Timoti Wekutanga 4:1-16
4 Asi soko rakafemerhwa rinobhuya* pamhene kuti mu nguwa inouya amweni acapauka pa kutenda, ecipurutana masoko anopausa* akafemerhwa uye no fundiso dzo madhimoni,
2 ecikweiwa nge ucengedzi we anhu anoreketa manyepo uye ano hana dzinoita hingana dzakapiswa nge simbi inokanda cipangidzo.
3 Awona anorambidza mucato, uye anobvunza anhu kuti asarhye zvokurhya zvakasikwa na Mwari kuitira kuti aya ano kutenda uye anoziya cokwadi azvirhye uye akudze* Mwari.
4 Ngokuti zvisikwa zvese zva Mwari zvakanaka, uye azvidikani kurambwa kana zvikarhyiwa mumasure me munamato we kutenda,
5 ngokuti zvinoceneswa nge soko ra Mwari uye no munamato.
6 Kana ukapasa hama mazano aya, ucagara museenzi wakanaka wa Kristu Djesu, wakabambiswa ngo masoko okutenda uye no fundiso yakanaka yauri kuteera wakanyasa kutendeka.
7 Asi ramba ngano dze kunyepa dzinoshatisa zviro zvicena, hingana dziya dzinopanganidzwa no anakadzi acembera. Ngo dii rimweni, gara no cinangwa ce kudziroedza pa kudzipira no mwoyo wese kuna Mwari.
8 Ngokuti kuroedza* mwiri kunobetsera padoko, asi kudzipira no mwoyo wese kuna Mwari kunobetsera mu zviro zvese, sezvo kuno gondeso ye upenyu uno uye no upenyu unozouya.
9 Masoko aya ngee zvirokwazvo uye akasisira kutendwa no mwoyo wese.
10 Ndiyo ndaa, tiri kuseenza tisikarembi uye tecipeta masimba, ngokuti takakanda kariro yedu kuna Mwari mupenyu, Muponesi we anhu ese, maka-maka ku akatendeka.
11 Rumbwa wecipasa mitemo ii uye no kuifundisa.
12 Usatendere kuti munhu upi hake akudheerere ngokuti uri mwana mudoko. Asi, gara muezaniso ku anhu akatendeka, pa kureketa, pa kudzibata, pa rudo, pa kutenda no pa tsika dzakacena.
13 Rumbwa wecipeta masimba pa kuerenga pamberi pe anhu akawanda, wecibambisa* amweni no kuafundisa dakara ndauya.
14 Usasiye kuseenzesa cipo ciri mauri cawakapaswa peciseenzeswa uphorofita, pa zuwa rawakatsanzikwa nyara ngo dare ro akuru.
15 Nyasa kurangarira zviro izvi; kanda ndangariro dzako pa zviri, kuti kubudirira kako pa kunamata kunyase kuoneka nge anhu ese.
16 Nyasa kudzingwaririra iwewe pacako no mafundisiro ako. Shingirira mu zviro izvi, ngokuti kana ukaita kudaro ucadziponesa iwewe pacako no aya anokupurutana.
Masoko ari pasi
^ Cigrego: “mwiya unoreketa.”
^ Cigrego: “mwiya unocengedza.”
^ Kana kuti: “atende.”
^ Kana kuti: “ezersisiyo ye.”
^ Kana kuti: “wecikohomedzesa.”
