Timoti Wekutanga 5:1-25
5 Usasumurure mwanarume wacembera no shungu. Asi reketa naye zvakanaka hingana uri kureketa na baba ako; ku madjaha hingana anukuna ako;
2 ku anakadzi acembera hingana madzimai; ku asikana hingana madziyaya ako, no kucena kwese.
3 Betsera* afirhwakadzi kana ari afirhwakadzi kamare.*
4 Asi kana mufirhwakadzi uno ana kana azukuru, awona ngaatange kupangidza kuti akadzipira kuna Mwari no mwoyo wese mu mhuri yawo uye ngaacengetewo abereki awo no madzimbiya awo, ngokuti izvi ndizvona zvinopfadza Mwari.
5 Mufirhwakadzi unonga ari mufirhwakadzi kamare wokuti apana munhu unomuriritira, unokanda kariro yake kuna Mwari uye unorumbwa eciita munamato ecideketera usiku no masikati.
6 Asi mufirhwakadzi unoda zve kupfadza nyama yake basi wakafa, kunyazi hazvo ari mupenyu.
7 Hino rumbwa wecipasa nhungamiriro* idzi, kuitira kuti awona asagare no caanopumhwa.
8 Zvezvirokwazvo, kana munhu akaramba kuriritira aya aanodikana kuriritira, asi maka-maka e mhuri yake, unonga aramba kutenda uye wakashata maningi kudarika munhu asikatendi.
9 Mwanakadzi unodikana kutarirhwa hinga mufirhwakadzi kana asiripi pasi pe makore 60, ari mwanakadzi wainga ano mwamuna umwe basi,
10 unoziikanwa ngo kuita mabasa akanaka, akadai hinga kurera ana, kutambira zvakanaka arendo,* kusuka tsoka dze acena, kubetsera aya ainga ecida rubetso, uye wainga akanyasa kudzipira pa kuita mabasa ese akanaka.
11 Asi usatarire afirhwakadzi anonga asati acembera, ngokuti kana zvido zvawo zve kuda kuita zvepamaponde zvikaapingaidza kuseenzera Kristu, awona anonga ecida kuwakwa.
12 Uye awona anodziunzisira kutongwa nge ndaa ye kusiya kawo kutenda kaainga anako pakutanga.*
13 Pa nguwa imweyo, awona anonyanya kugara asina cokuita, ecihamba mu mizi dze anhu; pane basi kuti agare asina cokuita, awona anoreketa mapsveda, ecipindira mu nyaya dzisiripi dzawo, ecireketa zviro zvaasikadikani kureketa.
14 Ngokudaro, ndinoda kuti afirhwakadzi asati acembera awakwe, abare ana, aite mabasa e pa nyumba, kuti asapase muphikisi mukana we kushora.
15 Zvezvirokwazvo, amweni awo akapauka kuti ateere Sathani.
16 Kana pano mwanakadzi mutendi ano hama dzake dziri afirhwakadzi, ngaadzibetsere, kuitira kuti ungano isagare no mutoro. Nge kuita izvona ungano icabetsera aya ari afirhwakadzi kamare.*
17 Akuru e ungano anotungamirira zvakanaka, anodikana kuzwi akasisira kureremedzwa zvakapethwa kairi, maka-maka aya anoseenza no simba pa kureketa no pa kufundisa.
18 Ngokuti Matarhwa anoti: “Musasunge muromo we n’ombe painonga yecipura tsangu dze zvirimwa,” uyewo: “Museenzi wakasisira kutambira mubairo wake.”
19 Usatendere kupumhwa ke mukuru we ungano pasina upupuri we anhu airi kana atatu.
20 Aya anoita citema asumurure pamberi pe anhu ese, kuti amweni asazviitewo.*
21 Ndinokukumbira pamberi pa Mwari na Kristu Djesu, no ngirozi dzakasanangurhwa kuti uteedzere nhungamiriro idzi usina dii raunotsigira kana kuita rusananguro.
22 Usakasike kukanda nyara yako pamusoro pe munhu,* uye usabatanidzwe mu zvitema zve anhu amweni; rumbwa wakacena.
23 Usarumbwe wecindomwa mvura basi, asi imwawo padoko vhinyu nge ndaa ye mundani mako uye kurhwara-rhwara kaunoita.
24 Zvitema zve anhu amweni zvinoziikanwa nge anhu ese, zvoaita kuti atotongwe nokukasika, asi zvitema zve anhu amweni zvinozoziikanwa no kuhamba ke nguwa.
25 Ngo mushobo umwewo, mabasa akanaka anozoziikanwa nge anhu ese, kunyazi akatama kuziikanwa, aazorumbwi akafisika.
Masoko ari pasi
^ Cigrego: “Reremedza.”
^ Kana kuti: “afirhwakadzi aya anonyasa kuda rubetso,” kureya aya asina anoariritira.
^ Kana kuti: “mitemo.”
^ Kana kuti: “kubata zvakanaka anhu aasikazii.”
^ Kana kuti: “gondeso yaainga aita pakutanga.”
^ Kana kuti: “afirhwakadzi aya anonyasa kuda rubetso,” kureya aya asina anoariritira.
^ Cigrego: “athye.”
^ Kureya kuti, usakasike kugadza munhu.