Timoti Wekutanga 2:1-15
2 Hino, pakutanga ndinomukohomedzesai mwese kuti muite munamato kuna Mwari kuti abetsere amweni, mecideketera, uye mecikumbira pamwepo no kutenda Mwari ngo pamusoro pe anhu ese,
2 kutobatanidzawo madzimambo uye no ese aya anozvigaro zvo pamusoro, kuti tirumbwe tecirarama upenyu wakaterama uye uno runyararo, takanyasa kudzipira kuna Mwari uye teciita zviro no mwoyo wese.
3 Izvi zvakanaka uye zvinopfadza Mwari, Muponesi wedu,
4 uya anoda kuti anhu akasiyana-siyana aponeswe uye agume pa kugara no ruziyo re zvirokwazvo pamusoro pe cokwadi.
5 Ngokuti kuna Mwari umwe basi, no muimiriri umwe basi pakati pa Mwari no anhu, munhuwo ndi Kristu Djesu,
6 akadzipira hinga rusudzunuro rinoenderana no anhu ese; izvi ndizvona zvicapupurirhwa nge zvazvo pa nguwa yakasisira.
7 Kuti upupuri uu uizwe, ndakagadzwa kuti ndigare muphostori, ndiri kubhuya zvirokwazvo, andiripi kunyepa, mufundisi we anhu e madzinza amweni ngo pamusoro po kutenda uye cokwadi.
8 Hino ndinoda kuti mu mbuto dzese dzamunoungana, anarume arumbwe eciita munamato, akamutsa nyara dzawo dzakagondeka, asina shungu uye asikareketedzani.
9 Ngo mushobo umwewo, anakadzi anodikana kupfeka macira ano rureremedzo,* zvinopangidza kugara no maonero ari pakati no pakati uye marangariro akanaka, haiwa kuruka tsitsi no oro kana maperora kana kupfeka macira anodhura maningi,
10 asi ngaapfeke nge mushobo wakasisira hinga anakadzi anonamata Mwari, kana kuti nge mabasa akanaka.
11 Mwanakadzi ngaafunde akanyarara,* ecidzikanda pasi.
12 Anditenderi kuti mwanakadzi afundise kana kuti atonge mwanarume, asi unodikana kurumbwa akanyarara.*
13 Ngokuti Adhamu ndiena wakatanga kuizwa, pedzepo wakazoizwawo Evha.
14 Uyezve, Adhamu aazi kucengedzwa, asi mwanakadzi ndiena kamare wakacengedzwa uye wogara mushaishi.
15 Ngokudaro, iyena unozoponeswa nge kubara ana, kana iyena* akarumbwa ari mu kutenda, mu rudo uye mu kucena, ano marangariro akanaka.
Masoko ari pasi
^ Kana kuti: “akasisira.”
^ Kana kuti: “akaterama.”
^ Kana kuti: “akaterama.”
^ Cigrego: “awona.”
