Tsamba Yecipiri ku Akorinti 1:1-24
1 Inini Pauro, muphostori wa Kristu Djesu no kuda ka Mwari, uye Timoti hama yedu, ku ungano ya Mwari iri mu Korinti, kutobatanidzawo acena ese ari mu Akaya yese:
2 Nyasha no runyararo zvinobva kuna Mwari Baba edu na Tenzi wedu Djesu Kristu ngazvigare na imwimwi.
3 Ngaasimbwe Mwari uye Baba a Tenzi wedu Djesu Kristu, Baba e usisi ukuru uye Mwari we kunyaradza kese,
4 anotinyaradza* pa matambudziko edu ese,* kuti tikwanisewo kunyaradza amweni pa matambudziko awo ese, no kunyaradzwa katinoizwa na Mwari.
5 Ngokuti kutambudzika katinoita nge ndaa ya Kristu pa kunotunhudzirika, kunyaradzwa katinoizwa peciseenzeswa Kristu kunotunhudzirikawo.
6 Kana tikabatana no matambudziko,* zvicaita kuti imwimwi munyaradzwe uye muponeswe; uye kana tiri kunyaradzwa, zvicaita kuti imwimwi munyaradzwe, zvomubetserai kushingirira matambudziko akaezana no atiri kubatana nawo.
7 Uye kariro yedu kamuri yakabamba, ngokuti muri kubatanawo no matambudziko atinawo zvino, imwimwi mucanyaradzwawo pamwepo na isusu.
8 Hama, tinoda kuti muziye ngezve matambudziko atakabatana nawo mu provhinsiya ye Aziya. Zviro zvainga zvakatishatira maningi uye tainga tisina cataikwanisa kuita ngo simba redu, zvekutoti tainga tisisitona cokwadi cokuti taizopona.
9 Zvezvirokwazvo, taitozwa hingana kuti tainga tatongerhwa rufu. Izvi zvakaitika kuti tisagonde simba redu, asi tigonde Mwari anomutsa akafa.
10 Iyena akatiponesa pa ngozi yakakura yo kufa uye acatiponesazve. Isusu tino kariro yekuti acarumbwa ecitiponesa.
11 Imwimwi munokwanisawo kutibetsera nge kutiitira minamato ye kudeketera; ngokudaro, anhu akawanda ari kutenda nge rubetso ratiri kutambira recibva pa mhinduro ye minamato ye anhu akawanda.
12 Tinodada ngokuti hana yedu inotipasa upupuri wekuti tinogara no muhambiro wakacena uye wakanaka mu nyika uye pamberi pa Mwari, asi maka-maka pakati penyu. Kusiya izvona, isusu atizi kuita zviro maererano no uzii we nyika ino, asi takaita zviro maererano no nyasha dza Mwari.
13 Ngokuti zvezvirokwazvo atiripi kumutarirai zviro zvamusikakwanisi kuerenga no kuzwisisa, uye ndino kariro yekuti mucarumbwa mecinyasa kuzwisisa zviro izvi,
14 hinga kuzwisisa kamakaita kuti munodikana kudada ngo pamusoro pedu, isusu ticazodadawo ngo pamusoro penyu pa zuwa ra Tenzi wedu Djesu.
15 Hino no rugondo iri, ndaida kutanga kuuyeyo kuti mugare no cikonzero ce kupfarazve kecipiri;
16 ngokuti ndaida kumuvhakacirai pandinonga ndecienda ku Masedhoniya uye pandinonga ndoobva ku Masedhoniya, mozondiperekedza ndooenda ku Djudhiya.
17 Pandakaronga kuita zviro izvi, ndakazviona hinga zvisina basa here? Kana kuti ndinoronga zviro hinga munhu we nyama, zvondiita kuti ndirekete kuti “honde,” pedzepo ndoreketa kuti “haiwa”?
18 Asi ngokuti Mwari akagondeka, isusu takagondekawo, ndiyo ndaa atingati “honde” pedzepo tobhuya kuti “haiwa.”
19 Ngokuti Mwana wa Mwari, Djesu Kristu, akaparidzwa pakati penyu peciseenzeswa isusu, kureya inini, Sirivhano* na Timoti, aazi kugara “honde” uye pa nguwa imweyo ari “haiwa,” asi kaari “honde” wakagara “honde”.
20 Ngokuti, azvinei kuti gondeso dza Mwari dzakawanda kudini, idzona dzakagara “honde” eciseenzesa iyena. Ngokudaro, tinoreketazve kuna Mwari kuti “Ameni,” kuti akudzwe peciseenzeswa isusu.
21 Asi Mwari, uwo akatidzodza ndiye anoita kuti isusu na imwimwi tigare no cokwadi cekuti tiri a Kristu.
22 Iyena akatipasawo cidhindo uye akatipasa mwiya uri mu mwoyo medu, hinga gondeso ye zviro zvicauya.
23 Ndinodainza Mwari kuti andiitire upupuri wekuti ciri kundiitisa kuti nditame kuuya ku Korinti nge cekuti andidi kumurhwadzisai.
24 Isusu atiripi aridzi e kutenda kenyu, asi tinoseenza pamwepo nemwi kuti mupfare, ngokuti makaima ngo kutenda kenyu.
Masoko ari pasi
^ Kana kuti: “anotibambisa.”
^ Kana kuti: “pa miedzo yedu yese.”
^ Kana kuti: “miedzo.”
^ Unodainzwawo kuti Sirasi.
