Akorinti Wecipiri 7:1-16
7 Hino hama dzangu dzinodiwa, sezvo tiri kugondeswa zviro izvi, ngatidzicenese pa zviro zvese zvinosvipisa mwiri no mwiya, tecitunhudzira kugara acena tecithya Mwari.
2 Tipaseiwo mbuto mu mwoyo menyu. Atizi kushaishira munhu, atizi kukuwadza munhu, atizi kucengedzera munhu kuti tibetsereke.
3 Andiripi kureketa izvi kuti ndimutongei. Ngokuti ndakamubvunzai kare kuti muri mu mwoyo yedu kuti tife pamwepo uye kuti tirarame pamwepo.
4 Ndinoreketa na imwimwi ndakanyasa kusununguka. Ndinodada maningi nge pamusoro penyu. Ndakanyaradzwa maningi; ndiri kupipira no mupfaro nge ndaa ye matambudziko edu ese.
5 Zvezvirokwazvo, patakaguma ku Masedhoniya atizi* kumbozorora, asi takarumbwa tecitambudzika mu matii ese; ngokuti kunza kainga kuno kurhwisana, nge mukati medu taithya.
6 Asi Mwari, uya anonyaradza akaora mwoyo, akatinyaradza nge kuguma kakaita Tito;
7 haiwa basi nge kuguma kaakaita, asi nge kumunyaradza kamakamuita, ngokuti iyena wakatibvunza ngezve cido camunaco cekundiona, ngezve kutsukwara kenyu, nge kundirangarira maningi kamuri kuita; zvekutoti mupfaro wangu wakanyasa kutunhudzirika.
8 Ngokuti kunyazi ndakamutsukwarisai nge tsamba yangu, anditsumbi. Kunyazi ndakambotsumba pakutanga (pandakaona kuti tsambeyo yamutsukwarisai ke nguwa doko),
9 pari zvino ndinopfara, haiwa ngokuti makatsukwariswa, asi ngokuti kutsukwara kenyu kakamuitisai kuti mucinyuke. Ngokuti imwimwi makatsukwara maererano no kuda ka Mwari, uye amuzi kukuwadzwa nge ndaa yedu.
10 Ngokuti kutsukwara maererano no kuda ka Mwari kunobara kucinyuka kunoendesa mu ruponeso uye apana unozotsumba nge kuita kudaro; asi kutsukwara kunoizwa no anhu e nyika kunobara rufu.
11 Ngokuti onai zvakabarhwa nge kutsukwara kenyu maererano no kuda ka Mwari: Zvakaita kuti mudzicenese, munyangadzwe, muthye, mude no mwoyo wese, mupete masimba, mugadzirise zviro zvakashata! Imwimwi makapangidza mu zviro zvese kuti makacena* pa nyaya ii.
12 Kunyazi ndakamutarirai, andizi kuzviitira munhu wakashaishewo kana kuti wakashaishirhwewo, asi ndakazviitira kuti cido cenyu ce kutizwira cipangidzwe pamhene pakati penyu uye pamberi pa Mwari.
13 Ndiyo ndaa takanyaradzwa.
Asi pane basi kuti tinyaradzwe, isusu takapfarawo maningi nge kuona kupfara kaiita Tito, ngokuti imwimwi makapfadza mwoyo wake.
14 Ngokuti kudai ndakabhuya naye nge zvenyu ndecidzikudza, andizi kupsveruka; asi ngokuti zviro zvese zvatakamubvunzai zvainga zviri zvezvirokwazvo, kudzikudza kedu pamberi pa Tito kainga ke zvirokwazvo.
15 Uyewo, mazwire ake nge zvenyu ari kutunhudzirika paanorangarira ngezve kuzwira kenyu mwese, pamakamutambira no rureremedzo rikuru.
16 Ndinopfara ngokuti ndinogonda nemwi mu zviro zvese.
