Tsamba Yecipiri ku Akorinti 12:1-21
12 Ndinodikana kugaya. Kunyazi hazvo zvisikandibetseri, ndicareketa ngezve zvipangidzo zvinoshamisa zvandakapangidzirhwa na Tenzi.
2 Ndinoziya mwanarume umweni wainga ari mu rubatano na Kristu, ke makore 14 adarika, iyena wakatorhwa kuendeswa kudenga rocitatu, kuti wakatorhwa mu mwiri here kana kuti musiripi mu mwiri, inini andizvizii; asi Mwari ndiye anozviziya.
3 Honde, inini ndinomuziya mwanarumewo, kana wakatorhwa no mwiri wake wene here kana kuti asikazi kutorhwa no mwiri wake wene, inini andizvizii; Mwari ndiye anozviziya,
4 iyena wakatorhwa woendeswa mu paraizo, wakazwa masoko asikadikani kurekethwa uye no masoko asikatenderhwi kuti munhu aarekete.
5 Ndinogaya nge ndaa ye mwanarume uu, asi andigai nge ndaa yangu kunza ke kugaya nge kutama simba kangu.
6 Ngokuti kunyazi kana ndecida kugaya, andizoiti zve upenzi, ngokuti ndinonga ndecireketa zvirokwazvo. Asi andidi kuita izvona, kuti pasagare no munhu unozonyanya kundikudza kudarika zvaanoona pandiri kana kuti zvaanozwa ndecireketa,
7 nge ndaa ye kupangidzwa zviro zvinoshamisa maningi.
Kuti nditame kukwidziridzwa maningi, ndakakandwa munzwa mu nyama, ngirozi ya Sathani, kuti irumbwe yecindiponda, kuti nditame kudzikwidziridza maningi.
8 Ndakadeketera katatu kese kuna Tenzi, ndecikumbira kuti munzwa uwona ubviswe mu mwiri wangu.
9 Asi iyena akandibvunza kuti: “Nyasha dzangu dzinokwana kauri, ngokuti simba rangu riri kuizwa kuti rigare rakakwana mu kutama kako simba.” Hino, ndicagaya ndecipfara ngo kutama kangu simba kuitira kuti simba ra Kristu rirumbwe riri pamusoro pangu hinga tenda.
10 Ngokudaro, inini ndinopfara pandinonga ndisina simba, pandinonga ndecitukwa, pandinokonerhwa zviro, pandinoteererhwa no kubatana no zvinetso ngo pamusoro pa Kristu. Ngokuti pandinonga ndakaremba, ndipona pandinonga ndino simba.
11 Ndakagara hinga benzi. Ndimwi makandibambidzira kuti ndidaro, ngokuti ndimwi maidikana kundikudza. Ngokuti apana pandakagara munhu wakaterera ku aphostori enyu anodziita hinga akanaka maningi, kunyazi hazvo ndisiripi ciro.
12 Zvezvirokwazvo, zvipangidzo zve muphostori zvakaoneka pakati penyu nge kushingirira kukuru uye nge zvipangidzo, zvishamiso no mabasa e simba.
13 Ngokuti ndizvipi zvandakaitira ungano dzimweni dzese zvandisikazi kumuitirai, kunza kekuti inini andizi kugara mutoro kamuri? Ndirekereiwo cishaishi ici no mwoyo wese.
14 Onai! Kaa kocitatu ndagadzirira kuuya koomuvhakacirai, uye andizogari mutoro kamuri. Ngokuti andiripi kupsvaka zviro zvamunazvo, asi imwimwi kamare; ngokuti ana aetserhwi kuti acengete upfumi kuti azoriritire abereki awo, asi abereki ndiwona anodikana kuucengetera ana awo.
15 Kandiri, ndicaseenzesa zviro zvangu zvese no mwoyo wese uye ndicapasawo upenyu wangu kuitira imwimwi.* Kana inini ndecimudai maningi, inini andidikani kudiwawo ndimwi here?
16 Asi kunyazi zviri izvona, inini andizi kugara mutoro kamuri. Asi imwimwi munobhuya kuti “ndakaseenzesa mazano” uye ndomubatai “ndeciita zvekumucengedzerai.”
17 Kodi inini ndakamutorerai zviro zvenyu, ndeciseenzesa anhu andakamutumirai here?
18 Ndakakohomedzesa Tito kuti auye kuzomuvhakacirai uye ndakamutumira no hama imweni. Kureya kuti Tito wakamutorerai zviro zvenyu here? Kodi isusu atiiti zviro nge mushobo umwewo? Atihambi mu makwanza amwewo here?
19 Kodi mu nguwa yese ii, imwimwi munorangarira kuti isusu tiri kupsvaka kudzidziirira pamberi penyu here? Tiri kureketa pamberi pa Mwari tiri mu rubatano na Kristu. Asi hama dzinodiwa, zvese zvatinoita tinozviitira kuti timubambisei.
20 Ngokuti ndinothya kuti pandinozoguma ikona, pamweni andizomugumirii nge mushobo wandaida uye inini ndisiripi nge mushobo wamaida, asi kusiya izvona, ndinozogumira kureketedzana, shanje, ushungu, kutama kupindirana, kureyana, mapsveda, kudzikudza uye woyo-woyo.
21 Pamweni pandinozouyeyozve, Mwari wangu anozondidodosa pamberi penyu uye inini ndinozocema maningi nge ndaa ye amweni asikazi kucinyuka pa zvitema zvawo, pa kutama kucena kawo, uhure* no muhambiro unopsverusa* waakaita.
Masoko ari pasi
^ Kana kuti: “mwiya yenyu.”
^ Mu Cigrego por·nei′a. Onai pakazwi Kupanganidzwa ke Masoko.
^ Mu Cigrego a·sel′gei·a. Onai pakazwi Kupanganidzwa ke Masoko.
