Tsamba Yecipiri ku Akorinti 5:1-21
5 Ngokuti tinoziya kuti kana nyumba yedu yo pasi pano, tenda ii, ikaphwanywa,* tinozogara no nyumba inobva kuna Mwari, nyumba ii aizi kuizwa no nyara dzo anhu, inozogara nokusikaperi kudenga.
2 Ngokuti isusu tiri kugomera mu nyumba ii, tecida no mwoyo wese kupfeka nyumba inobva kudenga,
3 zvekuti kana tikapfeka nyumba ii, atizooneki tisikazi kupfeka.
4 Zvezvirokwazvo, isusu tiri mu tenda ii tiri kugomera tecinetseka, ngokuti atidi kubudemo asi tinoda kupfeka imweni yakhona, kuitira kuti cinofa cimedzwe no upenyu.
5 Akatigadzirira zviro izvi ndi Mwari, uya akatipasa mwiya hinga gondeso yo zviya zvicauya.
6 Ngokudaro, patinorumbwa tecinyasa kugonda no kuziya kuti patinonga tecirarama mu mwiri, tinonga tiri kure na Tenzi,
7 ngokuti tiri kuhamba no kutenda, haiwa ngo zvatinoona.
8 Asi tinonyasa kugonda uye tingatoda kugara kure no mwiri kuti tigare na Tenzi.
9 Hino, azvinei kuti tinogara naye kana kuti tinogara kure naye, cinangwa cedu nge cekuda kumupfadza.
10 Ngokuti tese ticazoima pamberi pe cigaro ce kutonga ca Kristu, kuti umwe na umwe atambire zvinoenderana no zvaakaita paainga aciri mu mwiri, zvingadai zvakanaka kana zvakashata.
11 Ngokudaro, teciziya kuti tinodikana kuthya Tenzi, isusu tinorumbwa tecifundisa anhu, asi isusu tinonyasa kuziikanwa na Mwari. Uye inini ndinoetsera kuti hana yenyu imubetserei kuti munyase kutiziya.
12 Isusu atiripi kudzipangidzazve kuti tiri ani pamberi penyu, asi tiri kumukohomedzesai kuti mudade nge ndaa yedu, kuitira kuti mukwanise kudaira aya anodzikudza nge ndaa ye zviro zvinooneka nge cekunza, haiwa zviri mu mwoyo.
13 Kana taiita zviro hinga takahunguruka, taizviitira Mwari; kana tino ndangariro dzakakwana, tiri kuzviitira imwimwi.
14 Rudo ra Kristu rinotibambidzira ngokuti tinorangarira kudai: Munhu umwe basi akafira anhu ese, ngokuti anhu ese ainga akafa.
15 Uye akafira anhu ese kuti aya anorarama asadziraramire pacawo, asi araramire uya akaafira uye akamutswa.
16 Hino kubvira zvino kuenda mberi aticazii munhu maererano no zvaari pa nyama. Kunyazi hazvo takamboziya Kristu pa nyama, zvezvirokwazvo aticamuziizve nge mushobo umwewo.
17 Hino, kana munhu ari mu rubatano na Kristu, iyena waa cisikwa cipsva; zviro zvokare zvadarika; zviro zvese zvaazvipsva.
18 Asi zviro zvese zvinobva kuna Mwari, uya akaita kuti tigare no ushamwari we padhuze naye eciseenzesa Kristu, otipasa basa rokuti tibetsere amweni kuti agare no ushamwari we padhuze naye,
19 wokuti Mwari eciseenzesa Kristu akaitazve kuti anhu agare no ushamwari we padhuze naye, asikaerengi zvishaishi zvawo, uye akatipasa soko rokuti tiziise anhu kuti agarezve no ushamwari we padhuze na Mwari.
20 Hino isusu tiri aimiriri akasara pa mbuto ya Kristu, hinga kuti Mwari ari kutiseenzesa kuti tidainze anhu. Hinga aimiriri akasara pa mbuto ya Kristu, tiri kudeketerera anhu kuti: “Garai no ushamwari we padhuze na Mwari.”
21 Mwari akaita kuti uya ainga asikazii citema, agare citema* eciitira isusu, kuitira kuti peciseenzeswa iyena, isusu tigare anatsi pamberi pa Mwari.
