Akorinti Wecipiri 13:1-14
13 Iri raa rhwendo rocitatu kuti ndiuye koomuvhakacirai. “Shwiro yese inodikana kutongwa kana papaswa upupuri we anhu airi kana atatu.”
2 Kunyazi ndisiriyopi zvino, zvinoita hingana kuti ndiripo kocipiri uye ndiri kungwadza aya akamboita citema uye amweni ese, kuti kana ndikazouyeyo andizoazwiri usisi,
3 sezvo muri kupsvaka upupuri wekuti Kristu, uwo wamusikaoni hinga munhu asina simba, asi hinga munhu ano simba pakati penyu, ari kureketa eciseenzesa inini.
4 Ngokuti iyena akakhomerhwa pa mutanda nge ndaa ye kutama simba kake, asi ari mupenyu nge ndaa ye simba ra Mwari. Izvirokwazvo kuti isusuwo takaremba pamwepo naye, asi ticararama pamwepo naye nge ndaa ye simba ra Mwari riri mamuri.
5 Rumbwai mecidziongorora muone kuti muno kutenda here kana kuti haiwa; rumbwai mecidziedza muone kuti makadini. Kodi imwimwi amuzvizii here kuti Djesu Kristu ari mu rubatano na imwimwi? Iyena aazogari ari mu rubatano na imwimwi kana musikapfarirhwi naye.
6 Inini ndinokarira kuti munoziya kuti isusu atiripi anhu asikapfarirhwi.
7 Tinoita munamato kuna Mwari kuti musaite ciro cakashata, haiwa kuti isusu tizviite hingana anhu anopfarirhwa no amweni, asi kuti muite zvakanaka, kunyazi isusu teciita hingana anhu asikapfarirhwi.
8 Ngokuti apana zvatinokwanisa kuita zvinopesana no cokwadi, asi tinoita zvinotsigira cokwadi basi.
9 Isusu zvezvirokwazvo nguwa dzese tinopfara patinonga tisina simba asi imwimwi muno simba. Uye catinokumbira mu munamato, nge cekuti imwimwi munatsiriswe.
10 Ndiyo ndaa ndecimutarirai zviro izvi ndisiripopi kuti kana ndikagumeyo, nditame kuzonyanya kuseenzesa simba randakapaswa na Tenzi kuti ndimubambisei haiwa kumuputsai.
11 Pakupedzesera hama, rumbwai mecipfara, mecinatsiriswa, mecinyaradzwa, mecirangarira nge mushobo umwewo, mecigara mu runyararo; uye Mwari we rudo no we runyararo acarumbwa anemwi.
12 Cungamidzanai no mwoyo wese.*
13 Acena ese ari kumutambisai.
14 Nyasha dza Tenzi Djesu Kristu no rudo ra Mwari pamwepo no mwiya mucena ngazvigare na imwimwi.
Masoko ari pasi
^ Cigrego: “beju cena.” Beju iri raiizwa nge Akristu paaisongana.
