Pedru Wekutanga 4:1-19
4 Ngokuti Kristu akatambudzika pa nyama, pfekaiwo marangariro amwewo e kudzipira; ngokuti munhu akatambudzika pa nyama wasiya zvitema,
2 kuti nguwa yake yasara ye kurarama pa nyama, asararamire kuita kuda ke anhu, asi kuti aite kuda ka Mwari.
3 Ngokuti nguwa yamakapedza meciita zvaidiwa no anhu e madzinza amweni yakwana, pa nguwa iyona imwimwi maigara no muhambiro unopsverusa,* cido cakanyanyisa ce kuda kuita zvepamaponde, meciraradza, meciita mabiko akanyanyisa, mecimwisa doro, uye meciita zvinorambidzwa no mutemo zvokunamata zvidhori.
4 Awona aazwisisi cikonzero cinomuitisai kuti mutame kuhambazve nawo mu upenyu wakashata, ndiyo ndaa anoreketa zvakashata nge zvenyu.
5 Asi anhu awona acadzidairira kuno uya akagadzirira kutonga apenyu no akafa.
6 Zvezvirokwazvo, ndizvona zvakaitisa kuti masoko akanaka aziiswewo ku akafa, kuitira kuti kunyazi ecitongwa pa nyama mu maonero e anhu, awona anorarama maererano no mwiya mu maonero a Mwari.
7 Asi kupera ke zviro zvese kaapadhuze. Hino, garai no ndangariro dzakanaka, uye garai makagadzirira* kuita munamato.
8 Kudarika zvese, idai maningi umwe na umwe wenyu, ngokuti rudo rinofukidza zvitema zvakawanda.
9 Tambiranai zvakanaka musikagurunguti.
10 Maererano no cipo cakapaswa umwe na umwe, ngaaciseenzese pa kuseenzera amweni hinga muonereri wakanaka we nyasha dza Mwari dzinopangidzwa nge mushobo wakasiyana-siyana.
11 Kana munhu ecireketa, ngaaite izvona hinga ari kureketa masoko anobva kuna Mwari; kana munhu eciseenzera, ngaaite izvona no simba raanopaswa na Mwari; kuitira kuti mu zviro zvese, Mwari akudzwe peciseenzeswa Djesu Kristu. Kukudzwa no simba nge zvake nokusikaperi. Ameni.
12 Hama dzangu dzinodiwa, musashamisike no miedzo yakakura yamunobatana nayo, hinga kuti zviri kuitika kamuri i zviro zvipsva.
13 Pane kudaro, rumbwai mecipfara pamunonga mecibatana no matambudziko hinga akabatanawo na Kristu, kuitira kuti imwimwi mupfarewo uye mudzare no mupfaro pa kupangidzwa ke rukudzo rake.
14 Kana mecishorhwa* nge ndaa ye zina ra Kristu, imwimwi munopfara, ngokuti mwiya we rukudzo, honde, mwiya wa Mwari uri pamuri.
15 Ngokudaro, pakati penyu ngapasaoneke munhu anotambudzika ngokuti ndi muurai, i mbavha, unoita zvakashata kana kuti unopindira mu nyaya dzisiripi dzake.
16 Asi kana munhu ecitambudzika ngokuti ndi Mukristu, ngaasapsveruke, asi ngaarumbwe ecikudza Mwari paanodainzwa nge zina iri.
17 Ngokuti ino ndiyo nguwa yakasanangurhwa yokuti kutongwa kutange no nyumba ya Mwari. Hino kana kukatanga na isusu, ndi upi mugumisiro we aya asikazwiri masoko akanaka a Mwari?
18 “Uye kana munhu munatsi ecidikana kupeta masimba kuti aponeswe, cinyi cicaitika no munhu unoita zvakashata uye no unoita citema?”
19 Hino, aya ari kutambudzika nge ndaa yokuti ari kuita kuda ka Mwari, anodikana kudzipira ku Musiki akatendeka paanonga eciita zvakanaka.
Masoko ari pasi
^ Soko iri mu Cigrego rinozwi asélgeia, irona rinobatanidza zvakawanda. Onai pakazwi Kupanganidzwa ke Masoko.
^ Kana kuti: “makarinda; makangwarira.”
^ Kana kuti: “mecitukwa.”
