvekunyepa.
11 Iyena ngaasiye zvakashata uye oita zvakanaka; iyena ngaapsvake runyararo uye opeta masimba kuti rirumbwe riripo.
12 Ngokuti madziso a Djehovha* ari pane anatsi, uye nzee dzake dzinopurutana kudeketera kawo, asi hope ya Djehovha* inozonda aya anoita zvakashata.”
13 Zvezvirokwazvo, ndiani acamuitirai zvakashata kana mukapeta masimba kuti muite zvakanaka?
14 Asi kunyazi mecitambudzika nge ndaa yo unatsi, imwimwi mucapfara. Hino, musathye zviya zvaanothya,* kana kunetseka.
15 Asi cenesai Kristu hinga Tenzi mu mwoyo menyu, mogara makagadzirira kudaira munhu wese unomubvunzisai ngezve kariro yenyu yamunayo, asi mecizviita no upfawi uye no rureremedzo rikuru.
16 Rumbwai muno hana yakanaka, kuti pese paanoreketa zvakashata nge zvenyu, apsveruke nge ndaa ye muhambiro wenyu wakanaka hinga ateeri a Kristu.
17 Ngokuti zviri nani kuti mutambudzike ngokuti muri kuita zvakanaka, kana Mwari akazvitendera kuti zviitike, pane kuti mutambudzike ngokuti muri kuita zvakashata.
18 Ngokuti Kristu akafira zvitema kamwe basi, munhu munatsi akafira anhu asina unatsi, kuitira kuti amuendesei kuna Mwari. Iyena akafa pa nyama, asi akatambira upenyu pa mwiya.
19 Ngokudaro, iyena akaenda uye akaparidzira mwiya yainga iri mu kadheya,
20 yainga isikazi kuzwira Mwari paaietsera no mwoyo unononoka kutsamwa mu mazuwa a Nowa, areka payaiwakwa, yokuti yakaponesa anhu padoko basi, kana kuti anhu asere,* akaponeswa pa mvura.
21 Ciitiko ici, cinoseenza hinga muezaniso we rubhabhatidzo, riri kumuponesai zvino (haiwa nge kubviswa ke psvina pa nyama, asi nge kukumbira hana yakanaka kuna Mwari), peciseenzeswa rumuko ra Djesu Kristu.
22 Iyena ari ku moko kwawo wa Mwari, ngokuti akaenda kudenga; uye ngirozi, ano masimba no anokudzwa akakandwa pasi pake.
Masoko ari pasi
^ Kana kuti: “meciazwisisa.”
^ Kana kuti: “rangarirai nge mushobo umwewo.”
^ Onai Apendi. A5.
^ Onai Apendi. A5.
^ Mabhaibheri amweni anoti: “musathye kuthyisidzira kaanomuitai.”
^ Kana kuti: “mwiya misere.”
