Timoti Wekutanga 6:1-21
6 Anhu ese ari pa djoki re uranda, ngaaone kuti madzitenzi awo akasisira kureremedzwa, kuitira kuti anhu asarekete zvakashata ngezve zina ra Mwari no fundiso dzake.
2 Uyezve, aya ano madzitenzi anotenda aadikani kuashora ngo kugara kawo hama. Asi anodikana kuaseenzera no mwoyo wese, ngokuti aya ari kubetserhwa no mabasa awo akanaka, ndi atendi uye anhu anodiwa.
Rumbwa wecifundisa zviro izvi uye wecipasa kohomedzeso idzi.
3 Kana munhu akafundisa fundiso imweni, asikatenderani no fundiso yakanaka* inobva kuna Tenzi wedu Djesu Kristu, kana fundiso inoenderana no kudzipira no mwoyo wese kuna Mwari,
4 wakadzara no kudzikudza uye apana caanozwisisa. Unopfarira maningi kuita hasha uye kureketedzana nge ndaa ye masoko. Zviro izvi, zvinoita kuti pagare no bibvu, kureketedzana, mapsveda, kurangaririrana zvakashata,
5 kureketedzana nguwa dzese nge zviro zvisikabetseri ku anhu ano marangariro akaora uye asina cokwadi, anorangarira kuti kudzipira no mwoyo wese kuna Mwari ndi mushobo we kuona nawo upfumi.
6 Zvezvirokwazvo, kudzipira no mwoyo wese kuna Mwari pamwepo no kugutsikana* i pfuma huru.
7 Ngokuti apana catakabarhwa tinaco pa nyika, uye tikafa apana catinotora.
8 Ndiyo ndaa, kana tino cokurhya* no cokupfeka* tinogutsikana nazvo.
9 Asi aya anoshinga kugara apfumi anowira pa muedzo, pa murau, uye no kusirira zviro zvakawanda zvisikabetseri uye zvinokuwadza, izvi zvinoitisa kuti awona atambudzike no kufa.
10 Ngokuti kudisisa maningi mare ndiwona mudzi we zviro zvese zvakashata uye amweni akapsvaka kugara no upfumi uwona, akapauswa pa kutenda uye akadzibarira matambudziko akawanda.
11 Ngokudaro, iwewe munhu wa Mwari, tiza zviro izvi. Asi psvaka unatsi,* kudzipira no mwoyo wese kuna Mwari, kutenda, rudo, kushingirira, uye upfawi.
12 Irhwa hondo yakanaka yo kutenda; batisisa upenyu usikaperi wawakadainzirhwa uye wawakaziisa pamhene pamberi pe apupuri akawanda.
13 Inini ndinokubvunza pamberi pa Mwari, anoita kuti zviro zvese zvirumbwe zviri zvipenyu uye no pamberi pa Kristu Djesu, uya akapasa upupuri wakanaka pamberi pa Ponsiyo Pirato
14 kuti uzwire mutemo nge mushobo wakacena uye usina caunopumhwa dakara pa kuoneka ka Tenzi wedu Djesu Kristu,
15 wekuti iyena anopfara uye Tenzi umwe basi Ano Simba acapangidzwa pa nguwa yakasisira. Iyena ndi Mambo we aya anotonga hinga madzimambo uye Tenzi we aya anotonga hinga madzitenzi,
16 ndiye ega basi asikafi, anogara mu ciedza cisikakhwederereki, wokuti apana munhu akambomuona uye apana anokwanisa kumuona. Iyena ngaakudzwe no kupaswa simba risikaperi. Ameni.
17 Pasa nhungamiriro* apfumi e nyika ino kuti asadzikudze, uye kuti asakande kariro yawo pa upfumi unopera, asi pana Mwari, uya anopasa zviro zvese zvinotipfadza.
18 Abvunze kuti aite zvakanaka, agare apfumi pa mabasa ese akanaka, agare no rupo, apasewo amweni zvaanazvo,
19 odziunganidzira upfumi usikaperi, uwo unogara fundasau yakanaka yo mu nguwa yo mberi; paanoita izvi, anobatisisa upenyu we zvirokwazvo.
20 Timoti, cengeta zvawakapaswa, wecigara kure no makani asikabetseri anoshatisa zviro zvicena no masoko e kuphikisa e manyepo aanoti “ruziyo.”
21 Nge ndaa ye kuda kuonesa ruziyo iri, amweni akapauka pa kutenda.
Nyasha dza Mwari ngadzigare na imwimwi.
Masoko ari pasi
^ Kana kuti: “inobetsera.”
^ Cigrego: “no kuona kuti tino zvakakwana.”
^ Kana kuti: “cokurarama naco.”
^ Mabhaibheri amweni anoti: “no pokugara.” Cigrego: “no cokudzifukidza.”
^ Onai pakazwi Kupanganidzwa ke Masoko.
^ Kana kuti: “Pangira.”
