Juau Wecipiri 1:1-13
1 Inini mwanarume wakura,* ndiri kutarira mwanakadzi wakasanangurhwa uye no ana ake, aya andinoda zvezvirokwazvo, haiwa inini basi, asiwo no ese aya anoziya cokwadi,
2 nge ndaa ye cokwadi ciri mu mwoyo medu uye cicarumbwa na isusu nokusikaperi.
3 Nyasha uye usisi no runyararo zvinobva kuna Mwari Baba uye kuna Djesu Kristu, Mwana wa Baba, no cokwadi uye rudo, zvicagara na isusu.
4 Ndakapfara maningi pandakaziya kuti anganani e ana ako ari kuhamba mu cokwadi, maererano no mutemo watakapaswa na Baba.
5 Zvino imwimwi yaya, ndiri kumukumbirai kuti tipangidzirane rudo umwe na umwe wedu. (Andiripi kumutarirai mutemo mupsva, asi mutemo watinawo kubvira pakutanga.)
6 Tinopangidza kuti tino rudo ngo kurumbwa tecihamba maererano no mitemo yake. Uu ndiwo mutemo, maererano no zvamakazwa kubvira pakutanga, imwimwi munodikana kurumbwa mecihamba mu rudo.
7 Ngokuti kuno acengedzi akawanda akabararika mu nyika, aya asikatenderi kuti Djesu Kristu akauya hinga munhu. Awona ndi acengedzi uye munhu anopesana na Kristu.
8 Ngwarirai kuti musaruze zviro zvatiri kuseenzera, asi kuti mutambire mubairo wakakwana.
9 Wese uya anodarika fundiso dza Kristu uye asikarumbwi ari madziri, aana Mwari. Uya anorumbwa ari mu fundiso idzona ari pamwepo na Baba no Mwana.
10 Kana munhu akauya kamuri asina fundiso idzi, musamutambire pa nyumba penyu, kana kutomucungamidza.
11 Ngokuti uya anomucungamidza anonga ecidzibatanidza pa mabasa ake akashata.
12 Kunyazi ndino zviro zvakawanda zve kumutarirai, andidi kuzviita no phepha uye no tinta, asi ndino kariro ye kuzomuvhakacirai kuti ndimuonei hope no hope, kuti mupfaro wenyu unyase kudzadzika.
13 Ana e hama yako ye mwanakadzi, iya yakasanangurhwa, ari kumutambisai.
Masoko ari pasi
^ Kana kuti: “mukuru we ungano.”
