Akorinti Wecipiri 3:1-18
3 Tiri kutangazve kudzipangidza kamuri kuti tiri ani here? Kana kuti isusu, tinodikana kutambira tsamba ye kusimba inobva kamuri kana kumutarirai tsamba ye kusimba inobva katiri, hinga zvinoizwa no anhu amweni here?
2 Imwimwi kamare ndimwi tsamba yedu, yakatarhwa mu mwoyo medu, inoziikanwa uye inoerengwa no anhu ese.
3 Ngokuti zviri pamhene kuti imwimwi ndimwi tsamba ya Kristu yakatarhwa na isusu hinga aseenzi, haiwa ngo tinta, asi ngo mwiya wa Mwari mupenyu; haiwa pa buwe, asi pa nyama, mu mwoyo.
4 Tino rugondo iri muna Mwari peciseenzeswa Kristu.
5 Haiwa kuti isusu takakwaniriswa zvekuti tinorangarira kuti zviro zvese zvinobva katiri, asi kukwaniriswa kedu kunobva kuna Mwari,
6 uya akaita kuti tigare takanyasa kukwaniriswa kugara aseenzi e citenderano cipsva, haiwa nge mutemo wakaita zvokutarhwa, asi ngo mwiya; ngokuti mutemo wakaita zvokutarhwa unoendesa ku rufu, asi mwiya unoendesa ku upenyu.
7 Hino, kana mutemo waibara rufu wakaita zvokutarhwa pa buwe waiunzisa rukudzo, woita kuti ana e Israeri akonerhwe kunangira hope ya Mozesi nge ndaa ye rukudzo rainga riri ku hope ya Mozesi, rukudzo raizotsakatiswa,
8 mabasa e mwiya aadikani kugara no rukudzo rakatokura here?
9 Kudai mutemo wakaita zvokutarhwa waiendesa kootongwa waikudzwa, mutemo we unatsi* unodikana kukudzwa maningi!
10 Zvezvirokwazvo, nge ndaa ye rukudzo iri rikuru, mutemo wakaita zvokutarhwa wakaruza rukudzo nge ndaa ye rukudzo iri.
11 Ngokuti, kudai mutemo wekuti waizotsakatiswa wainga uno rukudzo, hino citenderano cipsva cekuti cicagara nokusikaperi cino rukudzo rakakura maningi!
12 Ngokuti tino kariro ii, tinoreketa no rugondo rese,
13 tisikaiti zvaiizwa na Mozesi, paaidzifukidza hope yake no djira kuti ana e Israeri atame kurumbwa akanangisa kupera ke zviro zvaizotsakatiswa.
14 Asi marangariro awo aazwisisi. Ngokuti dakara nyamasi uno, pese panoerengwa citenderano cokare, djira rimwero rinorumbwa rakafukidza ndangariro dzawo, ngokuti djira irona rinobviswa basi na Kristu.
15 Zvezvirokwazvo, dakara nyamasi uno, pese panoerengwa mutemo wa Mozesi, djira riya rinorumbwa rakafukidza mwoyo yawo.
16 Asi munhu paanohwirira kuna Djehovha,* djira riya rinobviswa.
17 Djehovha* ndi mwiya, uye panonga pano mwiya wa Djehovha,* pano rusununguko.
18 Tese isusu, patinonga tino hope isikazi kufukidzwa, tecipangidzwa rukudzo ra Djehovha* ngo supeya, tinocinjwa kuti tigare mufanikiso umwewo, rukudzo redu recinyasa kutunhudzirika, hinga mushobo unoizwa na Djehovha* uwo ari mwiya.*
Masoko ari pasi
^ Onai pakazwi Kupanganidzwa ke Masoko.
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Mabhaibheri amweni anoti: “zvinoizwa no mwiya wa Djehovha.”
