Akorinti Wecipiri 9:1-15
9 Pa nyaya inocokuita no kuseenzera acena, ndinoona kuti andidikani kumutarirai,
2 ngokuti ndinoziya cido cenyu uye icona cinondiitisa kuti inini ndidade pamberi pe anhu e ku Masedhoniya, ndecireketa kuti anhu e ku Akaya aano gore agadzirira, uye kupeta masimba kenyu kakabambisa akawanda awo.
3 Ndiri kumutumirai hama, kuti kudada kedu nge zvenyu kutame kugara ke kunyepedzera, kuitira kuti mugare makanyasa kugadzirira, hinga zvandainga ndareketa kuti maizogara maita.
4 Ngokuti zvikatama kuita kudaro, Amasedhoniya paanozouya na inini totama kumugumirai makagadzirira, isusu tinozopsveruka nge kumugondai katinoita, asi imwimwi ndimwi mucatonyanya kupsveruka.
5 Ndiyo ndaa, ndaona kuti zvakasisira kukohomedzesa hama kuti dziuye kamuri kuti dzitange kuunganidza cipo ce mwoyo wese nguwa iciripo, kuitira kuti cigare cakagadzirirhwa hinga cipo cinobva pa mwoyo, haiwa ce kubambidzirhwa.
6 Asi panocokuita no izvi, uya unosima padoko ucakororawo padoko, uye uya unosima zvakawanda ucakororawo zvakawanda.
7 Umwe na umwe ngaaite maererano no zvaakasanangura mu mwoyo make, haiwa kuita asikadi kana kuti ecibambidzirhwa, ngokuti Mwari anoda munhu unopasa ecipfara.
8 Kusiya izvona, Mwari anokwanisa kuita kuti nyasha dzake kamuri dziwande, kuitira kuti mugare musina camunokonerhwa pa zviro zvese zvamunoda, uye muno zvakawanda pa mabasa ese akanaka.
9 (Hinga kutarhwa kazvakaizwa kuti: “Iyena akapasa akawanda; akapasa arombo. Unatsi wake unogara nokusikaperi.”
10 Uya anopasa murimi mbeu yakawanda uye anopasa anhu pau kuti arhye, acamupasaiwo uye acaita kuti mbeu iwande yekuti imwimwi musime no kutunhudzira kukorora ke unatsi wenyu.)
11 Mu zviro zvese, imwimwi muri kupfumiswa nge ndaa ye kupasa kenyu zviro zvakasiyana-siyana no mwoyo wese, zveciita kuti basa ratiri kuita riite kuti anhu atende Mwari;
12 ngokuti basa iri ramuri kuita re kubetsera anhu akawanda ariripi basi kubetsera acena, asi riri kuitawo kuti anhu akawanda atende maningi Mwari.
13 Awona ari kukudza Mwari, ngokuti basa iri re kubetsera rinopangidza kuti imwimwi munozwira masoko akanaka ngezva Kristu, maererano no zvamakapangidza pamhene kuti imwimwi munopasa mupiro no mwoyo wese kaari uye no ku anhu ese.
14 Uye awona anoita minamato ye kudeketera, ecipangidza kuti zvezvirokwazvo anomudai, nge ndaa ye kukura ke nyasha dza Mwari dziri mamuri.
15 Tinotenda Mwari nge ndaa ye cipo cake co mwoyo wese cisikapanganidziki.
