Atesaronika Wecipiri 2:1-17
2 Ngokudaro hama, panocokuita no kuoneka ka Tenzi wedu Djesu Kristu uye no kuunganidzwa katinoizwa naye, tinomukumbirai
2 kuti musaruze nokukasika marangariro enyu akanaka, kana kuthyiswa nge masoko akafemerhwa,* kana masoko akaita zvekurekethwa, kana tsamba dzinooneka hinga dziri kubva katiri dzecibhuya kuti zuwa ra Djehovha* raguma.
3 Ngapatame kugara no munhu unomupausai nge mushobo upi hawo, ngokuti zuwa iri arizouyi akapauka pa kunamata asati auya uye munhu usikazwiri mutemo, mwana wekutsakatiswa waakunyasa kuziikanwa.
4 Iyena ndi muphikisi uye unodzikwidziridza pamusoro pe zviro zvese zvinodziita anamwari kana ciro cinonamathwa, zvekutoti unogara mu tempro ya Mwari, ecidzipangidza pamhene kuti iyena ndi mwari.
5 Imwimwi muciri kuedzurira here kuti pandainga ndinemwi, ndaimubvunzai zviro izvi?
6 Uye imwimwi zvino munoziya kuti cinyi ciri kumupingaidza, zvekutoti acapangidzwa pa nguwa yake yakasisira.
7 Izvirokwazvo kuti kutama kuzwira mutemo uku kuri kuitika nge mushobo wakaigika, asi kucazobuda pamhene kana uya ari kuzviitisa asisiripopi.
8 Zvezvirokwazvo, munhu usikazwiri mutemo ucabudiswa pamhene, iyena ucatsakatiswa na Tenzi Djesu no simba rinobva pa muromo wake uye ucapedzeswa pa nguwa ye kuoneka kake.
9 Asi kuoneka ke munhu usikazwiri mutemo, kunoenderana no kuseenza ka Sathani ecizviita no mabasa e simba, zvipangidzo uye no zvishamiso zvekunyepedzera,
10 eciseenzesa mushobo wese we kucengedzera usina unatsi ku aya ari kootsakatiswa, hinga kuhwirinzirhwa kawo ngokuti aazi kutenda kuda cokwadi kuti aponeswe.
11 Ndiyo ndaa Mwari eciasiya ecicengedzwa no fundiso ye kunyepa kuti atendere masoko e kunyepa,
12 kuitira kuti ese atongwe ngokuti aazi kutenda cokwadi, asi akapfadzwa no zvisina unatsi.
13 Hino hama dzinodiwa na Djehovha,* tinodikana kutenda Mwari nguwa dzese nge ndaa yenyu, ngokuti kubvira pakutanga Mwari akamusanangurai kuti muponeswe nge kumucenesai no mwiya wake uye nge kutenda kenyu mu cokwadi.
14 Iyena akamudainzirai izvona eciseenzesa masoko akanaka atinoziisa, kuitira kuti muone rukudzo ra Tenzi wedu Djesu Kristu.
15 Ngokudaro hama, rumbwai makabamba uye rumbwai makabatisisa zvamakafundiswa, zvingadai makazvifundiswa no muromo kana kuti no tsamba yakabva katiri.
16 Kusiya izvona, Tenzi wedu Djesu Kristu pamwepo na Mwari Baba edu, aya akatida uye otipasa nyaradzo isikaperi no kariro yakanaka eciseenzesa nyasha dzawo,
17 ngaanyaradze mwoyo yenyu ecimubambisai pa mabasa uye pa masoko ese akanaka.
Masoko ari pasi
^ Kana kuti: “e mwiya.” Onai pakazwi Kupanganidzwa ke Masoko.
^ Onai Apendi. A5.
^ Onai Apendi. A5.
