Akorinti Wecipiri 11:1-33
11 Inini ndiri kukumbirawo kuti mundishingirire padoko basi pa upenzi wangu. Asi zvezvirokwazvo, mutori kundishingirira kamare!
2 Ngokuti ndino shanje na imwimwi, shanje dzakaezana no dza Mwari,* ngokuti inini kamare ndakamugondesai kuwakana no mwanarume umwe basi, kuti ndimuendesei kuna Kristu hinga mhandwe yakacena.
3 Asi ndinothyira kuti, hinga kucengedzwa kakaizwa Evha no nyoka no mazano ayo, marangariro enyu angakwanisa kucengedzwawo, mosiya kuteerera Kristu no mwoyo wese uye motama kugara akacena hinga zvaanoda.
4 Ngokuti kudai pakaguma munhu umweni eciparidzira ngezva Djesu wakasiyana no watiri kuparidzira, kana kuti mukatambira mwiya umweni usiripi uya wamakatambira, kana masoko akanaka amweni asiripi aya amakatenda, munonga mecitenderana naye.
5 Ngokuti inini andidzioni hinga mudoko kudarika aphostori enyu anodziita hinga akanaka maningi.
6 Asi kunyazi ndisikakwanisi kureketa zvakanaka, inini ndino uzii; zvezvirokwazvo takapangidza kamuri kuti ndizvo zvatiri mu mishobo yese uye mu zviro zvese.
7 Kana kuti ndakashaisha here nge kudzidodosa kuti imwimwi mukwidziridzwe, nge kumuziisai no mupfaro masoko akanaka a Mwari ndisikariphwi?
8 Ndakatendera kubetswa no ungano dzimweni, zveciita hingana kuti ndiri kuabira kuitira kuti ndimuseenzerei.
9 Pandainga ndinemwi, andizi kupasa mutoro munhu upi hake pa zviro zvandaida, ngokuti hama dze ku Masedhoniya dzaindipasa zvese zvandaida. Ndakaita zviri zvese kuti ndisagare mutoro kamuri uye ndicarumbwa ndeciita izvona.
10 Cokwadi ca Kristu pacinonga cineni, andizosii kureketa ndecidada nge zvazvo mu mitanha yo Akaya yese.
11 Ngei? Ngokuti andimudii? Mwari anozviziya kuti inini ndinomudai.
12 Asi ndicarumbwa ndeciita zvandiri kuita, kuitira kuti ndifunge miromo dze aya anopsvaka zvikonzero kuti azwi akaezana na isusu pa zviro zvaanogaya nazvo.
13 Ngokuti anarume akadaro ndi aphostori e kunyepedzera, aseenzi anocengedza, anonyepedzera kugara aphostori a Kristu.
14 Uye izvona azvitishamisi, ngokuti Sathani kamare unonyepedzera kugara ngirozi ye ciedza.
15 Hino azvitishamisiwo nge kuona aseenzi ake ecinyepedzera kugara aseenzi e unatsi. Asi mugumo wawo ucaenderana maererano no zviito zvawo.
16 Ndinomubvunzaizve kuti: Musarangarire kuti inini ndiri benzi. Asi kudai mecirangarira kudaro, nditambirei hinga ndiri benzi, kuti inini nditame kugaya maningi.
17 Zvandiri kureketa zvino, azvipangidzi kuteedzera muezaniso wa Tenzi, asi ngezve munhu unopenga, uri kugaya nge kunyanya kudzithemba.
18 Sezvo akawanda ari kugaya maererano no nyama, inini ndicagayawo.
19 Sezvo mecidziti muri anhu “anozwisisa maningi,” munoshingirira anhu anoita zviro zve upenzi.
20 Zvezvirokwazvo, imwimwi munoshingirira aya anomuitai aranda, aya anotsakatisa zviro zvenyu, aya anomutorerai zviro zvamunazvo, aya anodzikwidziridza kamuri, uye aya anomupondai ku hope.
21 Zvinotipsverusa kureketa zviro izvi, ngokuti zvinoita hingana kuti takaremba.
Asi kana amweni akashinga, ndiri kubhuya hingana benzi, inini ndakashingawo.
22 Awona Ahebheru here? Ininiwo ndiri Muhebheru. Awona Aisraeri here? Ininiwo ndiri Muisraeri. Awona ana* a Abrahamu here? Ininiwo ndiri mwana* wa Abrahamu.
23 Awona asenzi a Kristu here? Inini ndinodaira hinga benzi, ngokuti ininiwo ndinonyasa kuziikanwa maningi: Inini ndakaseenza maningi kuadarika, ndakakandwa mukadheya kakawanda, ndakapondwa zvisikatoerengeki, uye kajinji kakhona ndakagara dhuze no kufa.
24 Ndakapondwa kashanu nge Adjudha mishamu dzinokwana 39,
25 ndakabvengwa no mushamu katatu, ndakafurhwa no mapuwe kamwe, ndakandondomera no bharko katatu, ndakagara usiku wese no zuwa rimwe ndiri pamusoro pe bahari;
26 ndakaita rhwendo rakawanda, ndakasongana no ngozi dzo murambo, ngozi dzo mbavha, ngozi dzaibarhwa no anhu e dzinza rangu kamare, ngozi dzo anhu e madzinza amweni, ngozi dzo muthaundi, ngozi dzo ku renje,* ngozi dzo mubahari, ngozi dzo hama dze kunyepedzera,
27 pa basa rakakura no kuseenza no simba, kutama kuwata usiku wakawanda, nzara, mukaha, kukonerhwa zvekurhya, mhepo uye kutama zvekupfeka.
28 Kutunhudzira pa matambudziko ese aya, pano ciro cimweni cinogara cecindinetsa zuwa no zuwa: Kudzirhya mwoyo nge ndaa ye ungano dzese.
29 Ndiani wakaremba, inini ndotama kurembawo? Ndiani ungakuhunyika, inini ndotama kutsukwara?
30 Kudai zvecidiwa kuti ndigaye, ndinogaya ngo zviro zvinopangidza kuremba kangu.
31 Mwari, Baba a Tenzi Djesu, Uya anodikana kukudzwa nokusikaperi, anozviziya kuti andiripi kunyepa.
32 Mu Dhamasko, govhernadhori waitungamirirhwa na mambo Areta wakakanda aonereri pa musuwo we thaundi ro Adhamasko kuti andisunge,
33 asi ndakacitiswa ndiri mu citengu ngo pa janera rainga riri pa muru we thaundi, uye ndopukunyuka mu nyara dzake.
Masoko ari pasi
^ Cigrego: “kushingaira ka Mwari.”
^ Cigrego: “mbeu.”
^ Cigrego: “mbeu.”
^ Onai pakazwi Kupanganidzwa ke Masoko.
