Tsamba Yecipiri ku Akorinti 6:1-18
6 Teciseenza pamwepo naye, tinomukohomedzesaiwo kuti musatambire nyasha dza Mwari, pedzepo motama kuzwisisa cinangwa cadzo.
2 Ngokuti iyena anoti: “Ndakakuzwa pa nguwa yakasisira uye ndakakubetsera pa zuwa re ruponeso.” Onai! Ino ndiyo nguwa yakasisira. Onai! Rino ndiro zuwa re ruponeso.
3 Atimboiti zviro zvinokuhunyisa amweni, kuitira kuti basa redu re kuparidzira ritame kupaswa ndaa;
4 asi mu mishobo yese tinopangidza kuti tiri aseenzi a Mwari, nge kushingirira katinoita zviro zvakawanda, patinobatana no matambudziko, patinokonerhwa zviro, patinosongana no zvinetso,
5 patinopondwa, patinokandwa mu kadheya, panoitika woyo-woyo, kuseenza maningi, kutama kuwata cousiku, kutama zvokurhya;
6 tinopangidza kuti tiri aseenzi a Mwari nge kurarama upenyu wakacena, kugara no uzii, mwoyo unononoka kutsamwa, nyasha, mwiya mucena, rudo risina ucengedzi,
7 nge kureketa zvirokwazvo, nge kugonda simba ra Mwari, nge kuseenzesa zvekurhwa zve unatsi ku moko kwawo* no ku moko boshwe,*
8 nge rukudzo no kutama kureremedzwa, nge kushorhwa no kusimbwa. Tinooniwa hinga acengedzi, kunyazi tiri anhu akagondeka;
9 hinga tisikaziikanwi, asi tinoziikanwa; hinga tiri dhuze kuti tife,* asi onai, tiri apenyu; hinga tiri kuphanicwa,* asi atiuraiwi;
10 hinga takatsukwara, asi tecigara tecipfara; hinga arombo, asi tecipfumisa akawanda; hinga tisina ciro, asi tino zviro zvese.
11 Takafunungura miromo yedu kuti tirekete* na imwimwi Akorinti, uye takanyasa kufunungura mwoyo yedu.
12 Isusu tinonyasa kupangidza pamhene kuti tinomudai, asi imwimwi amuripi kunyasa kupangidza pamhene kuti munotida.
13 Hino inini ndiri kureketa na imwimwi hinga ndiri kureketa no ana angu ndecimubvunzai kuti, nyasai kufunungurawo mwoyo yenyu.*
14 Musasungwe* pa djoki rimwero no asikatendi. Ngokuti unatsi unobatana papi no kutama kuzwira mutemo? Ciedza cinobatana no cidima here?
15 Uyezve, Kristu na Bheriyari* anozwirana kudini? Kana kuti mutendi* no munhu usikatendi anozwirana kudini?
16 Citenderano cipi ciripo pakati po tempro ya Mwari no zvidhori? Ngokuti isusu tiri tempro ya Mwari mupenyu; hinga kureketa kakaita Mwari kuti: “Ndicagara pakati pawo no kuhamba pakati pawo, ndicagara Mwari wawo, uye awona acagara anhu angu.”
17 “Djehovha* anobhuya kuti: ‘Budai pakati pawo, mudziparadzanise, musabate ciro cisikazi kucena’”; “‘uye inini ndicamutambirai.’”
18 “Djehovha* we Masimba Ese anobhuya kuti: ‘Inini ndinozogara baba enyu uye imwimwi munozogara ana angu.’”
Masoko ari pasi
^ Pamweni, kuitira kuti arhwisane no muzondi.
^ Pamweni, kuitira kuti adzidziirire ku muzondi.
^ Kana kuti: “hinga kuti takasisira kuti tife.”
^ Kana kuti: “kupangirhwa.”
^ Kana kuti: “Takanyasa kureketa pamhene.”
^ Kana kuti: “nyasai kupangidza rudo riri mu mwoyo yenyu.”
^ Kana kuti: “Musabatanidzwe.”
^ Soko iri rinobva pa soko ro Cihebheru, rinoreya “Munhu Asikabetseri,” recireya Sathani.
^ Kana kuti: “munhu wakagondeka.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
