Atesaronika Wecipiri 3:1-18
3 Pakupedzesera hama, rumbwai mecitiitira munamato, kuitira kuti soko ra Djehovha* rirumbwe recibararika nokukasika uye recikudzwa, hinga zviri kuitika pakati penyu,
2 uye kuti tisudzunurhwe ku anhu anoita zviro zvakashata no anokuwadza, ngokuti aanhupi ese ano kutenda.
3 Asi Tenzi akatendeka, uye acamubambisai no kumudziirirai pano Wakashata.
4 Uyezve, tinomuthembai muna Tenzi kuti muri kurumbwa meciita zviro zvatakamubvunzai, uye mucarumbwa mecizviita.
5 Tenzi ngaarumbwe ecitungamirira mwoyo yenyu zvakanaka kuti mude Mwari uye kuti mushingirire nge ndaa ya Kristu.
6 Hama, zvino tiri kumupasai nhungamiriro mu zina ra Tenzi wedu Djesu Kristu, kuti musiyane no hama yese inohamba zvisikazi kusisira uye zvisikaenderani no nhungamiriro* yatakamupasai.
7 Imwimwi kamare munoziya kuti munodikana kutiteedzera kudini, ngokuti isusu atizi kuita zviro zvisikazi kusisira pakati penyu,
8 uyewo, atizi kurhya zvekurhya zve munhu nyore. Asi taipeta masimba no kuseenza no simba usiku no masikati, kuti titame kugara mutoro ku umwe na umwe wenyu.
9 Azvireyi kuti isusu tainga tisina citenderhwa ce kutambira zviro zvenyu, asi taida kuti imwimwi muteedzere muezaniso wedu.
10 Zvezvirokwazvo, patainga tinemwi, taigara tecimubvunzai kuti: “Kana munhu asikadi kuseenza, ngaasarhye.”
11 Ngokuti tiri kuzwa kuti pakati penyu pano amweni ari kuhamba zvisikazi kusisira, aaseenzi, asi anopindira mu nyaya dzisiripi dzawo.
12 Anhu awona tiri kuabvunza uye tiri kuakohomedzesa muna Tenzi Djesu Kristu kuti anodikana kuseenza akanyarara uye ecirhya zvekurhya zvaanoseenzera.
13 Asi imwimwi hama, musasiye kuita zviro zvakanaka.
14 Asi kana pano munhu usikazwiri masoko edu ari mu tsamba ii, rumbwai makamukanda cipangidzo uye musashamwaridzane naye, kuti apsveruke.
15 Musamuone hinga muzondi, asi rumbwai mecimupangira hinga hama.
16 Tenzi we runyararo ngaamupasei runyararo nguwa dzese mu mishobo yese. Tenzi ngaagare na imwimwi mwese.
17 Uu ndiwo mucungamidzo wangu inini Pauro, wandatara ngo nyara dzangu, unogara hinga cipangidzo mu tsamba dzangu dzese; aya ndiwona matariro andinoita.
18 Nyasha dza Tenzi wedu Djesu Kristu ngadzigare na imwimwi mwese.
