Timoti Wekutanga 3:1-16
3 Masoko aya ngee zvirokwazvo: Kana mwanarume ecipeta masimba kuti agare muonereri, iyena ari kuda basa rakanaka.
2 Ngokudaro, muonereri anodikana kugara asina caanopumhwa, mwamuna we mukadzi umwe basi, anodzibata, ano marangariro akanaka, akarongeka, anotambira arendo zvakanaka,* anokwanisa kufundisa,
3 aadikani kugara cidhakwa, asikaiti madziyo,* asi anozwisisa, asikareketedzani, asikadisisi maningi mare,
4 anodikana kutungamirira zvakanaka mhuri yake, ano ana anozwira no mwoyo wese,
5 (ngokuti kana mwanarume asikakwanisi kutungamirira mhuri yake, angazokwanisa kutungamirira kudini ungano ya Mwari?),
6 aadikani kugara munhu wabva kutendeuka, kuti atame kuzodzikudza maningi uye wopaswa muphanico wakaezana no wa Dhiyabhurosi.
7 Uyewo, anodikanawo kupupurirhwa zvakanaka* no anhu o kunza kuti asashorhwe uye asambwere pa musungo wa Dhiyabhurosi.
8 Abati anoseenzera anodikana kugara anhu anoita zviro no mwoyo wese, asina masoko mairi,* aadikani kumwisa maningi doro, aadikani kuda kuona upfumi ngo mushobo wakashata,
9 anodikana kubatisisa zvakaigika zva Mwari zve kutenda no hana yakacena.
10 Uyezve, anodikana kutanga aongororhwa kuti aoneke kuti anosisira;* pedzepo ozoseenza hinga aseenzi, kana asina caanopumhwa.
11 Anakadzi anodikanawo kuita zviro no mwoyo wese, asikareketi mapsveda, anodzibata, akatendeka mu zviro zvese.
12 Abati anoseenzera anodikana kugara no mukadzi umwe basi, anotungamirira zvakanaka ana awo, pamwepo no mhuri yawo kamare.
13 Ngokuti anarume anoseenzera zvakanaka ari kudzipsvakira zina rakanaka uye anokwanisa kureketa no rugondo ngezve kutenda muna Kristu Djesu.
14 Ndiri kukutarira zviro izvi, kunyazi ndecietsera kuuya ikona kookuona nokukasika,
15 kuitira kuti kana ndikanonoka, uziye magariro aunodikana kupangidza hinga munhu we mhuri ya Mwari, yokuti i ungano ya Mwari mupenyu, inobetsera no kudziirira cokwadi.
16 Zvezvirokwazvo, zviri pamhene kuti zvakaigika zva Mwari zve kudzipira no mwoyo wese kaari zvakakura maningi: ‘Iyena akapangidzwa pa nyama, akazwi munatsi mu mwiya, akadzipangidza ku ngirozi, akaparidzwa nge zvake pakati pe anhu e madzinza amweni, akatendwa mu nyika, akatambirhwa kudenga mu rukudzo.’
Masoko ari pasi
^ Kana kuti: “anobata zvakanaka anhu aasikazii.”
^ Kana kuti: “asikapondi.”
^ Kana kuti: “kugara no mbiri yakanaka.”
^ Kana kuti: “anocinja-cinja zvaanoreketa.”
^ Kana kuti: “akakwaniriswa.”
