Akorinti Wecipiri 4:1-18
4 Hino, sezvo tino basa re kuparidzira maererano no usisi watakapangidzirhwa, isusu atirembi.
2 Asi isusu takasiya zviro zvese zvinopsverusa, zviro zvinoizwa mu cifise-fise, atifisi zvatiri uye isusu atibvisi kana kutunhudzira ciro cipi haco mu soko ra Mwari; asi tinopangidza kuti tiri anhu akanaka ku hana dze anhu ese pamberi pa Mwari.
3 Kana masoko akanaka atinoparidzira akafukidzwa,* akafukidzwa kuno aya ari kootsakatiswa,*
4 ekuti mwari we nyika ino* wafunga marangariro e asikatendi, kuitira kuti atame kuvhenekerhwa no ciedza ce masoko akanaka anokudzwa akaringana na Kristu, wekuti iyena ndiena mufanikiso wa Mwari.
5 Ngokuti atiripi kuparidzira nge zvedu, asi ngezva Djesu Kristu kuti ndiye Tenzi uye kuti isusu tiri aranda enyu nge ndaa ya Djesu.
6 Ngokuti Mwari ndiye akareketa kuti: “Ciedza ngacivhenekere mu cidima,” iyena ari kuvhenekera mwoyo yedu, kuti ivhenekere ngo rukudzo re ruziyo ra Mwari eciseenzesa Kristu.
7 Asi tino upfumi uu mu midziyo ye dongo, kuti simba rakakura rinodarika re anhu ribve kuna Mwari, haiwa katiri.
8 Tinotsikirirhwa mu matii ese, asi atipererhwi no simba rokutsukunuka; tinopererhwa no mazano, asi tinoona gwanza ro kubuda ndiro;
9 tinoteererhwa, asi atisiiwi tega; tinowisirhwa pasi, asi atitsakatiswi.
10 Tinogara tecishingirira mu mwiri yedu zvakashata zvatinoizirhwa zvingatokwanisa kuguma pa kutiuraisa hinga zvakaizirhwawo Djesu, kuti upenyu wa Djesu upangidzwewo pamhene mu mwiri yedu.
11 Ngokuti isusu ticiri apenyu, tinorumbwa tecirhwisana no rufu nge ndaa ya Djesu, kuitira kuti upenyu wa Djesu upangidzwewo pamhene mu nyama yedu inofa.
12 Hino, rufu riri kuseenza matiri, asi upenyu uri kuseenza mamuri.
13 Zvino, sezvo tino mwiya umwe basi we kutenda hinga uya wakatarhwa nge zvawo kuti: “Ndakapangidza kutenda, ndiyo ndaa ndinoreketa”; isusuwo tinopangidza kutenda, ndiyo ndaa tinoreketa,
14 tinoziya kuti Uya akamutsa Djesu acatimutsawo pamwepo na Djesu, uye acatikanda pamberi pake pamwepo na imwimwi.
15 Ngokuti zvese izvi zviri kuizirhwa imwimwi, kuitira kuti nyasha dza Mwari dzirumbwe dzecitunhudzirika ngokuti anhu ari kutenda Mwari mu rukudzo rake.
16 Ndiyo ndaa isusu atihwiriri sure, ngokuti kunyazi munhu watiri nge cekunza uri kupera, zvezvirokwazvo munhu watiri nge cemukati uri kuizwa mupsva zuwa no zuwa.
17 Ngokuti kunyazi kutambudzika kuri ke nguwa doko uye kakareruka, kunoita kuti tione rukudzo rakakura maningi uye risikaperi;
18 hino atirumbwi takaringira zviro zvinooneka, asi zvisikaoneki. Ngokuti zviro zvinooneka ngezve nguwa doko, asi zviro zvisikaoneki zvinogara nokusikaperi.
Masoko ari pasi
^ Kana kuti: “akafukidzwa no djira.”
^ Kana kuti: “ari kuora.”
^ Kana kuti: “we mugariro uno we zviro; mugariro we zviro.” Onai pakazwi Kupanganidzwa ke Masoko.
