Timoti Wekutanga 1:1-20
1 Inini Pauro, muphostori wa Kristu Djesu wakatumwa na Mwari Muponesi wedu uye na Kristu Djesu kariro yedu,
2 ndiri kutarira Timoti,* mwana wangu wakagondeka mu kutenda:
Nyasha, usisi no runyararo zvinobva kuna Mwari Baba na Kristu Djesu Tenzi wedu ngazvigare na iwewe.
3 Hinga zvandakakukohomedzesa kuti ugare ku Efeso pandainga ndecida kuenda ku Masedhoniya, hingana zvandiri zvino, kuti unodikana kubvunza anhu amweni kuti asafundise fundiso yakasiyana,
4 aadikani kupurutana ngano dze kunyepa dzo madzinza e kare. Zviro izvi azvibetseri ciro, asi zvinoita kuti anhu arekete zvaasina cokwadi nazvo uye azvipindirani no zvatakapaswa na Mwari kuti zvibambise kutenda kedu.
5 Zvezvirokwazvo, cinangwa ce nhungamiriro ii* ngece kuti tinodikana kugara no rudo rinobva mu mwoyo wakacena, hana yakanaka uye no kutenda kusina ucengedzi.
6 Amweni akapauka pa kuita zviro izvi, ocengedzwa no kureketedzana ngo zviro zvisina basa.
7 Anoda kugara afundisi e mutemo, asi aazwisisi zviro zvaanoreketa kana zviro zvaanobatisisa kufundisa.
8 Tinoziya kuti Mutemo wakanaka kana munhu eciuseenzesa zvakanaka,
9 teciziya kuti mitemo aizi kuizirhwa munhu munatsi, asi yakaizirhwa aya asikazwiri mutemo no apanduki, akashata mwoyo, ashaishi, asikazi kugondeka* no asikazi kucena, anouraya baba kana mai, mabhinya,
10 anoita uhure,* anarume anoita zvepamaponde no anarume amweni,* anoba anhu, anonyepa, anopika zve kunyepa,* uye zviro zvese zvisikapindirani no fundiso yakanaka,*
11 maererano no masoko akanaka anokudzwa a Mwari anopfara, andakapaswa.
12 Ndinotenda Kristu Djesu Tenzi wedu, akandipasa simba, ngokuti akaona kuti ndakagondeka kuti andigadze pa basa iri,
13 kunyazi hazvo ndainga ndiri munhu unotuka, unoteerera uye unoita zvakashata. Asi ndakazwirhwa usisi ngokuti ndaizviita ndisikazvizii uye ndainga ndisina kutenda.
14 Asi nyasha dzandakapangidzirhwa na Tenzi wedu dzakakura maningi pamwepo no kutenda uye rudo zviri muna Kristu Djesu.
15 Masoko aya ngee zvirokwazvo uye akasisira kutendwa no mwoyo wese: Kristu Djesu akauya pa nyika kuzoponesa ashaishi. Pa ese aya, inini ndini mushaishi mukuru.
16 Asi ndakazwirhwa usisi, kuitira kuti Kristu Djesu apangidze kunonoka kutsamwa kake, ecindiita muezaniso kuno aya anopangidza kutenda kaari kuti azogare no upenyu usikaperi.
17 Kuna Mambo asina mugumo, asikafi,* asikaoneki, Mwari umwe basi, ngaakudzwe no kureremedzwa nokusikaperi. Ameni.
18 Ndiri kukupasa nhungamiriro ii* mwana wangu Timoti, maererano no zvakaphorofithwa nge zvako, kuitira kuti maererano no uphorofita uwona urumbwe wecirhwa hondo yakanaka,
19 wecirumbwa uno kutenda no hana yakanaka, yakarambwa nge amweni, zvoita kuti kutenda kawo kundondomere hinga bharko mu mvura.
20 Amweni awo ndi Imenereu na Areshandre, andakapasa kuna Sathani kuti apangirhwe uye kuti afundiswe kutama kutuka.
Masoko ari pasi
^ Kureya kuti “Uya Anokudza Mwari.”
^ Kana kuti: “mutemo uu.”
^ Kana kuti: “asina rudo rakagondeka.”
^ Onai pakazwi Kupanganidzwa ke Masoko.
^ Cigrego: “anarume anowata no anarume amweni.”
^ Kana kuti: “akapauka pakunamata.”
^ Kana kuti: “inobetsera.”
^ Cigrego: “asikaori.”
^ Kana kuti: “mutemo uu.”
