Pedru Wekutanga 5:1-14
5 Hino inini, wekutiwo ndiri mukuru we ungano, mupupuri we kutambudzika ka Kristu uye hinga munhu ucatambirawo rukudzo ricapangidzwa, ndinopasa kohomedzeso ii ku akuru e ungano ari pakati penyu:
2 Ushai mabira a Mwari, awo amuri kungwarira, meciseenza hinga aonereri,* musikaiti zvekubambidzirhwa, asi zvecibva pa mwoyo hinga zvinodiwa na Mwari; musikazviiti nge kuda upfumi, asi mecizviita no mwoyo wese;
3 musikadziiti madzitenzi e aya ari nhaka ya Mwari, asi mecigara muezaniso ku mabira.
4 Uye muushi mukuru paacapangidzwa, imwimwi mucapaswa korowa yo rukudzo isikaori.
5 Nge mushobo umwewo, imwimwi madjaha, dzikandei pasi pe anarume akuru.* Asi mwese pfekai kudzidodosa* pa zvese zvamunoitirana, ngokuti Mwari anozonda aya anodzikudza, asi anopangidza nyasha dzake ku aya anodzidodosa.
6 Hino dzidodosei pasi pe moko wa Mwari uno simba, kuti amukudzei pa nguwa yakasisira,
7 mecikhandira kaari zvese zvinomurhyai mwoyo,* ngokuti iyena anomucengetai.
8 Garai makarinda uye ngwarirai! Muzondi wenyu Dhiyabhurosi unohamba-hamba hinga mhondoro inorudza yecipsvaka wekurhya.
9 Asi rhwisanai naye, muno kutenda kakabamba, meciziya kuti matambudziko amuri kubatana nawo ari kubatanawo no hama dzenyu dziri mu nyika yese.
10 Asi mumasure mekuti mashuphika padoko, Mwari we nyasha dzese, uya akamudainzai kuti mupinde mu rukudzo rake risikaperi mu rubatano na Kristu, acapedzesa kumufundisai. Iyena acamubambisai, acamupasai simba, acamukandai pa fundasau yakabamba.
11 Iyena ngaagare no simba nokusikaperi. Ameni.
12 Ndeciseenzesa Sirvhano,* uwo wandinoona hinga hama yakatendeka, ndamutarirai no masoko padoko kuti ndimubambisei uye ndimubvunzei no mwoyo wese kuti idzi ndidzo nyasha dza Mwari dze zvirokwazvo. Imai makabamba madziri.
13 Mwanakadzi ari mu Bhabhironi, wakasanangurhwa hinga imwimwi, ari kumutambisai, uye Marko mwana wangu, ari kumutambisaiwo.
14 Cungamidzanai no mwoyo wese.*
Imwimwi mwese muri mu rubatano na Kristu, garai no runyararo.
Masoko ari pasi
^ Kana kuti: “mecinyasa kuaonerera zvakanaka.”
^ Kana kuti: “akuru e ungano.”
^ Kana kuti: “kudzidodosa mu ndangariro.”
^ Kana kuti: “zvinomunetsai.”
^ Unodainzwawo kuti Sirasi.
^ Cigrego: “beju re rudo.”
