Akorinti Wecipiri 8:1-24
8 Hama, tinoda kuti muziye zvino ngezve nyasha dza Mwari dzakapangidzirhwa ungano dze ku Masedhoniya.
2 Paainga ari mu muedzo mukuru unotambudza, kuwanda ke mupfaro wawo ne urombo wawo zvakaita kuti upfumi wawo we kupasa zvaainga anazvo uwande.
3 Ngokuti awona akapasa maererano no zvaainga anazvo, inini ndingatoapupurira kuti akaita zvinodarika zvaainga anazvo,
4 awona aitotideketerera no mwoyo wese kamare, eciti anodawo kuita basa ro kupasa kuti abetsere acena.
5 Asi akaita zvinodarika zvataietsera kaari, ngokuti akatanga kudzipira awona pacawo kuna Tenzi uye no katiri maererano no kuda ka Mwari.
6 Ngokudaro, takakohomedzesa Tito kuti apedzese kuita basa raakatanga pakati penyu re kuunganidza musengo-musengo we zvipo zvamaipasa no mwoyo wese.
7 Sezvo imwimwi muri apfumi mu zviro zvese, mu kutenda, mu soko, mu ruziyo, mu kupeta masimba kwese uye mu rudo redu kamuri, garaiwo apfumi pa kupasa cipo co mwoyo wese.
8 Andiripi kureketa izvi ndecimupasai mutemo, asi ndiri kumubvunzai ngezve kupeta masimba ke amweni, kuitira kuti ndione rudo renyu re zvirokwazvo.
9 Ngokuti imwimwi munoziya nyasha dza Tenzi wedu Djesu Kristu, kunyazi ainga akapfuma, iyena akagara murombo kuti zvibetsere imwimwi, kuitira kuti imwimwi mugare apfumi nge ndaa ye urombo wake.
10 Uye pa nyaya ii ndinopasa maonero angu okuti: Kuita izvi kunomubetserai, ngokuti patodarika gore kubvira pa makatanga kuita basa iri uye makapangidza kuti muno cido cekuriita.
11 Pari zvino, mecipedzesai zvamakatanga, kuti mudzadzise cido ce kupasa maererano no zvamunazvo.
12 Mwari anotambira cipo cinoizwa no mwoyo wese, ngokuti iyena anoetsera kuti munhu apase maererano no zvaanazvo, haiwa zvaasina.
13 Ngokuti andidi kurerusira amweni uye ndopasa mutoro imwimwi;
14 asi kuti zviro zviezane, zviro zvenyu zvakawanda pari zvino ngazvidzadzise kukonerhwa kawo uye zviro zvawo zvakawanda ngazvidzadzisewo kukonerhwa kenyu kuti pagare no kuezana.
15 Hinga kutarhwa kazvakaizwa kuti: “Munhu wainga ano zvakawanda aazi kugara no zvakawanda maningi, uye munhu wainga ano padoko aazi kugara no padoko maningi.”
16 Ngaatendwe Mwari nge kukanda mu mwoyo ma Tito cido ce kuda kumubetserai hingana catinaco,
17 ngokuti iyena aazi kuita basi zvatakamukohomedzesa kuti aite, asi no cido caanaco, uri kuuya kamuri ngo kuda kake.
18 Isusu tiri kumutumira pamwepo no hama iri kusimbwa mu ungano dzese nge ndaa ye mabasa airi kuita anocokuita no masoko akanaka.
19 Andizvopi izvona basi, asi iyena wakagadzwawo no ungano dzese kuti agare mudoni wedu pa rhwendo re kupasa* zvipo zve mwoyo wese, kuitira kuti Tenzi akudzwe uye tipangidze kuti takagadzirira kubetsera.
20 Tiri kuita izvi kuti patame kuoneka munhu unotipasa ndaa nge ndaa ye musengo-musengo we zvipo zve mwoyo wese watiri kutungamirira.
21 Ngokuti ‘tiri kuita zviro zvese takagondeka, haiwa basi pamberi pa Djehovha,* asiwo no pamberi pe anhu.’
22 Kusiya izvona, tiri kutumazve hama yedu kuti iuye pamwepo nawo, yatakaedza toona kuti inopeta masimba pa kuita zviro zvakawanda, asi zvino iri kutonyanya kupeta masimba nge ndaa ye rugondo rikuru raanaro kamuri.
23 Asi kana pakaoneka mubvunzo ngezva Tito, iyena ndi mudoni wangu uye unoseenza pamwepo na inini ngo pamusoro pe zvido zvenyu; kana kuti, kana pano mubvunzo ngezve hama dzedu, awona ndi aphostori e ungano uye rukudzo kuna Kristu.
24 Ngokudaro, apangidzei kuti munoada, uye pangidzai ungano dzese kuti taireketa zvirokwazvo pataidada nge zvenyu.
